Month: December 2016

ਰਾਜਨੀਤੀ ‘ਚੋਂ ਇਖ਼ਲਾਕੀ ਕਦਰਾਂ ਦਾ ਐਲਾਨੀਆ ਨਿਘਾਰ

ਸਿਧਾਂਤਕ, ਸਦਾਚਾਰਕ ਜਾਂ ਲੋਕ ਭਲਾਈ ਦੇ ਮੁੱਦਿਆਂ ਨੂੰ ਮੁੱਖ ਰੱਖ ਕੇ ਪੰਥ, ਧਰਮ, ਦਲ ਜਾਂ ਕਿਸੇ ਸੰਗਠਨ ਦਾ ਤਿਆਗ ਕਰਕੇ ਕਿਸੇ ਦੂਸਰੇ ਅਜਿਹੇ ਮਤ ਜਾਂ ਸੰਗਠਨ ਦਾ ਅੰਗ ਬਣ ਜਾਣਾ ਸਦੀਆਂ ਤੋਂ ਚਲਦਾ ਆਇਆ ਹੈ। ਪ੍ਰੰਤੂ ਨਿੱਜੀ ਲਾਭਾਂ, ਈਰਖਾ, ਦਵੈਤ, ਭਾਈ-ਭਤੀਜਵਾਦ, ਸੱਤਾ ਜਾਂ ਧਨ ਦੇ ਲਾਲਚ ਨੂੰ ਮੁੱਖ ਰੱਖ ਕੇ ਜਦੋਂ ਕੋਈ ਵਿਅਕਤੀ ਆਪਣੇ ਵਰਤਮਾਨ ਸੰਗਠਨ ਤੋਂ ਬੇਮੁੱਖ ਹੁੰਦਾ ਹੈ ਤਾਂ ਉਸਨੁੰ ਮੌਕਾਪ੍ਰਸਤੀ ਹੀ ਮੰਨਿਆ ਜਾ ਸਕਦਾ ਹੈ। ਪਿਛਲੇ ਤਿੰਨ ਕੁ ਹਜ਼ਾਰ ਸਾਲ ਤੋਂ ਸੰਸਾਰ ਵਿੱਚ ਸਮੇਂ-ਸਮੇਂ ‘ਤੇ ਮਹਾਨ ਧਰਮਾਂ ਦਾ ਆਗਮਨ ਹੋਇਆ ਹੈ। ਜਿਹਨਾਂ ਵਿੱਚ ਬੁੱਧ ਮਤ, ਜੈਨ ਮੱਤ, ਈਸਾਈ ਮੱਤ, ਇਸਲਾਮ ਅਤੇ ਸਿੱਖ ਮੱਤ ਪ੍ਰਮੁੱਖ ਹਨ। ਇਸ ਸਮੇਂ ਦੌਰਾਨ ਸੱਚ, ਧਰਮ ਅਤੇ ਮਾਨਵ ਹਿੱਤਾਂ ਨੂੰ ਮੁੱਖ ਰੱਖ ਕੇ ਕਿਸੇ ਦੂਸਰੇ ਘਰਮ ਦੇ ਪੈਗੰਬਰ ਦੇ ਅਨੁਭਵ ਨੂੰ ਉੱਤਮ ਵੇਖ ਕੇ ਮੱਤ ਪਰਿਵਰਤਨ ਵਿਅਕਤੀਗਤ ਰੂਪ ਵਿੱਚ ਵੀ ਹੋਏ ਅਤੇ ਸਮੂਹਿਕ ਰੂਪ ਵਿੱਚ ਵੀ ਹੋਏ। ਅਜੋਕੇ ਸਮਿਆਂ ਵਿੱਚ ਡਾ. ਭੀਮ ਰਾਓ ਅੰਬੇਡਕਰ ਸਾਹਿਬ ਨੇ ਦਲਿਤਾਂ ਅਤੇ ਦਮਿਤਾਂ ਨੂੰ ਭਾਰਤੀ ਸਮਾਜ ਦੀ ਊਚ ਨੀਚ ਵਾਲੀ ਦਰਜਾਬੰਦੀ ਦੇ ਸਭ ਤੋਂ ਹੇਠਲੇ ਪੱਧਰ ਤੋਂ ਮੁਕਤੀ ਦਿਵਾਉਣ ਲਈ ਉਨ੍ਹਾਂ ਦਾ ਬੁੱਧ ਮੱਤ ਵਿੱਚ ਪ੍ਰਵੇਸ਼ ਕਰਵਾਇਆ ਸੀ। ਇਹ ਪੰਥ ਪਰਿਵਰਤਨ ਅਸੰਖਾਂ ਦੱਬੇ ਕੁਚਲੇ ਅਤੇ ਗੈਰ ਮਾਨਵੀ ਦੁਰਾਚਾਰ ਦਾ ਸ਼ਿਕਾਰ ਹੋਏ ਲੋਕਾਂ ਨੂੰ ਉਭਾਰਨਾ ਸੀ।
ਸਿਆਸੀ ਖੇਤਰ ਵਿੱਚ ਦੇਖੀਏ ਤਾਂ ਭਾਰਤ ਦੀ ਆਜ਼ਾਦੀ ਲਈ ਸੰਘਰਸ਼ ਕਰਨ ਵਾਲੇ ਅਤੇ ਵੱਡੀਆਂ ਕੁਰਬਾਨੀਆਂ ਦੇਣ ਵਾਲੇ ਦੇਸ਼ ਭਗਤ ਨੇਤਾਵਾਂ ਨੇ ਸੱਚੇ ਸਿਧਾਂਤਕ ਮਤਭੇਦ ਹੋਣ ਕਰ ਕੇ ਕਾਂਗਰਸ ਅਤੇ ਇਸ ਦੇ ਆਗੂ ਪੰਡਤ ਜਵਾਹਰ ਲਾਲ ਨਹਿਰੂ ਨਾਲੋਂ ਵੱਖ ਹੋ ਕੇ ਅਨੇਕਾਂ ਨਵੇਂ ਦਲ ਬਣਾਏ। ਜੂਨ 1948 ਤੋਂ 1950 ਦਰਮਿਆਨ ਭਾਰਤ ਦੇ ਪਹਿਲੇ ਗਵਰਨਰ ਜਨਰਲ ਔਫ਼ ਇੰਡੀਆ ਰਹੇ ਭਾਰਤ ਰਤਨ ਸੀ. ਰਾਜਗੋਪਾਲਾਚਾਰੀਆ ਨੇ 1959 ਵਿੱਚ ਸੁਤੰਤਰ ਪਾਰਟੀ ਬਣਾਈ ਸੀ। ਇਸੇ ਤਰ੍ਹਾਂ ਰਾਮ ਮਨੋਹਰ ਲੋਹੀਆ ਅਤੇ ਅਸ਼ੋਕ ਮਹਿਤਾ ਆਦਿ ਨੇ ਕਾਂਗਰਸ ਸੋਸ਼ਲਿਸਟ ਪਾਰਟੀ ਬਣਾਈ ਸੀ। ਅਚਾਰੀਆ ਨਰਿੰਦਰਾ ਦੇਵਾ ਅਤੇ ਵਾਸਵਾਨ ਸਿਨਹਾ ਨੇ ਪਰਜਾ ਸੋਸ਼ਲਿਸਟ ਪਾਰਟੀ ਨੂੰ ਹੋਂਦ ਵਿੱਚ ਲਿਆਂਦਾ ਸੀ। ਇਸੇ ਤਰ੍ਹਾਂ ਕਿਸਾਨ ਮਜ਼ਦੂਰ ਪਰਜਾ ਪਾਰਟੀ ਦੇ ਸੰਸਥਾਪਕ ਜੇ. ਬੀ. ਕ੍ਰਿਪਲਾਨੀ ਸਨ। ਐਮਰਜੈਂਸੀ ਦੌਰਾਨ ਲੋਕ ਨਾਇਕ ਜੈ ਪ੍ਰਕਾਸ਼ ਨਰਾਇਣ ਦੀ ਅਗਵਾਈ ਵਿੱਚ ਜਨਤਾ ਪਾਰਟੀ ਹੋਂਦ ਵਿੱਚ ਆਈ ਸੀ।ਅਜਿਹੀਆਂ ਅਨੇਕਾਂ ਪਾਰਟੀਆਂ ਬਣਦੇ ਸਮੇਂ ਬਹੁਤ ਸਾਰੇ ਨੇਤਾਵਾਂ ਨੇ ਇੱਕ ਦਲ ਤੋਂ ਦੂਜੇ ਦਲ ਵਿੱਚ ਸ਼ਮੂਲੀਅਤ ਕੀਤੀ। ਇਸੇ ਖੱਬੇ ਪੱਖੀ ਲਹਿਰ ਨਾਲ ਸਬੰਧਤ ਕਈ ਪਾਰਟੀਆਂ ਬਣੀਆਂ ਪਰ ਇਹ ਸਾਰੀਆਂ ਪਾਰਟੀਆਂ ਸਿਧਾਂਤਕ ਮਤਭੇਦਾਂ ਦਾ ਸਿੱਟਾ ਸਨ। ਪਾਰਟੀਆਂ ਬਦਲਣ ਵਾਲੇ ਨੇਤਾਵਾਂ ਨੇ ਇੱਕ ਦੂਜੇ ਦੇ ਖਿਲਾਫ਼ ਚੋਣਾਂ ਵੀ ਲੜੀਆਂ ਪ੍ਰੰਤੂ ਇਹਨਾਂ ਵਿੱਚੋਂ ਕਿਸੇ ਦੀ ਵੀ ਦਲ ਬਦਲੀ ਨਿੱਜੀ ਮੁਫ਼ਾਦ ਲਈ ਨਹੀਂ ਸੀ। ਸਿਧਾਂਤਾਂ ਨੂੰ ਲੈ ਕੇ ਮਤਭੇਦ ਅਤੇ ਦਲ ਬਦਲੀਆਂ ਕਿਸੇ ਜਮਹੂਰੀਅਤ ਵਿੱਚ ਸੁਭਾਵਿਕ ਵਰਤਾਰਾ ਹਨ। ਅਜਿਹਾ ਵਰਤਾਰਾ ਲੋਕ ਰਾਜ ਦੀ ਸਿਹਤ ਲਈ ਜ਼ਰੂਰੀ ਕਿਹਾ ਜਾ ਸਕਦਾ ਹੈ। ਇਸੇ ਨਾਲ ਰਾਜਨੀਤਿਕ ਖੜੋਤ ਵੀ ਟੁੱਟਦੀ ਹੈ ਅਤੇ ਪਬਲਿਕ ਭਲਾਈ ਦੇ ਮਨੋਰਥ ਪੱਤਰ ਵੀ ਸਾਹਮਣੇ ਆਉਂਦੇ ਹਨ।
ਦੂਜੇ ਪਾਸੇ ਅੱਜਕਲ੍ਹ ਦਲ ਬਦਲੀ ਦਾ ਅਤੀ ਭ੍ਰਿਸ਼ਟ ਅਤੇ ਅਨੋਖਾ ਰੂਪ ਦੇਖਣ ਨੂੰ ਸਾਹਮਣੇ ਆ ਰਿਹਾ ਹੈ। ਜਿਸਦਾ ਸਿਧਾਂਤ, ਇਖਲਾਕ ਜਾਂ ਲੋਕ ਹਿੱਤਾਂ ਨਾਲ ਦੂਰ ਨੇੜੇ ਦਾ ਵੀ ਵਾਸਤਾ ਨਹੀਂ ਹੈ। ਕਈਆਂ ਨੇ ਤਾਂ ਹੱਦ ਹੀ ਕਰ ਦਿੱਤੀ ਜਦੋਂ ਇੱਕੋ ਸੀਜਨ ਵਿੱਚ ਦੂਹਰੀ ਤੀਹਰੀ ਦਲ ਬਦਲੀ ਕਰ ਲਈ ਹੈ, ਜਿਵੇਂ ਸਾਡੇ ਖੂਬਸੂਰਤ ਗਾਇੱਕ ਅਤੇ ਰਾਜ ਗਾਇੱਕ ਦੀ ਪਦਵੀ ਦੇ ਮਾਲਕ ਹੰਸ ਰਾਜ ਹੰਸ ਨੇ ਕੀਤਾ ਹੈ। ਸ਼੍ਰੋਮਣੀ ਅਕਾਲੀ ਦਲ ਨੇ ਟਿਕਟ ਦਿੱਤੀ ਅਤੇ ਚੋਣ ਲੜਾਈ। ਜਦੋਂ ਹੰਸ ਚੋਣ ਹਾਰ ਗਿਆ ਤਾਂ ਕਾਂਗਰਸ ਵਿੱਚ ਚਲਾ ਗਿਆ ਕਿਉਂਕਿ ਕੈਪਟਨ ਅਮਰਿੰਦਰ ਸਿੰਘ ਨੇ ਰਾਜ ਸਭਾ ਵਿੱਚ ਪਹੁੰਚਾਉਣ ਦਾ ਵਾਅਦਾ ਕੀਤਾ ਸੀ। ਜਦੋਂ ਉਥੇ ਵੀ ਦਾਲ ਨਾ ਗਲ਼ੀ ਤਾਂ ਹੰਸ ਸਾਹਿਬ ਹੁਣ ਭਾਰਤੀ ਜਨਤਾ ਪਾਰਟੀ ਵਿੱਚ ਸ਼ਾਮਲ ਹੋ ਗਿਆ ਹੈ। ਇਸ ਤਰ੍ਹਾਂ ਨਵਜੋਤ ਸਿੰਘ ਸਿੱਧੂ ਦੀ ਉਦਹਾਰਣ ਲਈ ਜਾ ਸਕਦੀ ਹੈ। ਰਾਜ ਸਭਾ ਤੋਂ ਅਸਤੀਫ਼ਾ ਦੇ ਕੇ ਅਤੇ ਭਾਰਤੀ ਜਨਤਾ ਪਾਰਟੀ ਛੱਡ ਕੇ ਸਿੱਧੂ ਨੇ ਆਮ ਆਦਮੀ ਪਾਰਟੀ ਵਿੱਚ ਸ਼ਾਮਲ ਹੋਣ ਲਈ ਗੱਲਬਾਤ ਕੀਤੀ। ਜਦੋਂ ਲੈਣ-ਦੇਣ ਦੀ ਗੱਲ ਸਿਰੇ ਨਾ ਚੜ੍ਹੀ ਤਾਂ ਪ੍ਰਗਟ ਸਿੰਘ ਅਤੇ ਬੈਂਸ ਭਰਾਵਾਂ ਨਾਲ ਮਿਲ ਕੇ ਆਵਾਜ਼-ਏ-ਪੰਜਾਬ ਬਣਾ ਲਈ। ਜਦੋਂ ਬੈਂਸ ਭਰਾਵਾਂ ਨੇ ਕੇਜਰੀਵਾਲ ਨਾਲ ਹੱਥ ਮਿਲਾ ਕੇ ਪੰਜ ਟਿਕਟਾਂ ਦਾ ਸਮਝੌਤਾ ਕਰ ਲਿਆ ਤਾਂ ਨਵਜੋਤ ਸਿੰਘ ਸਿੱਧੂ ਅਤੇ ਪ੍ਰਗਟ ਸਿੰਘ ਨੇ ਕਾਂਗਰਸ ਦਾ ਹੱਥ ਫ਼ੜ ਲਿਆ। ਸੰਗਰੂਰ ਤੋਂ ਸਾਬਕਾ ਐਮ. ਐਲ. ਏ. ਸੁਰਿੰਦਰਪਾਲ ਸਿੰਘ ਸਿਬੀਆ ਨੂੰ ਜਦੋਂ ਕਾਂਗਰਸ ਨੇ ਉਮੀਦਵਾਰ ਨਹੀਂ ਬਣਾਇਆ ਤਾਂ ਉਹ ਅਕਾਲੀ ਦਲ ਵਿੱਚ ਸ਼ਾਮਲ ਹੋ ਗਿਆ ਅਤੇ ਸ਼੍ਰੋਮਣੀ ਅਕਾਲੀ ਦਲ ਦਾ ਬਰਨਾਲਾ ਤੋਂ ਉਮੀਦਵਾਰ ਬਣ ਗਿਆ। ਦੋ ਵਾਰ ਮੰਤਰੀ ਰਹੇ ਅਤੇ ਛੇ ਵਾਰ ਵਿਧਾਇਥ ਰਹੇ ਸਵਰਨ ਸਿੰਘ ਫ਼ਿਲੌਰ ਨੂੰ ਜਦੋਂ ਸ਼੍ਰੋਮਣੀ ਅਕਾਲੀ ਦਲ ਨੇ ਟਿਕਟ ਨਹੀਂ ਦਿੱਤਾ ਤਾਂ ਉਹ ਕਾਂਗਰਸ ਵਿੱਚ ਸ਼ਾਮਲ ਹੋ ਕੇ ਟਿਕਟ ਲਈ ਤਰਲੋਮੱਛੀ ਹੋ ਰਹੇ ਹਨ। ਇਸ ਤਰ੍ਹਾਂ ਸਾਬਕਾ ਅਕਾਲੀ ਵਿਧਾਇੱਕ ਜਗਤਾਰ ਸਿੰਘ ਰਾਜਲਾ ਨੂੰ ਜਦੋਂ ਸਮਾਣਾ ਤੋਂ ਟਿਕਟ ਨਹੀਂ ਮਿਲੀ ਤਾਂ ਉਹ ਕਾਂਗਰਸ ਵਿੱਚ ਸ਼ਾਮਲ ਹੋ ਗਿਆ। ਹੁਣ ਆਮ ਆਦਮੀ ਪਾਰਟੀ ਦਾ ਸਮਾਣਾ ਤੋਂ ਉਮੀਦਵਾਰ ਹੈ। ਸ਼੍ਰੋਮਣੀ ਅਕਾਲੀ ਦਲ ਦੇ ਵੱਡੇ ਲੀਡਰ ਅਤੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ 16 ਸਾਲ ਤੱਕ ਪ੍ਰਧਾਨ ਰਹੇ ਜਥੇਦਾਰ ਗੁਰਚਰਨ ਸਿੰਘ ਟੌਹੜਾ ਦੀ ਬੇਟੀ ਬੀਬੀ ਕੁਲਦੀਪ ਕੌਰ ਟੌਹੜਾ ਵੀ ਸਨੌਰ ਤੋਂ ‘ਆਪ’ ਦੀ ਉਮੀਦਵਾਰ ਬਣ ਕੇ ਸ਼੍ਰੋਮਣੀ ਅਕਾਲੀ ਦਲ ਦੀਆਂ ਨੀਤੀਆਂ ਦੇ ਖਿਲਾਫ਼ ਲੜੇਗੀ। ਇਸੇ ਤਰ੍ਹਾਂ ਦੀ ਇੱਕ ਹੋਰ ਉਦਹਾਰਣ ਡੇਰਾਬੱਸੀ ਤੋਂ ਬੀਬੀ ਸਰਜੀਤ ਕੌਰ ਦੀ ਹੈ ਜੋ ਸਵਰਗੀ ਅਕਾਲੀ ਨੇਤਾ ਕੈਪਟਨ ਕੰਵਲੀਜੀਤ ਸਿੰਘ ਦੀ ਪਤਨੀ ਹੈ ਅਤੇ ਆਮ ਆਦਮੀ ਪਾਰਟੀ ਦੀ ਉਮੀਦਵਾਰ ਹੈ। ਘਨੌਰ ਤੋਂ ਅਨੂ ਰੰਧਾਵਾ ਅਤੇ ਸੁਨਾਮ ਤੋਂ ਅਮਨ ਅਰੋੜਾ ਦਾ ਪਿਛੋਕੜ ਕਾਂਗਰਸ ਪਾਰਟੀ ਨਾਲ ਸਬੰਧਤ ਹੈ ਪਰ ਉਹ ਆਮ ਆਦਮੀ ਪਾਰਟੀ ਦੀ ਟਿਕਟ ‘ਤੇ ਚੋਣ ਲੜਨ ਜਾ ਰਹੇ ਹਨ। ਇਹ ਤਾਂ ਕੁਝ ਕੁ ਉਦਾਹਰਣਾਂ ਹਨ ਪਰ ਇਸ ਵਾਰ ਇਹ ਵਰਤਾਰਾ ਵੱਡੇ ਪੱਧਰ ‘ਤੇ ਵੇਖਣ ਨੂੰ ਮਿਲ ਰਿਹਾ ਹੈ। ਇੱਕ ਪਾਰਟੀ ਤੋਂ ਟਿਕਟ ਲਈ ਅਰਜੀ ਦਿੱਤੀ ਜਾਂਦੀ ਹੈ। ਕਈ ਮਹੀਨੇ ਆਪਣੇ ਪ੍ਰਭਾਵ ਨੂੰ ਦਿਖਾਉਣ ਲਈ ਸਰਗਰਮੀਆਂ ਵੀ ਕੀਤੀਆਂ ਜਾਂਦੀਆਂ ਹਨ। ਵਿਰੋਧੀ ਪਾਰਟੀਆਂ ਨੂੰ ਖੁੱਲ੍ਹ ਕੇ ਭੰਡਿਆ ਵੀ ਜਾਂਦਾ ਹੈ ਪਰ ਟਿਕਟ ਮਿਲਣ ਤੋਂ ਨਾਂਹ ਹੋਣ ਸਾਰ ਉਸੇ ਪਾਰਟੀ ਨੂੰ ਮੁਕਤਕੰਠ ਹੋ ਕੇ ਨਿੰਦਣਾ ਸ਼ੁਰੂ ਕਰ ਦਿੱਤਾ ਜਾਂਦਾ ਹੈ। ਜਿਸ ਪਾਰਟੀ ਨੂੰ ਸਵੇਰੇ ਤੋਂ ਸ਼ਾਮ ਤੱਕ ਗਾਲਾਂ ਕੱਢੀਆਂ ਹੁੰਦੀਆਂ ਹਨ, ਉਸੇ ਪਾਰਟੀ ਵਿੱਚ ਸ਼ਮੂਲੀਅਤ ਕਰਕੇ ਟਿਕਟ ਲਈ ਯਤਨ ਕਰਨੇ ਸ਼ੁਰੂ ਹੋ ਜਾਂਦੇ ਹਨ।
ਇਖਲਾਕੀ ਪੱਤਣ ਨੂੰ ਪ੍ਰਗਟ ਕਰਨ ਵਾਲੇ ਇਸ ਵਰਤਾਰੇ ਦੀ ਹੱਦ ਤਾਂ ਉਦੋਂ ਹੋ ਜਾਂਦੀ ਹੈ ਜਦੋਂ ਪੰਜਾਬ ਦੀਆਂ ਸਾਰੀਆਂ ਪ੍ਰਮੁੱਖ ਪਾਰਟੀਆਂ ਕਾਂਗਰਸ, ਸ਼੍ਰੋਮਣੀ ਅਕਾਲੀ ਦਲ, ਆਮ ਆਦਮੀ ਪਾਰਟੀ ਅਤੇ ਭਾਰਤੀ ਜਨਤਾ ਪਾਰਟੀ ਐਲਾਨੀਆ ਤੌਰ ‘ਤੇ ਇਹ ਕਹਿੰਦੀਆਂ ਹਨ ਕਿ ਟਿਕਟ ਤਾਂ ਉਸ ਵਰਕਰ ਨੂੰ ਦਿੱਤਾ ਜਾਊ ਜਿਸਦੇ ਜਿੱਤਣ ਦੀ ਉਮੀਦ ਹੋਊ। ਅਜਿਹੀ ਜਿੱਤ ਦਾ ਆਧਾਰ ਪੈਸਾ ਵੀ ਹੋ ਸਕਦਾ ਹੈ, ਫ਼ਿਰਕਾਪ੍ਰਸਤੀ ਜਾਂ ਕਬੀਲੇਦਾਰੀ ਵੀ ਹੋ ਸਕਦੀ ਹੈ। ਕਿਤੇ ਦਲਿਤ ਪੱਤਾ ਚਲਾਇਆ ਜਾਂਦਾ ਹੈ ਅਤੇ ਕਿਤੇ ਧਰਮ ਦੇ ਨਾਮ ਤੇ ਜਿੱਤ ਦੀ ਉਮੀਦ ਰੱਖੀ ਜਾਂਦੀ ਹੈ। ਮਲੇਰਕੋਟਲਾ ਵਿੱਚ ਪਾਰਟੀ ਕੋਈ ਵੀ ਹੋਵੇ, ਮੁਸਲਮਾਨ ਹੀ ਜਿੱਤੇਗਾ। ਸ਼ੇਰ ਸਿੰਘ ਘੁਬਾਇਆ ਰਾਏ ਸਿੱਖਾਂ ਦਾ ਲੀਡਰ ਹੈ। ਰਾਏ ਸਿੱਖ ਵੋਟਾਂ ਨੂੰ ਪ੍ਰਭਾਵਿਤ ਕਰਨ ਵਾਲਾ ਬੰਦਾ ਹੀ ਜਿੱਤੇਗਾ। ਇਉਂ ਪੰਜਾਬ ਦੀਆਂ ਰਿਜ਼ਰਵ ਸੀਟਾਂ ‘ਤੇ ਜਾਤੀ ਸਮੀਕਰਨ ਵੇਖ ਕੇ ਉਮੀਦਵਾਰ ਖੜ੍ਹਾਏ ਜਾਂਦੇ ਹਨ।
ਇਸ ਵਿੱਚ ਕੋਈ ਸ਼ੱਕ ਨਹੀਂ ਕਿ ਸ਼੍ਰੋਮਣੀ ਅਕਾਲੀ ਦਲ ਨੇ ਚੋਣ ਜਿੱਤਣ ਲਈ ਹਮੇਸ਼ਾ ਧਰਮ ਦਾ ਸਹਾਰਾ ਲਿਆ ਹੈ। ਸ਼੍ਰੋਮਣੀ ਅਕਾਲੀ ਦਲ ਪੰਥ ਹਿਤੈਸ਼ੀ ਹੋਣ ਦਾ ਦਾਅਵਾ ਕਰਦਾ ਹੈ। ਸ਼੍ਰੋਮਣੀ ਅਕਾਲੀ ਦਲ ਚੋਣਾਂ ਜਿੱਤਣ ਲਈ ਸਿੱਖਾਂ ਦੇ ਹਿੱਤਾਂ ਦੀ ਰਾਖੀ ਕਰਨ ਦਾ ਨਾਅਰਾ ਦੇ ਕੇ ਵੋਟਾਂ ਵਟੋਰਨ ਦੀ ਚੇਸ਼ਟਾ ਕਰਦਾ ਹੈ। ਦਲ ਵੱਲੋਂ ਕਾਂਗਰਸ ਨੂੰ ਸਿੱਖਾਂ ਦੀ ਦੁਸ਼ਮਣ ਪਾਰਟੀ ਵਜੋਂ ਪੇਸ਼ ਕੀਤਾ ਜਾਂਦਾ ਹੈ। ਕਾਂਗਰਸ ਨਿਰਪੱਖਤਾ ਦਾ ਢੰਡੋਰਾ ਪਿੱਟ ਕੇ ਅਦੇ ਦਲਿਤ ਵੋਟਾਂ ਦੇ ਸਿਰ ‘ਤੇ ਰਾਜ ਭਾਗ ਲੈਣ ਦਾ ਯਤਨ ਕਰਦੀ ਰਹੀ ਹੈ। ਪੰਜਾਬੀ ਸੂਬਾ ਹੋਂਦ ਵਿੱਚ ਆਉਣ ਤੋਂ ਬਾਅਦ ਕਾਂਗਰਸ ਅਤੇ ਅਕਾਲੀ ਅਜਿਹੇ ਪੈਂਤੜਿਆਂ ਦੇ ਬਲਬੂਤੇ ‘ਤੇ ਚੋਣਾਂ ਜਿੱਤਦੇ ਰਹੇ ਹਨ। ਵੱਡੇ ਦੁੱਖ ਦੀ ਗੱਲ ਹੈ ਕਿ ਸਭ ਤੋਂ ਨਵੀਂ ਅਤੇ ਅੱਗ ਦੇ ਭਬੂਕੇ ਵਾਂਗ ਉਦੇ ਹੋਈ ਆਮ ਆਦਮੀ ਪਾਰਟੀ ਨੇ ਨਾ ਸਿਰਫ਼ ਗੈਰ ਇਖਲਾਕੀ ਦਲ ਬਦਲੀ ਨੂੰ ਅਪਣਾ ਹੀ ਲਿਆ ਬਲਕਿ ਇਸ ਭ੍ਰਿਸ਼ਟ ਵਰਤਾਰੇ ਵਿੱਚ ਰਵਾਇਤੀ ਦਲਾਂ ਨੁੰ ਵੀ ਤੇਜ਼ੀ ਨਾਲ ਪਿੱਛੇ ਛੱਡ ਦਿੱਤਾ ਹੈ। ਆਮ ਆਦਮੀ ਪਾਰਟੀ ਨੇ ਹੁਣ ਤੱਕ 25 ਹਲਕਿਆਂ ਵਿੱਚ ਹੋਰਨਾਂ ਪਾਰਟੀਆਂ ਨੂੰ ਛੱਡ ਕੇ ਆਏ ਨੇਤਾਵਾਂ ਨੂੰ ਟਿਕਟਾਂ ਦਿੱਤੀਆਂ ਹਨ।
ਕਮਾਲ ਇਹ ਅੱਜ ਕੋਈ ਵੀ ਸਿਆਸੀ ਪਾਰਟੀ ਆਪਣੀ ਵਿੱਚਾਰਧਾਰਾ ਅਤੇ ਪਾਰਟੀ ਦੀਆਂ ਨੀਤੀਆਂ ਦੀ ਗੱਲ ਨਹੀਂ ਕਰਦੀ। ਨੀਤੀ ਅਤੇ ਸਿਧਾਂਤ ਤਾਂ ਹੁਣ ਬੀਤੇ ਦੀ ਗੱਲ ਬਣ ਕੇ ਰਹਿ ਗੲੈ ਹਨ। ਅੱਜ ਦੇ ਸਿਆਸੀ ਨੇਤਾਵਾਂ ਦੀ ਵਫ਼ਾਦਾਰੀ ਅਤੇ ਪ੍ਰਤੀਬੱਧਤਾ ਸਿਰਫ਼ ਤੇ ਸਿਰਫ਼ ਆਪਣੇ ਨਿੱਜ ਨਾਲ ਹੈ। ਇਹ ਇੱਕ ਹੋਰ ਵੀ ਕਮਾਲ ਹੈ ਕਿ ਹੁਣ ਦਲ ਬਦਲਣ ਵਾਲੇ ਸ਼ਰੇਆਮ ਕਹਿਣ ਲੱਗੇ ਹਨ ਕਿ ਉਹਨਾਂ ਨੇ ਦਲ ਇਸ ਕਾਰਨ ਬਦਲਿਆ ਹੈ ਕਿ ਉਹਨਾਂ ਨੂੰ ਟਿਕਟ ਨਹੀਂ ਮਿਲੀ ਜਾਂ ਫ਼ਿਰ ਰਾਜ ਸਭਾ ਦੀ ਸੀਟ ਨਹੀਂ ਮਿਲੀ ਜਾਂ ਕੋਈ ਹੋਰ ਅਹੁਦਾ ਨਹੀਂ ਮਿਲਿਆ। ਅਜਿਹੇ ਹਾਲਾਤ ਵਿੱਚ ਵੋਟਰ ਵਿੱਚਾਰਾ ਕੀ ਕਰੇ।

ਪੰਜਾਬ ਦੇ ਸੰਭਾਵੀ ਮੁੱਖ ਮੰਤਰੀ: ਕੈਪ. ਅਮਰਿੰਦਰ ਸਿੰਘ, ਪ੍ਰਕਾਸ਼ ਸਿੰਘ ਬਾਦਲ, ਅਰਵਿੰਦ ਕੇਜਰੀਵਾਲ

ਫ਼ਰਵਰੀ 2017 ਵਿੱਚ ਹੋ ਰਹੀਆਂ ਵਿਧਾਨ ਸਭਾ ਦੀਆਂ ਚੋਣਾਂ ਪਿਛਲੀਆਂ ਸਾਰੀਆਂ ਚੋਣਾਂ ਨਾਲੋਂ ਵੱਖਰੀਆਂ ਹਨ। ਇਹਨਾਂ ਚੋਣਾਂ ਵਿੱਚ ਮੁਕਾਬਲਾ ਤਿਕੋਣਾ ਹੈ। ਕਾਂਗਰਸ ਅਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਨਾਲ-ਨਾਲ ਹੁਣ ਆਮ ਆਦਮੀ ਪਾਰਟੀ ਵੀ ਪੰਜਾਬ ਦੀ ਸੱਤਾ ਹਾਸਲ ਕਰਨ ਲਈ ਵੱਡੀ ਦਾਅਵੇਦਾਰ ਹੈ। ਹਿੰਦੋਸਤਾਨੀ ਲੋਕਤੰਤਰ ਵਿੱਚ ਵੋਟਾਂ ਪਾਰਟੀ ਦੇ ਨਾਲ ਨਾਲ ਪਾਰਟੀ ਲੀਡਰ ਦੇ ਨਾਮ ‘ਤੇ ਵੀ ਪੈਂਦੀਆਂ ਹਨ। ਵੋਟਰ ਆਪਣੇ ਮਨ ਵਿੱਚ ਸੰਭਾਵੀ ਮੁੱਖ ਮੰਤਰੀ ਦੀ ਤਸਵੀਰ ਵੀ ਰੱਖਦਾ ਹੈ। ਇਹੀ ਕਾਰਨ ਹੈ ਕਿ ਆਮ ਆਦਮੀ ਪਾਰਟੀ ਨੂੰ ਇਸ ਸਵਾਲ ਦਾ ਜਵਾਬ ਦੇਣ ਵਿੱਚ ਡਾਢੀ ਮੁਸ਼ਕਿਲ ਪੇਸ਼ ਆ ਰਹੀ ਹੈ। ‘ਆਪ’ ਦਾ ਕਨਵੀਨਰ ਅਰਵਿੰਦ ਕੇਜਰੀਵਾਲ ਹਰਿਆਣਵੀ ਹੈ ਅਤੇ ਦਿੱਲੀ ਦਾ ਮੁੱਖ ਮੰਤਰੀ ਵੀ ਹੈ। ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਕੋਲ ਇਕੋ ਜਿਹੇ ਕੱਦ ਵਾਲੇ ਕਈ ਨੇਤਾ ਹਨ ਪਰ ਕੋਈ ਇੰਨਾ ਵੱਡਾ ਅਤੇ ਸੀਨੀਅਰ ਨਹੀਂ ਜਿਸ ਦੇ ਨਾਮ ‘ਤੇ ਸਰਬਸੰਮਤੀ ਹੋ ਸਕੇ। ਪੰਜਾਬ ਚੋਣਾਂ ਤੋਂ ਬਾਅਦ ਪੰਜਾਬ ਦਾ ਸੰਭਾਵੀ ਮੁੱਖ ਮੰਤਰੀ ਕੌਣ ਹੋ ਸਕਦਾ ਹੈ, ਇਸ ਬਾਰੇ ਚਰਚਾ ਕਰਨੀ ਬਣਦੀ ਹੈ। ਸੰਭਾਵੀ ਮੁੱਖ ਮੰਤਰੀਆਂ ਦੀ ਸੂਚੀ ਵਿੱਚ ਹੇਠ ਲਿਖੇ ਨਾਵਾਂ ਦੀ ਚਰਚਾ ਲੋਕਾਂ ਦੀ ਜੁਬਾਨ ‘ਤੇ ਹੈ।
(1) ਕੈਪਟਨ ਅਮਰਿੰਦਰ ਸਿੰਘ- ਪੰਜਾਬ ਵਿੱਚ ਜੇ ਕਾਂਗਰਸ ਦੀ ਸਰਕਾਰ ਬਣਦੀ ਹੈ ਤਾਂ ਨਿਰਸੰਦੇਹ ਕੈਪਟਨ ਅਮਰਿੰਦਰ ਸਿੰਘ ਪੰਜਾਬ ਦੇ ਮੁੱਖ ਮੰਤਰੀ ਹੋਣਗੇ। ਕੈਪਟਨ ਅਮਰਿੰਦਰ ਸਿੰਘ 2002 ਤੋਂ 2007 ਤੱਕ ਪੰਜਾਬ ਦੇ ਮੁੱਖ ਮੰਤਰੀ ਰਹਿ ਚੁੱਕੇ ਹਨ। ਪਟਿਆਲਾ ਰਿਆਸਤ ਦੇ ਵੰਸ਼ਜ ਕੈਪਟਨ ਅਮਰਿੰਦਰ ਸਿੰਘ ਦਾ ਜਨਮ 11 ਮਾਰਚ 1942 ਨੂੰ ਮਹਾਰਾਜਾ ਯਾਦਵਿੰਦਰ ਸਿੰਘ ਅਤੇ ਮਹਾਰਾਣੀ ਮਹਿੰਦਰ ਕੌਰ ਦੇ ਘਰ ਹੋਇਆ। ਕੈਪਟਨ ਅਮਰਿੰਦਰ ਸਿੰਘ ਦੀ ਧਰਮ ਪਤਨੀ ਮਹਾਰਾਣੀ ਪਰਨੀਤ ਕੌਰ 2009 ਤੋਂ 2014 ਤੱਕ ਕੇਂਦਰ ਵਿੱਚ ਵਿਦੇਸ਼ ਮਾਮਲਿਆਂ ਦੀ ਰਾਜ ਮੰਤਰੀ ਰਹੀ। ਇਹਨਾਂ ਦਾ ਪੁੱਤਰ ਰਣਇੰਦਰਸਿੰਘ ਲੋਕ ਸਭਾ ਅਤੇ ਵਿਧਾਨ ਸਭਾ ਦੀਆਂ ਦੋ ਚੋਣਾਂ ਲੜ ਚੁੱਕਿਆ ਹੈ ਪਰ ਅਜੇ ਤੱਕ ਸਫ਼ਲ ਨਹੀਂ ਹੋਇਆ। ਕੈਪਟਨ ਦੀ ਭੈਣ ਦਾ ਪਤੀ ਨਟਵਰ ਸਿੰਘ ਭਾਰਤ ਦਾ ਵਿਦੇਸ਼ ਮੰਤਰੀ ਰਹਿ ਚੁੱਕਾ ਹੈ। ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਦਾ ਪ੍ਰਧਾਨ ਸਿਮਰਨਜੀਤ ਸਿੰਘ ਮਾਨ ਕੈਪਟਨ ਅਮਰਿੰਦਰ ਸਿੰਘ ਦਾ ਸਾਂਢੂ ਹੈ।
ਕੈਪਟਨ ਅਮਰਿੰਦਰ ਸਿੰਘ ਨੇ ਐਨ. ਡੀ. ਏ. ਅਤੇ ਆਈ. ਐਮ. ਏ. ਦੇਹਰਾਦੂਨ ਤੋਂ ਸਿਖਲਾਈ ਲਈ ਅਤੇ ਭਾਰਤੀ ਫ਼ੌਜ ਵਿੱਚ ਕੈਪਟਨ ਦੇ ਅਹੁਦੇ ‘ਤੇ ਰਹੇ। ਕੈਪਟਨ ਨੇ 1965 ਦੀ ਹਿੰਦ-ਪਾਕਿ ਲੜਾਈ ਵਿੱਚ ਹਿੱਸਾ ਲਿਆ ਅਤੇ ਜੰਗ ਤੋਂ ਬਾਅਦ ਆਰਮੀ ਤੋਂ ਅਸਤੀਫ਼ਾ ਦੇ ਦਿੱਤਾ। ਕੈਪਟਨ ਅਤੇ ਰਾਜੀਵ ਗਾਂਧੀ ਦੂਨ ਸਕੂਲ ਵਿੱਚ ਜਮਾਤੀ ਰਹੇ ਸਨ। ਰਾਜੀਵ ਗਾਂਧੀ ਦੀ ਪ੍ਰੇਰਨਾ ਨਾਲ ਕੈਪਟਨ ਅਮਰਿੰਦਰ ਸਿੰਘ 1950 ਵਿੱਚ ਕਾਂਗਰਸ ਵਿੱਚ ਸ਼ਾਮਲ ਹੋਇਆ ਅਤੇ ਲੋਕ ਸਭਾ ਦੀ ਚੋਣ ਜਿੱਤਿਆ। 1984 ਵਿੱਚ ਸਾਕਾ ਨੀਲਾ ਤਾਰਾ ਦੇ ਵਿਰੋਧ ਵਿੱਚ ਅਸਤੀਫ਼ਾ ਦੇ ਦਿੱਤਾ ਅਤੇ ਸ਼੍ਰੋਮਣੀ ਅਕਾਲੀ ਦਲ ਵਿੱਚ ਸ਼ਾਮਲ ਹੋ ਗਿਆ। ਤਲਵੰਡੀ ਸਾਬੋ ਤੋਂ ਚੋਣ ਜਿੱਤ ਕੇ ਪੰਜਾਬ ਵਿੱਚ ਖੇਤੀਬਾੜੀ ਮੰਤਰੀ ਰਿਹ। ਅਪ੍ਰੇਸ਼ਨ ਬਲੈਕ ਥੰਡਰ ਦੇ ਵਿਰੋਧ ਵਿੱਚ 1992 ਵਿੱਚ ਫ਼ਿਰ ਅਸਤੀਫ਼ਾ ਦਿੱਤਾ ਅਤੇ ਆਪਣਾ ਵੱਖਰਾ ਅਕਾਲੀ ਦਲ ਪੰਥਕ ਬਣਾ ਲਿਆ। 1998 ਵਿੱਚ ਇਹ ਅਕਾਲੀ ਦਲ ਕਾਂਗਰਸ ਵਿੱਚ ਸ਼ਾਮਲ ਹੋ ਗਿਆ। 1998 ਵਿੱਚ ਹੀ ਕੈਪਟਨ ਅਮਰਿੰਦਰ ਸਿੰਘ ਪ੍ਰੇਮ ਸਿੰਘ ਚੰਦੂਮਾਜਰਾ ਹੱਥੋਂ ਲੋਕ ਸਭਾ ਦੀ ਚੋਣ ਹਾਰਿਆ। 1999 ਤੋਂ 2002 ਅਤੇ 2010 ਤੋਂ 2013 ਤੱਕ ਕੈਪਟਨ ਸਾਹਿਬ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਰਹੇ। 2002-2007 ਤੱਕ ਪੰਜਾਬ ਦੇ ਮੁੱਖ ਮੰਤਰੀ ਰਹਿਣ ਤੋਂ ਇਲਾਵਾ ਕੈਪਟਨ ਨੂੰ 16ਵੀਂ ਲੋਕ ਸਭਾ ਵਿੱਚ ਕਾਂਗਰਸ ਪਾਰਟੀ ਵੱਲੋਂ ਡਿਪਟੀ ਲੀਡਰ ਨਿਯੁਕਤ ਕੀਤਾ ਗਿਆ। ਲੋਕ ਸਭਾ ਵਿੱਚ ਪਹੁੰਚਣ ਲਈ ਕੈਪਟਨ ਨੇ ਦੇਸ਼ ਦੇ ਮੌਜੂਦਾ ਵਿੱਤ ਮੰਤਰੀ ਅਰੁਬਣ ਜੇਤਲੀ ਨੂੰ ਅੰਮ੍ਰਿਤਸਰ ਤੋਂ ਹਰਾਇਆ ਸੀ। ਇਸ ਤੋਂ ਇਲਾਵਾ ਕੈਪਟਨ ਅਮਰਿੰਦਰ ਸਿੰਘ ਸਮਾਣਾ, ਤਲਵੰਡੀ ਸਾਬੋ ਅਤੇ ਪਟਿਆਲਾ ਸ਼ਹਿਰੀ ਤੋਂ 7 ਵਾਰ ਐਮ. ਐਲ. ਏ. ਰਹਿ ਚੁੱਕੇ ਹਨ। ਚਾਰ ਪੁਸਤਕਾਂ ਦੇ ਲੇਖਕ ਕੈਪਟਨ ਸਾਹਿਬ ਆਲ ਇੰਡੀਆ ਜੱਟ ਮਹਾਂਸਭਾ ਦੇ ਪ੍ਰਧਾਨ ਵੀ ਹਨ।
ਸੋ, ਜੇ ਕਾਂਗਰਸ ਪਾਰਟੀ ਸੱਤਾ ਵਿੱਚ ਆਉਂਦੀ ਹੈ ਤਾਂ ਕੈਪਟਨ ਅਮਰਿੰਦਰ ਸਿੰਘ ਦਾ ਮੁੱਖ ਮੰਤਰੀ ਬਣਨਾ ਤੈਅ ਹੈ। ਇਹ ਗੱਲ ਤਾਂ ਸਪਸ਼ਟ ਹੈ ਕਿ ਪੰਜਾਬ ਕਾਂਗਰਸ ਵਿੱਚ ਧੜੇਬੰਦੀ ਹੋਣ ਦੇ ਬਾਵਜੂਦ ਕੈਪਟਨ ਜਿੰਨਾ ਕੋਈ ਹੋਰ ਸ਼ਕਤੀਸ਼ਾਲੀ ਲੀਡਰ ਨਹੀਂ। ਪ੍ਰਤਾਪ ਸਿੰਘ ਬਾਜਵਾ ਅਤੇ ਰਾਜਿੰਦਰ ਕੌਰ ਭੱਠਲ ਮੌਜੂਦਾ ਸਥਿਤੀ ਵਿੱਚ ਉਨੇ ਸ਼ਕਤੀਸ਼ਾਲੀ ਨਹੀਂ ਹਨ ਜਿੰਨੇ ਕਦੇ ਸਨ। ਰਾਜਿੰਦਰ ਕੌਰ ਭੱਠਲ ਦਾ ਮੁਕਾਬਲਾ ਇਸ ਵਾਰ ਲਹਿਰਾਗਾਗਾ ਤੋਂ ਪਰਮਿੰਦਰ ਸਿੰਘ ਢੀਂਡਸਾ ਨਾਲ ਹੈ ਜਿਸ ਦੀ ਗੁਪਤ ਮਦਦ ਨਾਲ ਉਹ ਜਿੱਤਦੀ ਰਹੀ ਹੈ। ਬੀਬੀ ਭੱਠਲ ਦੇ ਸੀਟ ਬਦਲਣ ਲਈ ਲਾਏ ਜ਼ੋਰ ਦੇ ਬਾਵਜੂਦ ਕੈਪਟਨ ਨੇ ਉਸ ਨੂੰ ਲਹਿਰਾਗਾਗਾ ਵਿੱਚ ਹੀ ਉਲਝਾ ਦਿੱਤਾ ਹੈ। ਜਗਮੀਤ ਸਿੰਘ ਬਰਾੜ ਅਤੇ ਬੀਰਦਵਿੰਦਰ ਸਿੰਘ ਨੂੰ ਪਹਿਲਾਂ ਹੀ ਬਾਹਰ ਦਾ ਰਸਤਾ ਦਿਖਾ ਦਿੱਤਾ ਗਿਆ ਹੈ। ਇਹ ਵੀ ਕਿਹਾ ਜਾਂਦਾ ਹੈ ਕਿ ਰਾਹੁਲ ਗਾਂਧੀ ਨਵਜੋਤ ਸਿੱਧੂ ਨੂੰ ਵਿਧਾਨ ਸਭਾ ਚੋਣ ਲੜਾ ਕੇ ਸ਼ਕਤੀਸ਼ਾਲੀ ਬਣਾਉਣਾ ਚਾਹੁੰਦੇ ਹਨ। ਪਰ ਇਸਦੇ ਬਾਵਜੂਦ ਪੰਜਾਬ ਕਾਂਗਰਸ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਦੇ ਮੁਕਾਬਲੇ ਦਾ ਕੋਈ ਹੋਰ ਨਹੀਂ। ਸੋ ਕੈਪਟਨ ਹੀ ਹੈ ਕਾਂਗਰਸ ਦਾ ਸੰਭਾਵੀ ਮੁੱਖ ਮੰਤਰੀ।
(2) ਸ. ਪ੍ਰਕਾਸ਼ ਸਿੰਘ ਬਾਦਲ
8 ਦਸੰਬਰ 1927 ਨੂੰ ਮਲੋਟ ਦੇ ਲਾਗੇ ਸ. ਰਘੂਰਾਜ ਸਿੰਘ ਢਿੱਲੋਂ ਦੇ ਘਰ ਪੈਦਾ ਹੋਏ। ਸ. ਬਾਦਲ ਨੇ 20 ਸਾਲ ਦੀ ਉਮਰ ਵਿੱਚ ਸਿਆਸਤ ਸਰਪੰਚੀ ਤੋਂ ਸ਼ੁਰੂ ਕਰਕੇ 43 ਸਾਲ ਦੀ ਉਮਰ ਵਿੱਚ ਮੁੱਖ ਮੰਤਰੀ ਦੇ ਅਹੁਦੇ ਤੱਕ ਪਹੁੰਚ ਕਰ ਲਈ ਸੀ। ਉਹ 1957 ਵਿੱਚ ਪਹਿਲੀ ਵਾਰ ਵਿਧਾਇਕ ਬਣੇ। ਬਾਦਲ ਸਾਹਿਬ 1970-71, 1977-80, 1997-2002, 2007-2012 ਅਤੇ 2012 ਵਿੱਚ ਪੰਜਾਬ ਦੇ ਮੁੱਖ ਮੰਤਰੀ ਬਣੇ। 89 ਵਰ੍ਹਿਆਂ ਦੇ (ਸਮੇਤ ਕੈਪਟਨ ਅਮਰਿੰਦਰ ਸਿੰਘ ਕਈ ਬੰਦੇ ਪ੍ਰਕਾਸ਼ ਸਿੰਘ ਬਾਦਲ ਦੀ ਉਮਰ 93 ਤੋਂ ਵੱਧ ਦੱਸਦੇ ਹਨ) ਪ੍ਰਕਾਸ਼ ਸਿੰਘ ਬਾਦਲ ਦੇਸ਼ ਵਿੱਚ ਸਭ ਤੋਂ ਛੋਟੀ ਉਮਰ ਅਤੇ ਸਭ ਤੋਂ ਵੱਡੀ ਉਮਰ ਦੇ ਮੁੱਖ ਮੰਤਰੀ ਹੋਣ ਦਾ ਰਿਕਾਰਡ ਕਾਇਮ ਕੀਤਾ ਹੈ। ਉਹ ਕੁਝ ਸਮੇਂ ਲਈ ਕੇਂਦਰ ਵਿੱਚ ਵੀ ਮੰਤਰੀ ਰਹੇ। ਮੁੱਖ ਮੰਤਰੀ ਦਾ ਸਾਰਾ ਪਰਿਵਾਰ ਸਿਆਸਤ ਵਿੱਚ ਹੈ। ਪੁੱਤਰ ਸੁਖਬੀਰ ਸਿੰਘ ਬਾਦਲ ਸ਼੍ਰੋਮਣੀ ਅਕਾਲੀ ਦਲ ਦਾ ਪ੍ਰਧਾਨ ਹੋਣ ਦੇ ਨਾਲ ਨਾਲ ਰਾਜ ਦਾ ਉਪ ਮੁੱਖ ਮੰਤਰੀ ਵੀ ਹੈ। ਨੂੰਹ ਹਰਸਿਮਰਤ ਕੌਰ ਬਾਦਲ ਮੋਦੀ ਮੰਤਰੀ ਮੰਡਲ ਵਿੱਚ ਕੈਬਨਿਟ ਮੰਤੀ ਹੈ। ਜਵਾਈ ਆਦੇਸ਼ ਪ੍ਰਤਾਪ ਸਿੰਘ ਪੰਜਾਬ ਮੰਤਰੀ ਮੰਡਲ ਵਿੱਚ ਸੀਨੀਅਰ ਮੰਤਰੀ ਹੈ। ਭਤੀਜਾ ਮਨਪ੍ਰੀਤ ਸਿੰਘ ਬਾਦਲ ਪੰਜਾਬ ਦਾ ਵਿੱਤ ਮੰਤਰੀ ਰਿਹਾ ਹੈ ਅਤੇ ਅੱਜਕਲ੍ਹ ਕਾਂਗਰਸ ਪਾਰਟੀ ਵੱਲੋਂ ਚੋਣ ਲੜ ਰਿਹਾ ਹੈ। ਭਰਾ ਗੁਰਦਾਸ ਸਿੰਘ ਬਾਦਲ ਵੀ ਮੈਂਬਰ ਪਾਰਲੀਮੈਂਟ ਰਿਹਾ ਹੈ। ਪ੍ਰਕਾਸ਼ ਸਿੰਘ ਬਾਦਲ ਨੇ ਭਾਰਤੀ ਜਨਤਾ ਪਾਰਟੀ ਨਾਲ ਗੱਠਜੋੜ ਕਰਕੇ ਇਹ ਪ੍ਰਭਾਵ ਦਿੱਤਾ ਕਿ ਉਹ ਰਾਜ ਵਿੱਚ ਹਿੰਦੂ-ਸਿੱਖ ਏਕਤਾ ਦੇ ਹਾਮੀ ਹਨ। ਉਹਨਾਂ ਦੀ ਇਸ ਨੀਤੀ ਨੂੰ ਭਰਪੂਰ ਹੁੰਗਾਰਾ ਮਿਲਣ ਕਾਰਨ ਉਹ ਲਗਾਤਾਰ 10 ਸਾਲਾਂ ਤੋਂ ਸੱਤਾ ਦਾ ਆਨੰਦ ਮਾਣ ਰਹੇ ਹਨ। ਦੇਸ਼ ਦੇ ਅਮੀਰ ਸਿਆਸੀ ਪਰਿਵਾਰਾਂ ਵਿੱਚੋਂ ਇਕ ਬਾਦਲ ਪਰਿਵਾਰ ਹੁਣ ਲਗਾਤਾਰ ਤੀਜੀ ਸਿਆਸੀ ਪਾਰੀ ਖੇਡਣ ਲਈ ਤਿਆਰ ਹੈ।
