Month: January 2017

ਰਾਸ਼ਟਰਪਤੀ ਟਰੰਪ ਤੇ ਮੀਡੀਆ ਆਹਮੋ ਸਾਹਮਣੇ

ਅੱਜ ਦੁਨੀਆਂ ਦਾ ਸਭ ਤੋਂ ਚਰਚਿਤ ਵਿਅਕਤੀ ਅਮਰੀਕਾ ਦਾ 45ਵਾਂ ਰਾਸ਼ਟਰਪਤੀ ਡੌਨਲਡ ਟਰੰਪ ਹੈ। ਵਿਵਾਦਾਂ ਅਤੇ ਟਰੰਪ ਦਾ ਗੂੜ੍ਹਾ ਸਬੰਧ ਹੈ। ਪੰਜਾਬ ਦੇ ਕਿਸੇ ਅੱਖੜ ਜੱਟ ਵਰਗੀ ਬਿਰਤੀ ਦਾ ਮਾਲਕ ਡੌਨਲਡ ਟਰੰਪ ਬੜਾ ਮੂੰਹਫ਼ੱਟ ਹੈ। ਮੂੰਹ ਬਾਤ ਨੁੰ ਮੂੰਹ ਵਿੱਚ ਨਹੀਂ ਰੱਖਦਾ ਸਗੋਂ ਦੂਜੇ ਦੇ ਮੂੰਹ ‘ਤੇ ਮਾਰਦਾ ਹੈ। 20 ਜਨਵਰੀ ਨੂੰ ਟਰੰਪ ਨੇ ਰਾਸ਼ਟਰਪਤੀ ਦੇ ਅਹੁਦੇ ਦੀ ਸਹੁੰ ਚੁੱਕੀ। ਸਹੁੰ ਚੁੱਕਣ ਤੋਂ ਬਾਅਦ ਉਸਨੇ ਅਮਰੀਕਨਾਂ ਨਾਲ ਵਾਅਦੇ ਕਰਦੇ ਹੋਏ ਕਿਹਾ ਕਿ ਅੱਜ ਦੇ ਦਿਨ ਨੂੰ ਹਮੇਸ਼ਾ ਯਾਦ ਰੱਖਿਆ ਜਾਵੇਗਾ ਕਿਉਂਕਿ ਅੱਜ ਫ਼ਿਰ ਲੋਕ ਸ਼ਾਸਕ ਬਣੇ ਹਨ। ਇਹ ਸਹੁੰ ਸਾਰੇ ਅਮਰੀਕਾ ਵਾਸੀਆਂ ਦੇ ਪ੍ਰਤੀ ਨਿਸ਼ਠਾ ਪ੍ਰਗਟਾਉਂਦੀ ਹੈ। ਅਮਰੀਕੀ ਰਾਸ਼ਟਰਪਤੀ ਦਾ ਕਹਿਣਾ ਸੀ ਕਿ ਅਸੀਂ ਆਪਣੇ ਦੇਸ਼ ਨੂੰ ਬਚਾਉਣ ਦੀ ਬਜਾਏ ਹੋਰ ਦੇਸ਼ਾਂ ਦੀਆਂ ਸੀਮਾਵਾਂ ਦੀ ਰੱਖਿਆ ਕਰਦੇ ਰਹੇ ਪਰ ਅੱਜ ਤੋਂ ਸਭ ਤੋਂ ਪਹਿਲਾਂ ਅਮਰੀਕਾ। ਅਸੀਂ ਪਹਿਲਾਂ ਅਮਰੀਕਾ ਦੀਆਂ ਸਰਹੱਦਾਂ ਦੀ ਰਾਖੀ ਕਰਾਂਗੇ। ਆਪਣੀਆਂ ਨੌਕਰੀਆਂ ਅਤੇ ਸੁਪਨੇ ਵਾਪਸ ਲਿਆਵਾਂਗੇ। ਡੌਨਲਡ ਟਰੰਪ ਨੇ ਸਪਸ਼ਟ ਕੀਤਾ ਕਿ ਵਪਾਰ, ਕਰ, ਵਿਦੇਸ਼ੀ ਮਾਮਲੇ ਅਤੇ ਪ੍ਰਵਾਸੀਆਂ ਨਾਲ ਸਾਰੇ ਜੁੜੇ ਫ਼ੈਸਲੇ ਅਮਰੀਕੀ ਪਰਿਵਾਰਾਂ ਅਤੇ ਕਰਮਚਾਰੀਆਂ ਦੇ ਹਿੱਤਾਂ ਨੂੰ ਧਿਆਨ ਵਿੱਚ ਰੱਖ ਕੇ ਕੀਤੇ ਜਾਣਗੇ। ਉਨ੍ਹਾਂ ਕਿਹਾ ਕਿ ਇਸਲਾਮੀ ਕੱਟਰਵਾਦ ਦੇ ਖਿਲਾਫ਼ ਉਹ ਸਾਰੀ ਦੁਨੀਆਂ ਨੂੰ ਇੱਕਜੁਟ ਕਰਨਗੇ ਅਤੇ ਇਸ ਨੂੰ ਉਹ ਇਸ ਧਰਤੀ ਤੋਂ ਮਿਟਾ ਦੇਣਗੇ। ਟਰੰਪ ਨੇ ਅਮਰੀਕਾ ਦੇ ਲੋਕਾਂ ਨੂੰ ਕਿਹਾ ਕਿ ਤੁਹਾਡੀ ਕਦੇ ਵੀ ਅਣਦੇਖੀ ਨਹੀਂ ਹੋਵੇਗੀ। ਮੈਂ ਹਰ ਸਾਹ ਨਾਲ ਤੁਹਾਡੇ ਹਿੱਤਾਂ ਲਈ ਲੜਾਂਗਾ। ਅਮਰੀਕਾ ਦੀ ਇੱਕ ਵਾਰ ਫ਼ਿਰ ਜਿੱਤ ਹੋਵੇਗੀ”। ਇਸ ਤਰ੍ਹਾਂ ਦੇ ਵਾਅਦੇ ਡੌਨਲਡ ਟਰੰਪ ਨੇ ਆਪਣੀ ਸਹੁੰ ਚੁੱਕਣ ਦੀ ਰਸਮ ਸਮੇਂ ਕੀਤੇ।
ਡੌਨਲਡ ਟਰੰਪ ਨੇ ਆਪਣੇ ਪਹਿਲੇ ਭਾਸ਼ਣ ਵਿੱਚ ਜੋ ਗੱਲਾਂ ਕੀਤੀਆਂ ਹਨ, ਉਹ ਉਸਨੇ ਚੋਣ ਮੁਹਿੰਮ ਦੌਰਾਨ ਵੀ ਕੀਤੀਆਂ ਸਨ। ਉਸਨੇ ਇਲੈਕਸ਼ਨ ਜਿੱਤਣ ਉਪਰੰਤ ਅਮਰੀਕਾ ਵਿੱਚ ਗੈਰ ਕਾਨੂੰਨੀ ਤੌਰ ‘ਤੇ ਰਹਿ ਰਹੇ ਕਰੋੜਾਂ ਤੋਂ ਵੱਧ ਪ੍ਰਵਾਸੀਆਂ ਨੂੰ ਬਾਹਰ ਕੱਢਣ, ਇਸਲਾਮਿਕ ਅੱਤਵਾਦ ਖਤਮ ਕਰਨ ਤੇ ਅਮਰੀਕਨ ਸ਼ਹਿਰੀਆਂ ਵਸਤੇ ਨੌਕਰੀਆਂ ਦੇਣਦੇ ਵਾਅਦੇ ਕਰਕੇ ਚੰਗੀ ਹਮਾੲਤ ਹਾਸਲ ਕਰ ਲਈ ਸੀ। ਉਸਦੇ ਭਾਸ਼ਣਾਂ ਨੇ ਬਹੁਤੇ ਅਮਰੀਕਨਾਂ ਨੂੰ ਦੇਸ਼ ਭਗਤੀ ਦੇ ਰੰਗ ਵਿੱਚ ਰੰਗ ਦਿੱਤਾ ਸੀ। ਮੀਡੀਆ ਵਿੱਚ ਟਰੰਪ ਦੇ ਭਾਸ਼ਣਾਂ ਨੇ ਵਿਵਾਦ ਖੜ੍ਹਾ ਕਰ ਦਿੱਤਾ ਸੀ। ਅਮਰੀਕੀ ਮੀਡੀਆ ਨੇ ਹਿਲੇਰੀ ਕਲਿੰਟਨ ਦੇ ਹੱਕ ਵਿੱਚ ਨਾਅਰਾ ਮਾਰਿਆ ਸੀ। ਟਰੰਪ ਨੇ ਮੁੱਖ ਧਾਰਾ ਦੇ ਮੀਡੀਆ ਨੂੰ ਛੱਡ ਕੇ ਸੋਸ਼ਲ ਮੀਡੀਆ ‘ਤੇ ਜ਼ਿਆਦਾ ਨਿਰਭਰਤਾ ਵਿਖਾਈ ਸੀ। ਮੀਡੀਆ ਬਾਰੇ ਟਰੰਪ ਦੇ ਵਿੱਚਾਰ ਕੋਈ ਜ਼ਿਆਦਾ ਸਕਾਰਾਤਮਕ ਨਹੀਂ ਸਨ। ਮੀਡੀਆ ਵਿੱਚ ਅਮਰੀਕਾ ਦੇ ਹਰ ਚੋਣ ਵਿਸ਼ਲੇਸ਼ਣਕਾਰ ਨੇ ਹਿਲੇਰੀ ਕਲਿੰਟਨ ਦੇ ਜਿੱਤਣ ਦੀ ਭਵਿੱਖਬਾਣੀ ਕੀਤੀ ਸੀ ਪਰ ਸਾਰੀਆਂ ਕਿਆਸ ਅਰਾਈਆਂ ਨੂੰ ਰੱਣ ਕਰਦੇ ਹੋਏ ਟਰੰਪ ਨੇ ਵੱਡੀ ਜਿੱਤ ਪ੍ਰਾਪਤ ਕੀਤੀ। ਟਰੰਪ ਜਿੱਤ ਤਾਂ ਗਿਆ ਪਰ ਮੀਡੀਆ ਪ੍ਰਤੀ ਉਸਦੀ ਨਾਂਹ ਪੱਖੀ ਪਹੁੰਚ ਹੋਰ ਪੱਕੀ ਹੋ ਗਈ।
ਚੋਣਾਂ ਦੌਰਾਨ ਡੌਨਲਡ ਟਰੰਪ ਨੇ ਸੋਸ਼ਲ ਮੀਡੀਆ ਦਾ ਇਸਤੇਮਾਲ ਬਾਖੂਬੀ ਕੀਤਾ ਅਤੇ ਚੋਣ ਜਿੱਤਣ ਤੋਂ ਬਾਅਦ ਵੀ ਸੋਸ਼ਲ ਮੀਡੀਆ ਰਾਹੀਂ ਲੋਕਾਂ ਨਾਲ ਰਾਬਤਾ ਬਣਾਈ ਰੱਖਣ ਦਾ ਵਾਅਦਾ ਕੀਤਾ। ਦੂਜੇ ਪਾਸੇ ਟਰੰਪ ਨੇ ਮੁੱਖ ਧਾਰਾ ਦੇ ਰਵਾਇਤੀ ਮੀਡੀਆ ਵਿਰੁੱਧ ਆਪਣੀ ਜੰਗ ਹੋਰ ਭਖਾ ਦਿੱਤੀ। ਉਸਨੇ ਪੱਤਰਕਾਰਾਂ ਨੂੰ ਦੁਨੀਆਂ ਦਾ ਸਭ ਤੋਂ ਭ੍ਰਿਸ਼ਟ ਤਬਕਾ ਕਰਾਰ ਦਿੱਤਾ ਹੈ। ਟਰੰਪ ਨੇ ਮੀਡੀਆ ‘ਤੇ ਦੋਸ਼ ਲਾਇਟਾ ਹੈ ਕਿ ਉਸਦੇ ਸਹੁੰ ਚੁੱਕ ਸਮਾਗਮ ਨੂੰ ਟੀ. ਵੀ. ਮੀਡੀਆ ਨੇ ਸਹੀ ਢੰਗ ਨਾਲ ਕਵਰ ਨਹੀਂ ਕੀਤਾ। ਟਰੰਪ ਦਾ ਦੋਸ਼ ਹੈ ਕਿ ਮੀਡੀਆ ਨੇ ਸਹੁੰ ਚੁੱਕ ਸਮਾਗਮ ਵਿੱਚ ਸ਼ਾਮਲ ਲੋਕਾਂ ਦੀ ਗਿਣਤੀ ਨੂੰ ਘਟਾ ਕੇ ਪੇਸ਼ ਕੀਤਾ। ਦੂਜੇ ਪਾਸੇ ਟਰੰਪ ਵਿਰੁੱਧ ਹੋਏ ਮੁਜ਼ਾਹਰਿਆਂ ਵਿੱਚ ਸ਼ਾਮਲ ਔਰਤਾਂ ਦੀ ਗਿਣਤੀ ਵਧਾ-ਚੜ੍ਹਾ ਕੇ ਪੇਸ਼ ਕੀਤੀ ਗਈ। ਇਹ ਗੱਲ ਤਾਂ ਸੱਚ ਹੈ ਕਿ ਅਮਰੀਕਾ ਦੇ ਨਵੇਂ ਰਾਸ਼ਟਰਪਤੀ ਵਿਰੁੱਧ ਮੁਜ਼ਾਹਰੇ ਹੋੲੈ ਅਤੇ ਇਹਨਾਂ ਰੋਸ ਮੁਜ਼ਾਹਰਿਆਂ ਵਿੱਚ ਸਿਰਫ਼ ਅਮਰੀਕੀ ਔਰਤਾਂ ਹੀ ਨਹੀਂ ਸਗੋਂ ਗੁਆਂਢੀ ਮੁਲਕ ਕੈਨੇਡਾ ਸਮੇਤ ਦੁਨੀਆਂ ਦੇ ਹੋਰਨਾਂ ਮੁਲਕਾਂ ਤੋਂ ਵੀ ਔਰਤਾਂ ਪੁੱਜੀਆਂ ਹੋਈਆਂ ਸਨ। ਅਮਰੀਕੀ ਮੀਡੀਆ ਨੇ ਇਨ੍ਹਾਂ ਰੋਸ ਮੁਜ਼ਾਹਰਿਆਂ ਦੀ ਚੰਗੀ ਕਵਰੇਜ ਕੀਤੀ, ਜਿਸ ਕਾਰਨ ਟਰੰਪ ਦੇ ਮਨ ਵਿੱਚ ਗੁੱਸਾ ਆਉਣਾ ਸੁਭਾਵਿਕ ਸੀ। ਟਰੰਪ ਨੇ ਆਪਣੇ ਗੁੱਸੇ ਨੂੰ ਜੁਬਾਨ ਦਿੰਦੇ ਹੋਏ ਕਿਹਾ ਕਿ ‘ਮੇਰਾ ਮੀਡੀਆ ਨਾਲ ਯੁੱਧ ਚੱਲ ਰਿਹਾ ਹੈ।’ ਟਰੰਪ ਦਾ ਮੰਨਣਾ ਹੈ ਕਿ ਮੀਡੀਆ ਨੇ ਸਹੁੰ ਚੁੱਕ ਸਮਾਗਮ ਦੀ ਰਿਪੋਰਟਿੰਗ ਠੀਕ ਢੰਗ ਨਾਲ ਨਹੀਂ ਕੀਤੀ ਅਤੇ ਇਹ ਪ੍ਰਭਾਵ ਦੇਣ ਦੀ ਕੋਸ਼ਿਸ਼ ਕੀਤੀ ਹੈ ਕਿ ਸਮਾਗਮ ਵਿੱਚ ਕਾਫ਼ੀ ਘੱਟ ਗਿਣਤੀ ਵਿੱਚ ਲੋਕ ਪਹੁੰਚੇ। ਅਮਰੀਕੀ ਰਾਸ਼ਟਰਪਤੀ ਨੇ ਚਿਤਾਵਨੀ ਦਿੱਤੀ ਕਿ ‘ਮੀਡੀਆ ਇਸ ਕਾਰਵਾਈ ਲਈ ਨਤੀਜੇ ਭੁਗਤਣ ਲਈ ਤਿਆਰ ਰਹੇ।’
ਟਰੰਪ ਨੇ ਆਪਣਾ ਪੱਖ ਪੇਸ਼ ਕਰਦੇ ਹੋਏ ਕਿਹਾ ਕਿ ‘ਸਮਾਰੋਹ ਵਿੱਚ ਵੱਡੀ ਗਿਣਤੀ ਵਿੱਚ ਲੋਕ ਸ਼ਾਮਲ ਹੋਏ ਸਨ। ਤੁਸੀਂ ਉਨ੍ਹਾਂ ਨੂੰ ਵੇਖਿਆ। ਲੋਕਾਂ ਨਾਲ ਖਚਾਖਚ ਭਰੇ ਮੈਦਾਨ ਸਨ। ਮੈਂ ਅੱਜ ਸਵੇਰੇ ਉਠਿਆ, ਮੈਂ ਇੱਕ ਚੈਨਲ ਲਗਾਇਆ ਅਤੇ ਉਹ ਖਾਲੀ ਮੈਦਾਨ ਵਿਖਾ ਰਿਹਾ ਸੀ” ਟਰੰਪ ਦਾ ਕਹਿਣਾ ਸੀ ਕਿ ”ਮੈਂ ਭਾਸ਼ਣ ਦਿੱਤਾ, ਉਥੇ ਲੱਖਾਂ ਲੋਕ ਦਿਸ ਰਹੇ ਸਨ। ਉਹ ਅਜਿਹਾ ਮੈਦਾਨ ਵਿਖਾ ਰਹੇ ਸਨ, ਜਿੱਥੇ ਅਸਲ ਵਿੱਚ ਕੋਈ ਖੜ੍ਹਾ ਨਹੀਂ ਸੀ।” ਟਰੰਪ ਨੇ ਦੱਸਿਆ ਕਿ ਮੀਡੀਆ ਦਾ ਕਹਿਣਾ ਸੀ ਕਿ ਮੈਂ ਵੱਡਾ ਇੱਕੱਠ ਨਹੀਂ ਕਰ ਸਕਿਆ। ਜਦੋਂ  ਕਿ ਮੇਰਾ ਮੰਨਣਾ ਹੈ ਕਿ ਮੀਂਹ ਪੈ ਰਿਹਾ ਸੀ, ਮੀਂਹ ਨੇ ਜ਼ਿਆਦਾ ਲੋਕਾਂ ਨੂੰ ਆਉਣ ਤੋਂ ਰੋਕਿਆ। ਪਰ ਮੇਰੇ ਲਈ ਸਭ ਕੁਝ ਬਹੁਤ ਚੰਗਾ ਸੀ ਕਿਉਂਕਿ ਉਥੇ ਲੱਖਾਂ ਲੋਕ ਦਿਸ ਰਹੇ ਸਨ।
ਇਉਂ ਡੌਨਲਡ ਟਰੰਪ ਅਤੇ ਮੀਡੀਆ ਦੇ ਮਤਭੇਦ ਜੱਗ ਜ਼ਾਹਿਰ ਹਨ।
ਸਿਰਫ਼ ਟਰੰਪ ਹੀ ਨਹੀਂ, ਮੀਡੀਆ ਬਾਰੇ ਖੁੱਲ੍ਹ ਕੇ ਟਿੱਪਣੀਆਂ ਕਰ ਰਹੇ, ਦੂਜੇ ਪਾਸੇ ਅਮਰੀਕੀ ਮੀਡੀਆ ਵੀ ਆਪਣੇ ਤਰਕ ਪੇਸ਼ ਕਰਨ ਤੋਂ ਪਿੱਛੇ ਨਹੀਂ ਹੋਇਆ। ਅਮਰੀਕੀ ਪ੍ਰੈਸ ਕੋਰ ਨੇ ਸਪਸ਼ਟ ਕੀਤਾ ਕਿ ਟਰੰਪ ਮੀਡੀਆ ‘ਤੇ ਹੁਕਮ ਨਹੀਂ ਚਲਾ ਸਕਦੇ। ਪੱਤਰਕਾਰ ਆਪਣੇ ਨਿਯਮ ਖੁਦ ਤਹਿ ਕਰਨਗੇ। ਕੋਲੰਬੀਆ ਜਰਨਲਿਜ਼ਮ ਰਿਵੀਵ (ਜੇ. ਜੇ. ਆਰ) ਦੇ ਪ੍ਰਧਾਨ ਸੰਪਾਦਕ ਅਤੇ ਪ੍ਰਕਾਸ਼ਕ ਕਾਇਲੀ ਪੋਪ ਨੇ ਟਰੰਪ ਦੇ ਨਾਮ ਲਿਖੇ ਖੁੱਲ੍ਹੇ ਪੱਤਰ ਵਿੱਚ ਕਿਹਾ ਕਿ ਤੁਹਾਡੇ ਸਹੁੰ ਚੁੱਕ ਸਮਾਗਮ ਤੋਂ ਕੁਝ ਦਨਿ ਪਹਿਲਾਂ ਅਸੀਂ ਸੋਚਿਆ ਕਿ ਸਪਸ਼ਟ ਕਰਨਾ ਠੀਕ ਰਹੇਗਾ ਕਿ ਅਸੀਂ ਅਮਰੀਕੀ ਪ੍ਰੈਸ ਕੋਰ ਅਤੇ ਤੁਹਾਡੇ ਪ੍ਰਸ਼ਾਸਨ ਦੇ ਸਬੰਧਾਂ ਨੂੰ ਕਿਵੇਂ ਦੇਖਦੇ ਹਾਂ। ਪੋਪ ਨੇ ਸਪਸ਼ਟ ਕੀਤਾ ਸੀ ਕਿ ਮੀਡੀਆ ਅਤੇ ਰਾਸ਼ਟਰਪਤੀ ਦੇ ਸਬੰਧ ਤਣਾਅਪੂਰਨ ਹਨ। ਪੋਪ ਨੇ ਕਿਹਾ ਕਿ ”ਵਾਈਟ ਹਾਊਸ ਵਿੱਚੋਂ ਸਮਾਚਾਰ ਮੀਡਆ ਦੇ ਦਫ਼ਤਰਾਂ ਨੂੰ ਬੰਦ ਕਰਨ ਬਾਰੇ ਤੁਹਾਡੇ ਪ੍ਰੈਸ ਸਕੱਤਰ ਬਾਰੇ ਆ ਰਹੀਆਂ ਖਬਰਾਂ ਉਸੇ ਤਰਜ਼ ‘ਤੇ ਹਨ ਜੋ ਤੁਹਾਡੀ ਚੋਣ ਮੁਹਿੰਮ ਦੌਰਾਨ ਦਿਖਾਈ ਦੇ ਰਿਹਾ ਸੀ। ਉਸ ਵੇਲੇ ਤੁਸੀਂ ਮੀਡੀਆ ਨੂੰ ਕਵਰ ਤੋਂ ਰੋਕ ਦਿੱਤਾ ਸੀ।” ਪੋਪ ਨੇ ਟਰੰਪ ਨੂੰ ਸਪਸ਼ਟ ਕੀਤਾ ਕਿ ਜੇ ਰਾਸ਼ਟਰਪਤੀ ਨੂੰ ਆਪਣੇ ਨਿਯਮ ਬਣਾਉਣ ਦਾ ਅਧਿਕਾਰ ਹੈ ਤਾਂ ਪ੍ਰੈਸ ਨੂੰ ਵੀ ਆਪਣੇ ਨਿਯਮ ਘੜਨ ਦਾ ਅਧਿਕਾਰ ਹੈ। ਮੀਡੀਆ ਨੂੰ ਜਾਣਕਾਰੀ ਨਾ ਦੇਣਾ ਟਰੰਪ ਦੀ ਗਲਤੀ ਹੋਵੇਗੀ ਅਤੇ ਮੀਡੀਆ ਸੂਚਨਾ ਹਾਸਲ ਕਰਨ ਦੇ ਹੋਰ ਤਰੀਕੇ ਲੱਭ ਲਵੇਗਾ।
ਮੀਡੀਆ ਨਾਲ ਟਰੰਪ ਦੇ ਸਬੰਧ ਚੰਗੇ ਨਹੀਂ, ਸ਼ਾਇਦੇ ਇਸੇ ਕਾਰਨ ਅਮਰੀਕੀ ਰਾਸ਼ਟਰਪਤੀ ਸੋਸ਼ਲ ਮੀਡੀਆ ਨੂੰ ਤਰਜੀਹ ਦੇ ਰਹੇ ਹਨ। ਉਂਝ ਅਮਰੀਕਾ ਦਾ ਇਹ 70 ਸਾਲਾ ਰਾਸ਼ਟਰਪਤੀ ਗੈਰ ਰਾਜਨੀਤਿਕ ਪਿੱਠਭੂਮੀ ਵਾਲਾ ਰਾਸ਼ਟਰਪਤੀ ਹੈ। 88 ਅਰਬ ਡਾਲਰ ਦੀ ਜਾਇਦਾਦ ਦਾ ਮਾਲਕ ਡੌਨਲਡ ਟਰੰਪ ਅਮਰੀਕਾ ਦਾ 150ਵਾਂ ਅਮੀਰ ਵਿਅਕਤੀ ਹੈ। ਟਰੰਪ ਨੇ ਸਾਬਕਾ ਉਲੰਪਿਕ ਖਿਡਾਰੀ, ਇੱਕ ਹੀਰੋਇਨ ਅਤੇ ਮਾਡਲ ਨਾਲ ਵਿਆਹ ਰਚਾਏ ਅਤੇ ਉਸਦੇ ਤਿੰਨ ਸ਼ਾਦੀਆਂ ਵਿੱਚੋਂ ਪੰਜ ਬੱਚੇ ਹਨ। ਅਰਬਾਂ ਰੁਪਏ ਦਾ ਮਾਲਕ ਬਣਨ ਤੋਂ ਬਾਅਦ ਟਰੰਪ ਦਾ ਸੁਪਨਾ ਅਮਰੀਕਾ ਦਾ ਰਾਸ਼ਟਰਪਤੀ ਬਣਨ ਦਾ ਬਣਿਆ। 