ਜੇਕਰ ਅਕਾਲੀ ਦਲ ਮੁੜ ਸੱਤਾ ਵਿੱਚ ਆਉਂਦਾ ਹੈ ਤਾਂ ਪ੍ਰਕਾਸ਼ ਸਿੰਘ ਬਾਦਲ ਛੇਵੀਂ ਵਾਰ ਮੁੱਖ ਮੰਤਰੀ ਬਣਨ ਦਾ ਰਿਕਾਰਡ ਬਣਾਉਣਗੇ। ਪੰਜਾਬ ਦੀਆਂ ਸਾਰੀਆਂ ਸਿਆਸੀ ਪਾਰਟੀਆਂ ਵਿੱਚ ਸ਼੍ਰੋਮਣੀ ਅਕਾਲੀ ਦਲ ਅਜਿਹੀ ਪਾਰਟੀ ਹੈ ਜਿਸ ਵਿੱਚ ਟਿਕਟਾਂ ਦੀ ਵੰਡ ਤੋਂ ਬਾਅਦ ਕੋਈ ਬਗ਼ਾਵਤ ਨਜ਼ਰ ਨਹੀਂ ਆਈ। ਅਕਾਲੀ ਦਲ ਦੇ ਮੁਕਾਬਲੇ ਆਮ ਆਦਮੀ ਪਾਰਟੀ ਵਿੱਚ ਵੱਡੇ ਪੱਧਰ ‘ਤੇ ਬਗ਼ਾਵਤ ਨਜ਼ਰ ਆ ਰਹੀ ਹੈ। ਕਾਂਗਰਸ ਵਿੱਚ ਟਿਕਟਾਂ ਨੂੰ ਲੈ ਕੇ ਕਈ ਹਲਕਿਆਂ ਵਿੱਚ ਅਸੰਤੁਸ਼ਟੀ ਦੇਖਣ ਨੂੰ ਮਿਲੀ ਹੈ। ਦੂਜੇ ਪਾਸੇ ਅਜੇ ਕਾਂਗਰਸ ਦੀਆਂ ਅੱਧੀਆਂ ਸੀਟਾਂ ਬਾਰੇ ਫ਼ੈਸਲਾ ਹੋਣਾ ਬਾਕੀ ਹੈ। ਟਿਕਟਾਂ ਦੇ ਐਲਾਨ ਤੋਂ ਪਹਿਲਾਂ ਹੀ ਕਈ ਹਲਕਿਆਂ ਵਿੱਚ ਬਾਗ਼ੀ ਸੁਰਾਂ ਸੁਣਨ ਨੂੰ ਮਿਲ ਰਹੀਆਂ ਹਨ। ਨਸ਼ੇ, ਬੇਅਦਬੀ ਦੀਆਂ ਘਟਨਾਵਾਂ ਅਤੇ ਕਿਸਾਨ ਖ਼ੁਦਕੁਸ਼ੀਆਂ ਵਰਗੇ ਮੁੱਦੇ ਸੱਤਾਧਾਰੀ ਧਿਰ ਨੂੰ ਰੱਖਿਆਤਮਕ ਸਥਿਤੀ ਵਿੱਚ ਲੈ ਆਉਂਦੇ ਹਨ। ਨੋਟਬੰਦੀ ਦਾ ਅਸਰ ਵੀ ਭਾਰਤੀ ਜਨਤਾ ਪਾਰਟੀ-ਸ਼੍ਰੋਮਣੀ ਅਕਾਲੀ ਦਲ ਦੀ ਮੁਹਿੰਮ ‘ਤੇ ਪੈਣਾ ਲਾਜ਼ਮੀ ਹੈ। ਦੂਜੇ ਪਾਸੇ ਪੰਜਾਬ ਵਿੱਚ ਸੱਤਾਧਾਰੀ ਧਿਰ ਵੱਲੋਂ 27000 ਕੱਚੇ ਮੁਲਾਜ਼ਮਾਂ ਨੂੰ ਪੱਕੇ ਕਰਨ ਲਈ ਵਿਸ਼ੇਸ਼ ਇਜਲਾਸ ਬੁਲਾ ਕੇ ਬਿਲ ਪਾਸ ਕਰਨਾ ਅਤੇ ਹੋਰ ਕਈ ਲੁਭਾਉਣੇ ਫ਼ੈਸਲੇ ਜੇ ਫ਼ਿਰ ਸ਼੍ਰੋਮਣੀ ਅਕਾਲੀ ਦਲ-ਭਾਰਤੀ ਜਨਤਾ ਪਾਰਟੀ ਨੂੰ ਬਹੁਮਤ ਦੇ ਦਿੰਦੇ ਹਨ ਤਾਂ ਸ. ਪ੍ਰਕਾਸ਼ ਸਿੰਘ ਬਾਦਲ ਮੁੱਖ ਮੰਤਰੀ ਹੋਣਗੇ।ਇਹ ਵੀ ਕਿਆਸ ਅਰਾਈਆਂ ਲਗਾਈਆਂ ਜਾ ਰਹੀਆਂ ਹਨ ਕਿ ਵੱਡੀ ਉਮਰ ਨੂੰ ਵੇਖਦੇ ਹੋਏ ਇਸ ਵਾਰ ਬਾਦਲ ਸਾਹਿਬ ਆਰਾਮ ਕਰਨਗੇ। ਅਜਿਹੇ ਹਾਲਾਤ ਵਿੱਚ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਬਾਦਲ ਆਪਣੇ ਪਿਤਾ ਦਾ ਬਦਲ ਹੋ ਸਕਦੇ ਹਨ। ਇਹ ਵੀ ਕਿਹਾ ਜਾਂਦਾ ਹੈ ਕਿ ਉਪ ਮੁੱਖ ਮੰਤਰੀ ਰਹਿੰਦੇ ਹੋਏ ਸੁਖਬੀਰ ਸਿੰਘ ਬਾਦਲ ਨੇ ਲੋੜੀਂਦਾ ਤਜਰਬਾ ਹਾਸਲ ਕਰ ਲਿਆ ਹੈ। ਵਿਕਾਸ ਦੇ ਮੁੱਦੇ ਨੂੰ ਲੈ ਕੇ ਚੋਣਾਂ ਲੜ ਰਹੀ ਸੱਤਾਧਾਰੀ ਧਿਰ ਵਿੱਚ ਵਿਸ਼ਵਾਸ ਦੀ ਕਮੀ ਨਜ਼ਰ ਨਹੀਂ ਆਉਂਦੀ। ਦੂਜੇ ਪਾਸੇ ਪ੍ਰਕਾਸ਼ ਸਿੰਘ ਬਾਦਲ ਆਪਣੀ ਸੁਭਾਵਿਕ ਆਦਤ ਅਨੁਸਾਰ ਚੋਣ ਮੁਹਿੰਮ ਵਿੱਚ ਸਰਗਰਮ ਹਨ। ਇਸੇ ਕਾਰਨ ਅਜੇ ਵੀ ਸ਼੍ਰੋਮਣੀ ਅਕਾਲੀ ਦਲ-ਭਾਜਪਾ ਗੱਠਜੋੜ ਦੇ ਮੁੱਖ ਮੰਤਰੀ ਦੇ ਸੰਭਾਵੀ ਦਾਅਵੇਦਾਰ ਪ੍ਰਕਾਸ਼ ਸਿੰਘ ਬਾਦਲ ਹੀ ਹਨ।
(3) ਅਰਵਿੰਦ ਕੇਜਰੀਵਾਲ
ਪੰਜਾਬ ਵਿਧਾਨ ਸਭਾ ਦੀ ਫ਼ਰਵਰੀ 2017 ਦੀਆਂ ਚੋਣਾਂ ਵਿੱਚ ਜੇ ਆਮ ਆਦਮੀ ਪਾਰਟੀ ਦਾ ਬਹੁਮਤ ਆਉਂਦਾ ਹੈ ਤਾਂ ਪਾਰਟੀ ਵੱਲੋਂ ਮੁੱਖ ਮੰਤਰੀ ਦਾ ਤਾਜ ਕਿਸਦੇ ਸਿਰ ‘ਤੇ ਸਜੇਗਾ? ਇਸ ਸਵਾਲ ਦਾ ਜਵਾਬ ਥੋੜ੍ਹਾ ਮੁਸ਼ਕਿਲ ਹੈ। ਇਹ ਗੱਲ ਤਾਂ ਸੱਚ ਹੈ ਕਿ ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਇਹ ਚੋਣਾਂ ਆਪਣੇ ਨੈਸ਼ਨਲ ਕਨਵੀਨਰ ਅਰਵਿੰਦ ਕੇਜਰੀਵਾਲ ਦੀ ਕਮਾਂਡ ਥੱਲੇ ਅਤੇ ਨਾਮ ਥੱਲੇ ਲੜ ਰਹੀ ਹੈ। 16 ਅਗਸਤ 1968 ਨੂੰ ਹਰਿਆਣਾ ਦੇ ਭਵਾਨੀ ਜ਼ਿਲ੍ਹੇ ਵਿੱਚ ਪੈਦਾ ਹੋਏ ਅਰਵਿੰਦ ਨੇ ਸਕੂਲ ਸਿੱਖਿਆ ਹਿਸਾਬ ਅਤੇ ਸੋਨੀਪਤ ਵਿੱਚ ਲਈ। ਆਈ. ਆਈ. ਟੀ. ਖੜਗਪੁਰ ਤੋਂ ਬੀ. ਟੈਕ ਕਰਨ ਤੋਂ ਬਾਅਦ ਅਰਵਿੰਦ ਕੇਜਰੀਵਾਲ ਨੇ ਪ੍ਰਸ਼ਾਸਕੀ ਸੇਵਾਵਾਂ ਦੀ ਪ੍ਰੀਖਿਆ ਪਾਸ ਕਰਕੇ ਆਈ. ਆਰ. ਐਸ. ਅਫ਼ਸਰ ਦੇ ਤੌਰ ‘ਤੇ ਨੌਕਰੀ ਆਰੰਭ ਕੀਤੀ। ਅਰਵਿੰਦ ਕੇਜਰੀਵਾਲ ਦੀ ਪਤਨੀ ਵੀ ਆਈ. ਆਰ. ਐਸ. ਅਫ਼ਸਰ ਹੈ। ਅੰਨਾ ਹਜਾਰੇ ਦੀ ਮੁਹਿੰਮ ਵਿੱਚ ਸ਼ਾਮਲ ਹੋਣ ਤੋਂ ਪਹਿਲਾਂ ਕੇਜਰੀਵਾਲ ਨੇ ‘ਪਰਿਵਰਤਨ’ ਨਾਮ ਦੀ ਗੈਰ ਸਰਕਾਰੀ ਸੰਸਥਾ ਰਾਹੀਂ ਆਪਣੇ ਆਪ ਨੂੰ ਸਮਾਜ ਸੇਵਾ ਲਈ ਅਰਪਿਤ ਕਰ ਦਿੱਤਾ ਸੀ। ਇਸੇ ਸੇਵਾ ਕਾਰਨ ਉਨ੍ਹਾਂ ਨੂੰ ਮੈਗਾਸੇ ਐਵਾਰਡ ਵੀ ਮਿਲਿਆ ਸੀ। ‘ਪਰਿਵਰਤਨ’ ਰਾਹੀਂ ਉਨ੍ਹਾਂ ਭ੍ਰਿਸ਼ਟਾਚਾਰ ਦੇ ਖਿਲਾਫ਼ ਮੁਹਿੰਮ ਨੂੰ ਚੰਗਾ ਹੁੰਗਾਰਾ ਮਿਲਿਆ। ਫ਼ਿਰ ਲੋਕਪਾਲ ਮੁਹਿੰਮ ਤੋਂ ਬਾਅਦ ਅਰਵਿੰਦ ਨੇ ਫ਼ਰਵਰੀ 2012 ਵਿੱਚ ਆਪਣੀ ਸਿਆਸੀ ਪਾਰਟੀ ‘ਆਮ ਆਦਮੀ ਪਾਰਟੀ’ ਬਣਾਈ। ਦਸੰਬਰ 2013 ਤੋਂ ਫ਼ਰਵਰੀ 2014 ਤੱਕ ਅਰਵਿੰਦ ਕੇਜਰੀਵਾਲ ਦਿੱਲੀ ਦੇ ਮੁੱਖ ਮੰਤਰੀ ਰਹੇ। 49 ਦਿਨਾਂ ਦੀ ਸਰਕਾਰ ਤੋਂ ਬਾਅਦ ਕੇਜਰੀਵਾਲ ਨੇ ਫ਼ਰਵਰੀ 2015 ਵਿੱਚ 70 ਵਿੱਚੋਂ 67 ਸੀਟਾਂ ਜਿੱਤ ਕੇ ਮੁੜ ਸਰਕਾਰ ਬਣਾਈ।
ਦਿੱਲੀ ਦੇ ਦੂਜੀ ਵਾਰ ਬਣੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਹੁਣ ਪੰਜਾਬ ਨੂੰ ਜਿੱਤਣਾ ਚਾਹੁੰਦੇ ਹਨ। ਇਹ ਕਿਹਾ ਜਾਂਦਾ ਹੈ ਕਿ ਕੇਜਰੀਵਾਲ ਪੰਜਾਬ ਦੇ ਮੁੱਖ ਮੰਤਰੀ ਬਣਨਾ ਚਾਹੁੰਦੇ ਹਨ। ਪੰਜਾਬ ਅਤੇ ਗੋਆ ਨੂੰ ਜਿੱਤ ਕੇ ਉਹ ਕੌਮੀ ਨੇਤਾ ਦੇ ਤੌਰ ‘ਤੇ ਸ਼ਾਖ ਬਣਾਉਣੀ ਚਾਹੁੰਦੇ ਹਨ। ਪੰਜਾਬ ਦੇ ਲੋਕ ਤਬਦੀਲੀ ਚਾਹੁੰਦੇ ਹਨ। 2014 ਵਿੱਚ ਪੰਜਾਬ ਨੇ ਆਮ ਆਦਮੀ ਪਾਰਟੀ ਦੇ ਚਾਰ ਲੋਕ ਸਭਾ ਮੈਂਬਰ ਜਿਤਾਏ ਸਨ। ਇਸੇ ਤੋਂ ਪ੍ਰੇਰਿਤ ਹੋਕੇ ਆਮ ਆਦਮੀ ਪਾਰਟੀ ਪੰਜਾਬ ਵਿੱਚ ਆਪਣੀ ਸਰਕਾਰ ਬਣਾਉਣ ਦੇ ਦਾਅਵੇਦਾਰ ਬਣ ਰਹੇ ਹਨ। ਹਾਲਾਂਕਿ ਪੰਜਾਬ ਦੀ ‘ਆਪ’ ਬੁਰੀ ਤਰ੍ਹਾ ਫ਼ੁੱਟ ਦੀ ਸ਼ਿਕਾਰ ਹੋ ਚੁੱਕੀ ਹੈ। ਸੁੱਚਾ ਸਿੰਘ ਛੋਟੇਪੁਰ, ਡਾ. ਧਰਮਵੀਰ ਗਾਂਧੀ ਅਤੇ ਪ੍ਰੋ. ਮਨਜੀਤ ਸਿੰਘ ਆਪੋ ਆਪਣੇ ਧੜਿਆਂ ਰਾਹੀਂ ਸਿਆਸਤ ਕਰ ਰਹੇ ਹਨ। ਅਰਵਿੰਦ ਕੇਜਰੀਵਾਲ ਅਤੇ ਭਗਵੰਤ ਮਾਨ ਦੀਆਂ ਰੈਲੀਆਂ ਵਿੱਚ ਹੋ ਰਹੇ ਇਕੱਲ ਵੀ ‘ਆਪ’ ਨੂੰ ਚੜ੍ਹਦੀਕਲਾ ਵਿੱਚ ਲੈ ਕੇ ਜਾਂਦੇ ਹਨ। ਦੂਜੇ ਪਾਸੇ ਟਿਕਟਾਂ ਦੀ ਵੰਡ ਤੋਂ ਬਾਅਦ ਪਾਰਟੀ ਵਿੱਚ ਥਾਂ-ਥਾਂ ‘ਤੇ ਬਗਾਵਤੀ ਸੁਰਾਂ ਉਠ ਰਹੀਆਂ ਹਨ। ਸੰਜੇ ਸਿੰਘ ਅਤੇ ਦੁਰਗੇਸ਼ ਪਾਠਕ ‘ਤੇ ਟਿਕਟਾਂ ਦੀ ਵੰਡ ਸਮੇਂ ਵੱਡੇ ਪੱਧਰ ‘ਤੇ ਪੈਸੇ ਇਕੰਠੇ ਕਰਨ ਦੇ ਵੀ ਇਲਜ਼ਾਮ ਹਨ। ਇਸਦੇ ਬਾਵਜੂਦ ਪਾਰਟੀ ਨੂੰ ਆਪਣੀ ਜਿੱਤ ‘ਤੇ ਪੂਰਾ ਯਕੀਨ ਹੈ। ਜੇ ਪਾਰਟੀ ਜਿੱਤ ਜਾਂਦੀ ਹੈ ਤਾਂ ਮੁੱਖ ਮੰਤਰੀ ਲਈ ਪਾਰਟੀ ਦੀ ਪਹਿਲੀ ਪਸੰਦ ਅਰਵਿੰਦ ਕੇਜਰੀਵਾਲ ਹੀ ਹੋਣਗੇ।ਗੈਰ ਪੰਜਾਬੀ ਹੋਣਾ ਅਰਵਿੰਦ ਕੇਜਰੀਵਾਲ ਦੇ ਖਿਲਾਫ਼ ਜਾਂਦਾ ਹੈ। ਜੇ ਇਸ ਗੱਲ ਨੂੰ ਮੰਨ ਲਿਆ ਗਿਆ ਤਾਂ ਐਡਵੋਕੇਟ ਹਰਵਿੰਦਰ ਸਿੰਘ ਫ਼ੂਲਕਾ, ਭਗਵੰਤ ਮਾਨ, ਗੁਰਪ੍ਰੀਤ ਸਿੰਘ ਘੁੱਗੀ ਅਤੇ ਜਰਨੈਲ ਸਿੰਘ ਆਦਿ ਕਿੰਨੇ ਨੇਤਾ ਲਾਈਨ ਵਿੱਚ ਲੱਗੇ ਖੜ੍ਹੇ ਹਨ। ਕਿਸੇ ਵੀ ਨਾਮ ‘ਤੇ ਸਰਬ ਸੰਮਤੀ ਹੋਣਾ ਮੁਸ਼ਕਿਲ ਜਾਪਦਾ ਹੈ। ਇਸੇ ਕਾਰਨ ‘ਆਪ’ ਸੰਭਾਵੀ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਹੀ ਲੱਗਦੇ ਹਨ।

ਮੈਂ ਫ਼ਿਰ ਕੈਨੇਡਾ ਆਇਆ-10

ਸੈਕਸਾਟੂਨ ਤੋਂ ਟਰਾਂਟੋ ਜਾਣ ਦੀ ਤਿਆਰੀ ਸੀ। ਸੈਕਸਾਟੂਨ ਤੋਂ 7 ਵਜੇ ਫ਼ਲਾਈਟ ਸੀ ਅਤੇ ਸਵਾ ਕੁ ਛੇ ਏਅਰਪੋਰਟ ‘ਤੇ ਪਹੁੰਚੇ। ਮੇਰੀ ਪਤਨੀ ਦਾ ਆਪਣੇ ਦੋ ਕੁ ਮਹੀਨੇ ਦੇ ਪੋਤੇ ਨੂੰ ਛੱਡ ਕੇ ਜਾਣ ਦਾ ਉੱਕਾ ਹੀ ਨਹੀਂ ਦਿਲ ਸੀ। ਭਰੇ ਮਨ ਨਾਲ ਜਦੋਂ ਏਅਰਪੋਰਟ ‘ਤੇ ਚੈਕਿੰਗ ਕਰਨ ਲੱਗੇ ਤਾਂ ਜਵਾਬ ਮਿਲ ਗਿਆ। ਅਸੀਂ ਲੇਟ ਪਹੁੰਚੇ ਸਾਂ, ਹੁਣ ਆਪਣੇ ਸਮਾਨ ਸਮੇਤ ਕਿਸੇ ਹੋਰ ਫ਼ਲਾਈਟ ਵਿੱਚ ਹੀ ਜਾ ਸਕਦੇ ਸਾਂ। ਅਗਲੀ ਉਡਾਣ ਤਿੰਨ ਘੰਟੇ ਬਾਅਦ ਸੀ ਸੋ ਮੁੜ ਘਰ ਪਹੁੰਚ ਗਏ। ਸਾਨੂੰ ਦੱਸਿਆ ਗਿਆ ਕਿ ਘਰੇਲੂ ਉਡਾਣਾਂ ਲਈ ਘੱਟੋ ਘੱਟ 45 ਮਿੰਟ ਪਹਿਲਾਂ ਪਹੁੰਚਣਾ ਜ਼ਰੂਰੀ ਹੁੰਦਾ ਹੈ ਅਤੇ ਕੌਮਾਂਤਰੀ ਉਡਾਣ ਲਈ ਇਕ ਘੰਟਾ। ਖੈਰ, ਅਗਲੀ ਉਡਾਣ ਵਿੱਚ ਜਦੋਂ ਟਰਾਂਟੋ ਪਹੁੰਚੇ ਤਾਂ ਰਾਤ ਦੇ ਦੋ ਵੱਜ ਚੁੱਕੇ ਸਨ। ਅਗਲੇ ਦਿਨ ਮੇਰਾ ‘ਅਜੀਤ ਵੀਕਲੀ’ ਪਹੁੰਚਣ ਦਾ ਪ੍ਰੋਗਰਾਮ ਸੀ। ਇਸ ਸਬੰਧੀ ਮੈਂ ਪਹਿਲਾਂ ਹੀ ਸ੍ਰੀਮਤੀ ਕੰਵਲਜੀਤ ਬੈਂਸ ਹੋਰਾਂ ਕੋਲੋਂ ਟਾਈਮ ਲੈ ਰੱਖਿਆ ਸੀ। ਮੇਰਾ ਬੈਂਸ ਪਰਿਵਾਰ ਨਾਲ ਪੁਰਾਣਾ ਰਿਸ਼ਤਾ ਹੈ। ਡਾ. ਦਰਸ਼ਨ ਸਿੰਘ ਬੈਂਸ ਦੇ ਤੁਰ ਜਾਣ ਦਾ ਗਮ ਅਜੇ ਤਾਜ਼ਾ ਹੀ ਸੀ ਕਿ ਪਰਿਵਾਰ ਨੂੰ ਬਿੰਨੀ ਬੈਂਸ ਦੇ ਦੇਹਾਂਤ ਨਾਲ ਇਕ ਹੋਰ ਵੱਡੇ ਦੁੱਖ ਸੰਕਟ ਦਾ ਸਾਹਮਣਾ ਕਰਨਾਂ ਪੈ ਰਿਹਾ ਸੀ। ਭਰ ਜਵਾਨੀ ਵਿੱਚ ਆਪਣੇ ਛੋਟੇ ਪੁੱਤਰ ਦੇ ਤੁਰ ਜਾਣ ‘ਤੇ ਕੰਵਲਜੀਤ ਬੈਂਸ ਦੇ ਇਸ ਦਿਲ ‘ਤੇ ਕੁਦਰਤ ਦਾ ਕਹਿਰ ਟੁੱਟ ਪਿਆ ਸੀ। ਇਹਨਾਂ ਦੋ ਵੱਡੀਆਂ ਸੱਟਾਂ ਦੇ ਬਾਵਜੂਦ ਸ੍ਰੀਮਤੀ ਬੈਂਸ ਅਤੇ ਸਨੀ ਬੈਂਸ ਵਾਹਿਗੁਰੂ ਦਾ ਭਾਣਾ ਮੰਨ ਕੇ ਵੱਡੇ ਜਿਗਰੇ ਨਾਲ ਹਾਲਾਤ ਦਾ ਮੁਕਾਬਲਾ ਕਰਨ ਲਈ ਹਿੰਮਤ ਜੁਟਾ ਰਹੇ ਸਨ। ਇਸ ਮੌਕੇ ਮੈਂ ਪਰਿਵਾਰ ਦੇ ਦੁੱਖ ਵਿੱਚ ਸ਼ਰੀਕ ਹੋਣਾ ਚਾਹੁੰਦਾ ਸੀ। ਅਜਿਹੇ ਮੌਕੇ ਅਸੀਂ ‘ਰੱਬ ਦਾ ਭਾਣਾ’ ਮੰਨਣ ਤੋਂ ਬਿਨਾਂ ਕਰ ਤਾਂ ਕੁਝ ਨਹੀਂ ਸਕਦੇ ਸੀ ਪਰ ਜਾਣ ਵਾਲੇ ਨੂੰ ਯਾਦ ਕਰਕੇ ਆਪਣੇ ਦਿਲਾਂ ਨੂੰ ਕੁਝ ਧਰਵਾਸ ਦੇ ਲੈਂਦੇ ਹਾਂ। ਕੁਝ ਇਸ ਤਰ੍ਹਾਂ ਦੇ ਅਹਿਸਾਸ ਲੈ ਕੇ ਮੈਂ ਅਜੀਤ ਵੀਕਲੀ ਦੇ ਦਫ਼ਤਰ ਨਿਸਚਿਤ ਵਕਤ ਤੇ ਪਹੁੰਚ ਗਿਆ ਸਾਂ। ਇੱਥੋਂ ਮੈਨੂੰ ਲੈਣ ਕੁਲਵਿੰਦਰ ਸੈਣੀ ਆ ਚੁੱਕਾ ਸੀ।
”ਬਾਬਾ ਜੀ, ਮੈਂ ਗੁਰਦਿਆਲ ਬੱਲ ਬੋਲ ਰਿਹਾ ਹਾਂ। ਮੈਂ ਤੁਹਾਨੂੰ ਮਿਲਣ ਆਇਆ ਹਾਂ ਅਤੇ ਅਜੀਤ ਵੀਕਲੀ ਦੇ ਪਿਛਲੇ ਪਾਸੇ ਅਖਬਾਰ ਦੇ ਦਫ਼ਤਰ ਵਿੱਚ ਬੈਠਾ ਹਾਂ।” ਗੁਰਦਿਆਲ ਬੱਲ ਦਾ ਫ਼ੋਨ ਆਉਂਦਾ ਹੈ। ਗੁਰਦਿਆਲ ਬੱਲ ਕਿਸੇ ਸਮੇਂ ਪੰਜਾਬੀ ਟ੍ਰਿਬਿਊਨ ਵਿੱਚ ਸਹਿ-ਸੰਪਾਦਕ ਸੀ ਅਤੇ ਉਸ ਤੋਂ ਬਾਅਦ ਮੇਰੇ ਵਿਭਾਗ ਵਿੱਚ ਫ਼ੀਚਰ ਸਰਵਿਸ ਦੇ ਇੰਚਾਰਜ ਵਜੋਂ ਆ ਗਿਆ ਸੀ। ਪੰਜਾਬੀ ਜਗਤ ਵਿੱਚ ਬੱਲ ਸਾਹਿਬ ਪੜ੍ਹਨ ਅਤੇ ਕਿਤਾਬਾਂ ਪੜ੍ਹਾਉਣ ਲਈ ਮਸ਼ਹੂਰ ਹਨ। ਪਟਿਆਲਾ ਛੱਡ ਕੇ ਪਿਛਲੇ ਤਿੰਨ ਕੁ ਵਰ੍ਹਿਆਂ ਤੋਂ ਕੈਨੇਡਾ ਆਪਣੇ ਪਰਿਵਾਰ ਕੋਲ ਆ ਵੱਸਿਆ ਸੀ। ਅਸੀਂ ਇਕ ਪੰਜਾਬੀਆਂ ਦੇ ਰੈਸਟੋਰੈਂਟ ਵਿੱਚ ਬੈਠ ਕੇ ਚਾਹ ਪੀਣ ਲੱਗੇ। ਗੁਰਦਿਆਲ ਬੱਲ ਨੇ ਹਮੇਸ਼ਾ ਵਾਂਗ ਪੰਜ-ਸੱਤ ਕਿਤਾਬਾਂ ਦੋਸਤਾਂ ਨੂੰ ਪਹੁੰਚਾਉਦ ਖਾਤਰ ਸੰਭਾਲ ਦਿੱਤੀਆਂ। ਮੈਂ ਬੱਲ ਨੁੰ 29 ਅਕਤੂਬਰ ਨੂੰ ਸਿੰਗਾਰ ਬੈਂਕੁਟ ਹਾਲ ਵਿੱਚ ਗਲੋਬਲ ਪੰਜਾਬ ਫ਼ਾਊਂਡੇਸ਼ਨ ਵੱਲੋਂ ਆਯੋਜਿਤ ਕੀਤੇ ਜਾ ਰਹੇ ਸੈਮੀਨਾਰ ਵਿੱਚ ਆਉਣ ਦਾ ਸੱਦਾ ਦਿੰਤਾ ਅਤੇ ਕੁਲਵਿੰਦਰ ਸੈਣੀ ਮੈਨੂੰ ਘਰ ਛੱਡ ਗਿਆ।
28 ਅਕਤੂਬਰ ਨੁੰ ਹਮਦਰਦ ਅਖਬਾਰ ਦੇ ਦਫ਼ਤਰ ਵਿੱਚ 12 ਕੁ ਵਜੇ ਪਹੁੰਚ ਗਿਆ ਸੀ। ‘ਹਮਦਰਦ’ ਦੇ ਸੰਪਾਦਕ ਅਤੇ ਹਮਦਰਦ ਟੀ. ਵੀ. ਦੇ ਮਾਲਕ ਅਮਰ ਸਿੰਘ ਭੁੱਲਰ ਮੇਰੀ ਇੰਤਜ਼ਾਰ ਕਰ ਰਹੇ ਸਨ। ਸਾਡੀ ਅੱਜ ਦੀ ਮੁਲਾਕਾਤ ਪਹਿਲਾਂ ਹੀ ਤਹਿ ਸੀ ਅਤੇ ਭੁੱਲਰ ਸਾਹਿਬ ਨੇ ਲੰਚ ਦੇ ਨਾਲ ਨਾਲ ਹਮਦਰਦ ਟੀ. ਵੀ. ਲਈ ਇੰਟਰਵਿਊ ਦਾ ਸੱਦਾ ਵੀ ਦਿੱਤਾ ਹੋਇਆ ਸੀ। ਮੈਂ ਅਤੇ ਭੁੱਲਰ ਸਾਹਿਬ 40-42  ਸਾਲ ਦੇ ਪੁਰਾਣੇ ਦੋਸਤ ਸਾਂ। ਅਸੀਂ 1974-75 ਵਿੱਚ ਸਰਕਾਰੀ ਕਾਲਜ ਮਲੇਰਕੋਟਲਾ ਵਿੱਚ ਵਿਦਿਆਰਥੀ ਸਾਂ ਅਤੇ ਵਿਦਿਆਰਥੀ ਰਾਜਨੀਤੀ ਵਿੱਚ ਸਰਗਰਮ ਸਾਂ। ਚਾਹ ਦੇ ਕੱਪ ‘ਤੇ ਪੁਰਾਣੀਆਂ ਯਾਦਾਂ ਤਾਜ਼ਾ ਕਰਨ ਤੋਂ ਬਾਅਦ ਮੈਂ ਸਟੂਡੀਓ ਵਿੱਚ ਗਿਆ। ਉਥੇ ਪਰਮਜੀਤ ਦਿਓਲ ਮੈਨੂੰ ਇੰਟਰਵਿਊ ਕਰਨ ਲਈ ਤਿਆਰ ਬੈਠੀ ਸੀ। ਇਕ ਘੰਟੇ ਦੀ ਇੰਟਰਵਿਉ ਨੂੰ ਫ਼ੇਸਬੁੱਕ ਲਾਈਵ ਕੀਤਾ ਗਿਆ। ਉਥੋਂ ਮੈਨੂੰ ਅਮਰ ਸਿੰਘ ਭੁੱਲਰ ਅਮਨ ਪੱਡਾ ਦੇ ਤਹਿਲਕਾ ਟੀ. ਵੀ. ਦੇ ਸਟੂਡੀਓ ਛੱਡ ਗਿਅ। ਇੱਥੇ ਸਤਨਾਮ ਸਿੰਘ ਨੇ ਮੈਨੂੰ ਇੰਟਰਵਿਊ ਕੀਤਾ। ਇੱਥੋਂ ਜੀਤ ਵਾਲੀਆ ਪੂਰੇ ਪਰਿਵਾਰ ਸਮੇਤ ਮੈਨੂੰ ਲੈਣ ਪਹੁੰਚ ਗੲੈ ਸਨ। ਅਸੀਂ ਉਥੋਂ ਸਿੱਧੇ ਨਿਆਗਰਾਫ਼ਾਲ ਜਾਣਾ ਸੀ। ਮੈਂ ਤਾਂ ਕਈ ਵਾਰ ਨਿਆਗਰਾ ਫ਼ਲ ਜਾ ਚੁੱਕਾ ਸਾਂ ਪਰ ਮੇਰੀ ਧਰਮ ਪਤਨੀ ਦੀ ਇਹ ਪਹਿਲੀ ਯਾਤਰਾ ਸੀ। ਉਹ ਨਿਆਗਰਾ ਵੇਖਣਾ ਚਾਹੁੰਦੀ ਸੀ ਜਾਂ ਫ਼ਿਰ ਜੀਤ ਵਾਲੀਆ ਦੇ ਬੱਚੇ। ਅਸੀਂ ਸ਼ਾਮ ਚਾਰ ਕੁ ਵਜੇ ਨਿਆਗਰਾ ਵੱਲ ਚੱਲ ਪਏ। ਨਿਆਗਰਾ ਦਰਿਆ ‘ਤੇ ਸਥਿਤ ਨਿਆਗਰਾ ਫ਼ਾਲ ਟਰਾਂਟੋ ਤੋਂ 120 ਕਿਲੋਮੀਟਰ ਦੂਰ ਹੈ। ਇੱਥੋਂ ਅਮਰੀਕਾ ਦਾ ਸ਼ਹਿਰ ਬਫ਼ਲੋ ਸਿਰਫ਼ 27 ਕਿਲੋਮੀਟਰ ਦੂਰ ਹੈ। ਇਹ ਉਚੀਆਂ ਪਾਣੀ ਦੀਆਂ ਧਾਰਾਂ ਕੈਨੇਡਾ ਦੇ ਪ੍ਰਾਂਤ ਉਨਟਾਰੀਓ ਅਤੇ ਅਮਰੀਕਾ ਦੇ ਰਾਜ ਨਿਊਯਾਰਕ ਦੇ ਵਿੱਚਾਲੇ ਸਥਿਤ ਹਨ। ਨਿਆਗਰਾ ਫ਼ਾਲ ਨੂੰ ਦੋ ਹਿੱਸਿਆਂ ਵਿੱਚ ਵੰਡ ਕੇ ਵੇਖਿਆ ਜਾਂਦਾ ਹੈ। ਇਕ ਹੈ ਮੋਟ ਆਈਲੈਂਡ ਤੇ ਦੂਸਰਾ ਹੌਰਸ ਸ਼ੂ ਫ਼ਾਲਜ਼। ਇਸ ਫ਼ਾਲਜ਼ ਦਾ ਦੋ ਤਿਹਾਈ ਹਿੱਸਾ ਕੈਨੇਡਾ ਵਾਲੇ ਪਾਸੇ ਹੈ। ਅਮਰੀਕਾ ਵਾਲੇ ਪਾਸੇ ਬਰਾਈਡਲ ਵੇਲ ਫ਼ਾਲਜ਼ ਵੀ ਹਨ। ਨਿਆਗਰਾ ਫ਼ਾਲ ਦੀ ਉਤਪਤੀ ਬਰਫ਼ ਯੁੱਗ ਵੇਲੇ ਗਲੇਸ਼ੀਅਰ ਦੇ ਪਿਘਲਣ ਨਾਲ ਹੋਈ। ਇਹ ਵੱਡਾ ਵਾਟਰ ਫ਼ਾਲ ਦੁਨੀਆਂ ਵਿੱਚ ਆਪਣੀ ਖੂਬਸੂਰਤੀ ਕਰਕੇ ਬਹੁਤ ਮਸ਼ਹੂਰ ਹੈ। ਕੁਦਰਤ ਦੀ ਇਸ ਖੂਬਸੂਰਤ ਸਿਰਜਣਾ ਨੂੰ ਪਹਿਲੀ ਵਾਰ 1604 ਵਿੱਚ ਇਕ ਫ਼ਰਾਂਸੀਸੀ ਸੈਮੂਅਲ ਡੀ ਫ਼ੈਮਪਲੇਨ ਨੇ ਲੱਭਿਆ ਸੀ। ਹੁਣ ਕੈਨੇਡਾ ਅਤੇ ਅਮਰੀਕਾ ਦੀ ਯਾਤਰਾ ਕਰਨ ਵਾਲੇ ਲੱਖਾਂ ਲੋਕਾਂ ਲਈ ਇਹ ਖਿੱਚ ਦਾ ਕੇਂਦਰ ਹੈ। ਇਸੇ ਤਰ੍ਹਾਂ ਦੀ ਖਿੱਚ ਸਾਨੂੰ ਵੀ ਨਿਆਗਰਾ ਫ਼ਾਲ ਖਿੱਚ ਲਿਆਈ ਸੀ। ਜਦੋਂ ਅਸੀਂ ਨਿਆਗਰਾ ਪਹੁੰਚੇ ਤਾਂ ਮੂੰਹ ਹਨੇਰਾ ਹੋ ਚੁੱਕਾ ਸੀ। ਠੰਡੀਆਂ-ਠੰਡੀਆਂ ਹਵਾਵਾਂ ਨੇ ਸਾਡੇ ਦੰਦ ਵੱਜਣ ਲਗਾ ਦਿੱਤੇ। ਅਸੀਂ ਜਲਦੀ ਹੀ ਇੰਡੀਅਨ ਸ਼ੈਫ਼ ਨਾਂ ਦੇ ਹੋਟਲ ਵਿੱਚ ਜਾ ਬੈਠੇ। ਠੰਡ ਤੋਂ ਬਚਣ ਲਈ ਅਤੇ ਡਿਨਰ ਕਰਨ ਲਈ। ਉਂਝ ਵੀ ਮੈਂ ਵਕਤ ਸਿਰ ਘਰ ਪਹੁੰਚਣਾ ਚਾਹੁੰਦਾ ਸੀ ਕਿਉਂਕਿ ਅਗਲੇ ਦਿਨ ਗਲੋਬਲ ਪੰਜਾਬ ਫ਼ਾਊਂਡੇਸ਼ਨ ਦੇ ਟਰਾਂਟੋ ਚੈਪਟਰ ਵੱਲੋਂ ਆਯੋਜਿਤ ਕੀਤੇ ਜਾ ਰਹੇ ਸੈਮੀਨਾਰ ਵਿੱਚ ਸ਼ਾਮਲ ਹੋਣਾ ਸੀ।
ਗਲੋਬਲ ਪੰਜਾਬ ਫ਼ਾਊਂਡੇਸ਼ਨ ਅਤੇ ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਅਲੂਮਨੀ ਐਸੋਸੀਏਸ਼ਨ ਦੇ ਟਰਾਂਟੋ ਚੈਪਟਰ ਵੱਲੋਂ ‘ਹਾਉ ਟੂ ਲੀਡ ਸੁਕਸੈਸਫ਼ੁਲ ਲਾਈਫ਼’ ਵਿਸ਼ੇ ‘ਤੇ ਸੈਮੀਨਾਰ ਆਯੋਜਿਤ ਕੀਤਾ ਗਿਆ। ਗਲੋਬਲ ਪੰਜਾਬ ਫ਼ਾਊਂਡੇਸ਼ਨ ਦੇ ਟਰਾਂਟੋ ਚੈਪਟਰ ਦਾ ਆਰੰਭ ਜੂਨ 2015 ਵਿੱਚ ਕੀਤਾ ਗਿਆ ਸੀ। ਇਸ ਵਿੱਚ ਡਾ. ਕੁਲਜੀਤ ਸਿੰਘ ਜੰਜੁਆ, ਕੁਲਵਿੰਦਰ ਸੈਣੀ, ਕਵੀਤਰੀ ਸੁਰਜੀਤ ਕੌਰ ਅਤੇ ਅਰੂਜ ਰਾਜਪੂਤ ਆਦਿ ਦੋਸਤ ਕਾਰਜਸ਼ੀਲ ਸਨ। ਦੂਜੇ ਪਾਸੇ ਪੰਜਾਬੀ ਯੂਨੀਵਰਸਿਟੀ ਦੇ ਸਾਬਕਾ ਵਿਦਿਆਰਥੀ  ਅਤੇ ਪੰਜਾਬੀ ਯੂਨੀਵਰਸਿਟੀ ਅਲੂਮਨੀ ਐਸੋਸੀਏਸ਼ਨ ਦੇ ਟਰਾਂਟੋ ਚੈਪਟਰ ਦੇ ਚੇਅਰਮੈਨ ਐਡਵੋਕੇਟ ਪਰਮਜੀਤ ਸਿੰਘ ਗਿੱਲ ਅਤੇ ਜਸਪ੍ਰੀਤ ਗਿੱਲ ਆਦਿ ਇਸ ਸੈਮੀਨਾਰ ਦੀ ਸਫ਼ਲਤਾ ਲਈ ਸਹਿਯੋਗ ਦੇ ਰਹੇ ਸਨ। ਇਸ ਵਿੱਚ ਸ਼ਾਮਲ ਹੋਣ ਲਈ ਜਦੋਂ ਮੈਂ ਸਿੰਗਾਰ ਬੈਂਕੁਟ ਹਾਲ ਪਹੁੰਚਿਆ ਤਾਂ ਪ੍ਰਸਿੱਧ ਖੇਡ ਲੇਖਕ ਪ੍ਰਿੰਸੀਪਲ ਸਰਬਣ ਸਿੰਘ, ਸੀਨੀਅਰ ਸਾਹਿਤਕਾਰ ਬਲਵੀਰ ਸਿੰਘ ਮੋਮੀ, ਸ. ਇੱਛਰ ਸਿੰਘ, ਦੁੱਗਲ ਸਾਹਿਬ ਅਤੇ ਸੁਰਜੀਤ ਕੌਰ ਅਤੇ ਪਿਆਰਾ ਸਿੰਘ ਕੱਦੋਵਾਲ ਆਦਿ ਦੋਸਤ ਮੈਨੂੰ ਪ੍ਰਵੇਸ਼ ਦੁਆਰ ‘ਤੇ ਹੀ ਮਿਲ ਗਏ। ਹਾਲ ਵਿੱਚ ਕੁਲਵਿੰਦਰ ਸੈਣੀ, ਮਹਿੰਦਰ ਸਿੰਘ ਵਾਲੀਆ, ਪਰਮਜੀਤ ਸਿੰਘ ਗਿੱਲ ਅਤੇ ਪਵਨ ਮਹਿਰੋਕ ਆਦਿ ਦੋਸਤ ਬਹੁਤ ਨਿੱਘ ਨਾਲ ਮਿਲੇ। ਵੇਖਦੇ ਵੇਖਦੇ ਹਾਲ ਵਿੱਚ ਖੂਬ ਚਹਿਲ ਪਹਿਲ ਹੋ ਗਈ ਸੀ। ਚਾਹ ਦੇ ਨਾਲ ਗੱਲਬਾਤ ਦਾ ਸਿਲਸਿਲਾ ਉਦੋਂ ਟੁੱਟਿਆ ਜਦੋਂ ਕੁਲਜੀਤ ਸਿੰਘ ਜੰਜੂਆ ਨੇ ਮਸਕੂਦ ਚੌਧਰੀ, ਪ੍ਰਿੰਸੀਪਲ ਸਰਬਣ ਸਿੰਘ, ਬਲਬੀਰ ਮੋਮੀ ਅਤੇ ਮੈਨੂੰ ਸਟੇਜ ‘ਤੇ ਆਉਣ ਦਾ ਸੱਦਾ ਦਿੱਤਾ। ਪ੍ਰੋਗਰਾਮ ਦੀ ਸ਼ੁਰੂਆਤ ਐਡਵੋਕੇਟ ਪਰਮਜੀਤ ਸਿੰਘ ਗਿੱਲ ਦੇ ਸਵਾਗਤੀ ਸ਼ਬਦਾਂ ਨਾਲ ਹੋਈ। ਉਹਨਾਂ ਤੋਂ ਬਾਅਦ ਮੋਟੀਵੇਸ਼ਨਲ ਸਪੀਕਰ ਦੀਪਕ ਮਨਚੰਦਾ ਨੇ ਭਾਸ਼ਣ ਦਿੱਤਾ। ਦੀਪਕ ਮਨਚੰਦਾ ਤੋਂ ਬਾਅਦ ਮਹਿੰਦਰ ਸਿੰਘ ਵਾਲੀਆ ਨੇ ਤੱਥਾਂ ‘ਤੇ ਆਧਾਰਿਤ ਆਪਣੀ ਗੱਲ ਕਹੀ ਅਤੇ ਸਫ਼ਲ ਤੇ ਸਿਹਤ ਭਰਪੂਰ ਜ਼ਿੰਦਗੀ ਜਿਊਣ ਦੇ ਨੁਕਤੇ ਦੱਸੇ। ਡਾ. ਸਮਰਾ ਜ਼ਫ਼ਰ ਨੇ ਆਪਣੀ ਜ਼ਿੰਦਗੀ ਦੇ ਸੰਘਰਸ਼ ਦੀ ਕਹਾਣੀ ਨਾਲ ਪ੍ਰੇਰਨਾਮਈ ਭਾਸ਼ਣ ਦਿੱਤਾ। ਪ੍ਰਿੰਸੀਪਲ ਸਰਬਣ ਸਿੰਘ ਨੇ ਵੀ ਚੰਗੀ ਸਿਹਤ ਲਈ ਨੁਕਤੇ ਸਾਂਝੇ ਕੀਤੇ।
ਡਾ. ਕੁਲਜੀਤ ਸਿੰਘ ਜੰਜੂਆ ਨੇ ਮੈਂਬਰ ਪਾਰਲੀਮੈਂਟ ਰੂਬੀ ਸਹੋਤਾ ਤੋਂ ਬਾਅਦ ਮੈਨੂੰ ਬੋਲਣ ਦਾ ਸੱਦਾ ਦਿੱਤਾ। ਮੈਂ ਆਪਣੀ ਗੱਲ ਆਪਣੀ ਪੁਸਤਕ ‘ਜਿੱਤ ਦਾ ਮੰਤਰ’ ਦੇ ਹਵਾਲੇ ਨਾਲ ਸ਼ੁਰੂ ਕੀਤੀ। ਉਂਝ ਮੈਥੋਂ ਪਹਿਲਾਂ ਜਸਪ੍ਰੀਤ ਕੌਰ ਗਿੱਲ ਨੇ ‘ਜਿੱਤ ਦਾ ਮੰਤਰ’ ਉਤੇ ਖੋਜ ਭਰਪੂਰ ਪੇਪਰ ਪੇਸ਼ ਕੀਤਾ ਸੀ ਅਤੇ ਹਾਜ਼ਰ ਸਰੋਤਿਆਂ ਨੂੰ ਪੁਸਤਕ ਬਾਰੇ ਕਾਫ਼ੀ ਜਾਣਕਾਰੀ ਮਿਲ ਚੁੱਕੀ ਸੀ। ਮੈਂ ਵੀ ਸਕਾਰਾਤਮਕ ਸੋਚ, ਦ੍ਰਿੜ੍ਹ ਨਿਸ਼ਚੇ ਅਤੇ ਆਤਮ ਵਿਸ਼ਵਾਸ ਨਾਲ ਮਿੱਥੇ ਹੋਏ ਉਦੇਸ਼ ਨੂੰ ਹਾਸਲ ਕਰਨ ਦੇ ਨੁਕਤਿਆਂ ਬਾਰੇ ਗੁਰਬਾਣੀ, ਗੀਤਾ ਅਤੇ ਬਾਈਬਲ ਦੇ ਹਵਾਲੇ ਨਾਲ ਗੱਲ ਕੀਤੀ। ਮੇਰੇ ਭਾਸ਼ਣ ਤੋਂ ਬਾਅਦ ਮੈਂਬਰ ਪਾਰਲੀਮੈਂਟ ਕਮਲ ਖਹਿਰਾ, ਡਾ. ਕੁਲਜੀਤ ਜੰਜੂਆ, ਕੁਲਵਿੰਦਰ ਸਿੰਘ ਸੈਣੀ ਅਤੇ ਹੋਰ ਦੋਸਤਾਂ ਨੇ ਮੁੱਖ ਮਹਿਮਾਨ ਦੇ ਤੌਰ ‘ਤੇ ਮੈਨੂੰ ਸਨਮਾਨਿਤ ਕੀਤਾ। ਇਸ ਸਮਾਰੋਹ ਦੇ ਦੂਜੇ ਹਿੱਸੇ ਵਿੱਚ ਕਵੀ ਦਰਬਾਰ ਦਾ ਆਯੋਜਨ ਕੀਤਾ ਗਿਆ। ਇਸ ਵਿੱਚ ਸੁਰਜੀਤ ਕੌਰ, ਪਰਮ ਸਰਾਂ, ਮਕਸੂਦ ਚੌਧਰੀ, ਲਵਲੀਨ ਕੌਰ ਗਿੱਲ, ਪਿਆਰਾ ਸਿੰਘ ਕੱਦੂਵਾਲ, ਕੁਲਜੀਤ ਸਿੰਘ, ਪਰਮਜੀਤ ਗਿੱਲ ਅਤੇ ਅਰੂਜ ਰਾਜਪੂਤ ਆਦਿ ਤਕਰੀਬਨ 10-12 ਕਵੀ ਸ਼ਾਮਲ ਹੋਏ। ਸਮੁੱਚੇ ਤੌਰ ‘ਤੇ ਇਹ ਪ੍ਰੋਗਰਾਮ ਇਕ ਸਫ਼ਲ ਸਮਾਗਮ ਦੇ ਤੌਰ ‘ਤੇ ਸੰਪੰਨ ਹੋਇਆ।
ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਤੋਂ ਇੰਗਲਿਸ਼ ਦੀ ਐਮ. ਏ. ਕਰਨ ਤੋਂ ਬਾਅਦ ਸਟੱਡੀ ਵੀਜ਼ਾ ‘ਤੇ ਕੈਨੇਡਾ ਪਹੁੰਚੀ ਮੇਗਨਾ ਸੋਹਲ ਮੈਨੂੰ ਮਿਲਣ ਆਈ ਅਤੇ ਕਹਿਣ ਲੱਗੀ ਕਿ ਅੱਜ ਮੈਂ ਤੁਹਾਨੁੰ ਤੁਹਾਡੀ ਮਨਪਸੰਦ ਥਾਂ ‘ਤੇ ਲੈ ਕੇ ਜਾਵਾਂਗੀ। ਅਸੀਂ ਘੰਟੇ ਕੁ ਦੀ ਡ੍ਰਾਈਵ ਤੋਂ ਬਾਅਦ ‘ਫ਼ੁੰਗ ਲੋਇ ਕੋਕ ਇੰਸਟੀਚਿਊਟ ਆਫ਼ ਡਾਊਇਜ਼ਮ, ਮੋਨੋ, ਉਨਟਾਰੀਓ’ ਪਹੁੰਚੇ। ਇੱਥੇ ਚੀਨੀ ਦਾਰਸ਼ਨਿਕ ਤਾਓ ਨੂੰ ਯਾਦ ਕਰਦੇ ਹੋਏ ਅਸੀਂ ਤਾਓਿਇਸਟ ਪ੍ਰੰਪਰਾ ਨੂੰ ਸਮਝਣ ਦੀ ਕੋਸ਼ਿਸ਼ ਕੀਤੀ, ਜਿਸ ਮੁਤਾਬਕ ਮਨੁੱਖ ਦੀ ਚੰਗੀ ਸਿਹਤ ਲਈ ਸਰੀਰ, ਮਨ ਅਤੇ ਆਤਮਾ ਵਿੱਚ ਇਕਸੁਰਤਾ ਦਾ ਹੋਣਾ ਜ਼ਰੂਰੀ ਹੁੰਦਾ ਹੈ। ਕਿਸੇ ਚੀਨੀ ਮੰਦਰ ਵਿੱਚ ਜਾਣ ਦਾ ਅੱਜ ਮੇਰਾ ਪਹਿਲਾ ਮੌਕਾ ਸੀ। ਇਹ ਦਿਨ ਸੱਚਮੁਚ ਆਪਣੇ ਨਾਲ ਗੱਲਬਾਤ ਕਰਨ ਵਾਲਾ ਦਿਨ ਹੋ ਨਿੱਬੜਿਆ ਸੀ। ਇਹ ਦਿਨ ਹੋਰ ਵੀ ਲੰਮਾ ਹੋ ਸਕਦਾ ਸੀ ਜੇ ਸੁਰਜੀਤ ਕੌਰ ਅਤ ੇਅਰੂਜ ਰਾਜਪੂਤ ਦਾ ਫ਼ੋਨ ਨਾ ਆਉਂਦਾ। ਉਹਨਾਂ ਕਿਹਾ ਕਿ ਉਹ ਮੈਨੂੰ ਉਡੀਕ ਰਹੇ ਨੇ। ਅਰੂਜ ਨੇ ‘ਰੇਡੀਓ ਕੈਨੇਡਾ ਜਿੰਦਾਬਾਦ’ ਲਈ ਮੈਨੂੰ ਇੰਟਰਵਿਊ ਵੀ ਕਰਨਾ ਸੀ। ਉਹਨਾਂ ਨੂੰ ਪਤਾ ਸੀ ਕਿ ਟਰਾਂਟੋ ਵਿੱਚ ਇਹ ਮੇਰਾ ਆਖਰੀ ਦਿਨ ਸੀ। ਇਹ ਸਮਾਂ ਸੀ ਜਿਸਦਾ ਅਸੀਂ ਵੱਧ ਤੋਂਵੱਧ ਲਾਭ ਲੈ ਸਕਦੇ ਸੀ। ਸੋ ਅਜਿਹਾ ਹੀ ਕੀਤਾ। ਉਹਨਾਂ ਤੋਂ ਵਿਦਾ ਹੋ ਕੇ ਮੈਂ ਆਪਣੇ ਮੇਜ਼ਬਾਨ ਜੀਤ ਵਾਲੀਆ ਦੇ ਘਰ ਪਹੁੰਚ ਗਿਆ ਸੀ, ਜਿੱਥੇ ਮੇਰੀ ਪਤਨੀ ਸਮੇਤ ਸਾਰਾ ਪਰਿਵਾਰ ਮੇਰਾ ਇੰਤਜ਼ਾਰ ਕਰ ਰਿਹਾ ਸੀ। ਮੈਂ ਪਹਿਲੀ ਵਾਰ ਕੈਨੇਡਾ ਦੀ ਧਰਤੀ ‘ਤੇ ਦੀਵਾਲੀ ਮਨਾਉਣ ਜਾ ਰਿਹਾ ਸੀ। ਇਸ ਦੀਵਾਲੀ ਤੋਂ ਬਾਅਦ ਅਗਲੇ ਦਿਨ ਅਸੀਂ ਇੰਡੀਆ ਲਈ ਰਵਾਨਾ ਹੋ ਜਾਣਾ ਸੀ।
(ਸਮਾਪਤ)


Warning: fopen(/home/gpunjab/public_html/wp-content/plugins/hit-counter/css/.txt): failed to open stream: No such file or directory in /home/gpunjab/public_html/wp-content/plugins/hit-counter/hc.php on line 216

Warning: fread() expects parameter 1 to be resource, boolean given in /home/gpunjab/public_html/wp-content/plugins/hit-counter/hc.php on line 217

Warning: fclose() expects parameter 1 to be resource, boolean given in /home/gpunjab/public_html/wp-content/plugins/hit-counter/hc.php on line 218