2013 ਵਿੱਚ ਉਸਨੇ 10 ਲੱਖ ਡਾਲਰ ਖਰਚ ਕਰਕੇ ਇੱਕ ਖੋਜ ਏਜੰਸੀ ਤੋਂ ਸਰਵੇ ਕਰਵਾਇਆ ਕਿ ਉਸਦੇ ਰਾਸ਼ਟਰਪਤੀ ਦੀ ਚੋਣ ਜਿੱਤਣ ਦੇ ਕਿੰਨੇ ਕੁ ਚਾਂਸ ਹਨ। ਸਰਵੇਖਣ ਦੇ ਨਤੀਜਿਆਂ ਤੋਂ ਉਤਸ਼ਾਹਿਤ ਹੋ ਕੇ ਉਸਨੇ ਰਿਪਬਲਿਕਨ ਪਾਰਟੀ ਵੱਲੋਂ ਚੋਣ ਲੜਨ ਦੇ ਇਰਾਦੇ ਦਾ ਐਲਾਨ ਕਰ ਦਿੱਤਾ। ਆਖਿਰ ਉਹ ਸੈਨੇਟਰ ਟੈਡ ਕਰੂਜ਼ ਨੂੰ ਹਰਾ ਕੇ ਰਿਪਬਲਿਕਨ ਪਾਰਟੀ ਵੱਲੋਂ ਰਾਸ਼ਟਰਪਤੀ ਦਾ ਉਮੀਦਵਾਰ ਬਣਿਆ। ਉਸਦਾ ਸਿੱਧਾ ਮੁਕਾਬਲਾ ਡੈਮੋਕਰੇਟ ਪਾਰਟੀ ਦੀ ਹਿਲੇਰੀ ਕਲਿੰਟਨ ਨਾਲ ਸੀ। ਉਸਨੇ ਮੀਡੀਆ ਦੀਆਂ ਸਭ ਕਿਆਸ ਅਰਾਈਆਂ ਨੂੰ ਫ਼ੇਲ੍ਹ ਕਰਦੇ ਹੋਏ ਇਹ ਚੋਣ ਜਿੱਤ ਲਈ। 20 ਜਨਵਰੀ ਨੂੰ ਅਮਰੀਕਾ ਦੇ ਤਖਤ ‘ਤੇ ਬੈਠੇ ਇਸ ਸਖਸ਼ ਨੇ ਮੀਡੀਆ ਨੂੰ ਦੁਨੀਆਂ ਦਾ ਸਭ ਤੋਂ ਭ੍ਰਿਸ਼ਟ ਤਬਕਾ ਦੱਸ ਕੇ ਇੱਕ ਹੋਰ ਵੱਡੇ ਵਿਵਾਦ ਨੂੰ ਜਨਮ ਦੇ ਦਿੱਤਾ ਹੈ। ਇੱਕ ਗੱਲ ਤਾਂ ਸਪਸ਼ਟ ਹੈ ਕਿ ਟਰੰਪ ਦੇ ਰਾਜ ਕਾਲ ਦੌਰਾਨ ਰਵਾਇਤੀ ਮੀਡੀਆ ਦੇ ਮੁਕਾਬਲੇ ਸੋਸ਼ਲ ਮੀਡੀਆ ਨੂੰ ਹੀ ਤਰਜੀਹ ਮਿਲੇਗੀ। ਦੂਜੇ ਪਾਸੇ ਇਹ ਵੀ ਸਪਸ਼ਟ ਹੈ ਕਿ ਕਿਸੇ ਵੀ ਲੋਕਤੰਤਰ ਵਿੱਚ ਲੋਕਾਂ ਕੋਲ ਸੂਚਨਾ ਦਾ ਅਧਿਕਾਰ ਹੁੰਦਾ ਹੈ। ਮੀਡੀਆ ਨੂੰ ਜਾਣਕਾਰੀ ਕਰਨ ਦਾ ਅਧਿਕਾਰ ਇਸ ਲਈ ਵੀ ਹੁੰਦਾ ਹੈ ਕਿਉਂਕਿ ਉਸਨੇ ਪ੍ਰਾਪਤ ਕੀਤੀ ਜਾਣਕਾਰੀ ਲੋਕਾਂ ਤੱਕ ਪਹੁੰਚਾਉਣੀ ਹੁੰਦੀ ਹੈ। ਮੀਡੀਆ ਨੂੰ ਲੋਕਤੰਤਰ ਦਾ ਚੌਥਾ ਸਤੰਭ ਮੰਨਿਆ ਗਿਆ ਹੈ। ਮੀਡੀਆ ਦੀ ਸਾਰਥਕ ਭੂਮਿਕਾ ਬਿਨਾਂ ਲੋਕਤੰਤਰ ਦੀ ਹੋਂਦ ਦੀ ਕਲਪਨਾ ਕਰਨੀ ਵੀ ਔਖੀ ਹੁੰਦੀ ਹੈ। ਅਮਰੀਕਾ ਵਰਗੇ ਲੋਕਤੰਤਰ ਵਿੱਚ ਦੇਸ਼ ਦੇ ਸਭ ਤੋਂ ਸ਼ਕਤੀਸ਼ਾਲੀ ਮਨੁੱਖ ਦਾ ਮੀਡੀਆ ਬਾਰੇ ਇਸ ਤਰ੍ਹਾਂ ਦਾ ਰਵੱਈਆ ਕਿਸੇ ਵੀ ਤਰ੍ਹਾਂ ਸਹੀ ਨਹੀਂ ਮੰਨਿਆ ਜਾ ਸਕਦਾ ਅਤੇ ਨਾ ਹੀ ਟਰੰਪ ਵੱਲੋਂ ਸਮੁੱਚੇ ਮੀਡੀਆ ਨੂੰ ਭ੍ਰਿਸ਼ਟ ਕਹਿਣਾ ਉਚਿਤ ਹੈ।

ਸੋਸ਼ਲ ਮੀਡੀਆ ਤੋਂ ਬਿਨਾਂ ਰਾਜਨੀਤੀ ਸੰਭਵ ਨਹੀਂ

ਇੰਟਰਨੈਟ ਦੀ ਆਮਦ ਨੇ ਸੰਚਾਰ ਮਾਧਿਅਮ ਨੂੰ ਇਕ ਨਵੇਂ ਦੌਰ ਵਿਚ ਦਾਖਲ ਕਰ ਦਿੱਤਾ ਸੀ। ਇੰਟਰਨੈਟ ਦੇ ਕੱਨੇੜੇ ਚੜ੍ਹ ਕੇ ਸੋਸ਼ਲ ਮੀਡੀਆ ਨੇ ਦੁਨੀਆਂ ਨੂੰ ਸੱਚਮੁਚ ਹੀ ਮੁੱਠੀ ਵਿਚ ਬੰਦ ਕਰ ਦਿੱਤਾ। ਸੋਸ਼ਲ ਮੀਡੀਆ ਨੇ ਹੋਰ ਖੇਤਰਾਂ ਦੇ ਨਾਲ ਨਾਲ ਰਾਜਨੀਤੀ ਦਾ ਰੂਪ ਵੀ ਬਦਲ ਕੇ ਰੱਖ ਦਿੱਤਾ ਹੈ। ਇਕ ਸਮਾਂ ਸੀ ਜਦੋਂ ਸਿਆਸੀ ਲੋਕਾਂ ਨੂੰ ਸੁਣਨ ਲਈ ਲੋਕ ਸਿਆਸੀ ਕਾਨਫਰੰਸਾਂ ਵਿਚ ਜਾਂਦੇ ਸਨ। 1920 ਦੇ ਦਹਾਕੇ ਵਿਚ ਰੇਡੀਓ ਦਾ ਪ੍ਰਸਾਰਣ ਸ਼ੁਰੂ ਹੋਇਆ ਤਾਂ ਨੇਤਾਵਾਂ ਦੀ ਆਵਾਜ਼ ਘਰ-ਘਰ ਪਹੁੰਚਣ ਲੱਗੀ। ਫਿਰ ਟੀ. ਵੀ. ਆਇਆ। ਟੈਲੀਵਿਜ਼ਨ ਨੇ ਰਾਜਨੀਤਿਕ ਨੇਤਾਵਾਂ ਦਾ ਧਿਆਨ ਖਿੱਚਿਆ। ਟੀ. ਵੀ. ਨੇ ਸਿਆਸੀ ਲੋਕਾਂ ਅਤੇ ਸਿਆਸਤ ‘ਤੇ ਕਾਫੀ ਪ੍ਰਭਾਵ ਪਾਇਆ। ਪ੍ਰਾਈਵੇਟ ਚੈਨਲਾਂ ਦੇ ਆਉਣ ਨਾਲ ਜਿੱਥੇ ਮੁਕਾਬਲਾ ਵਧਿਆ, ਉਥੇ ਟੀ. ਵੀ. ਮਾਧਿਅਮ ਲਗਾਤਾਰ ਮਹਿੰਗਾ ਹੁੰਦਾ ਗਿਆ।
ਭਾਵੇਂ ਇਹ ਮਾਧਿਅਮ ਮਹਿੰਗਾ ਸੀ ਪਰ ਸਿਆਸਤ ਨੂੰ ਬਹੁਤ ਰਾਸ ਆਇਆ। ਅਮਰੀਕਾ ਦੀ ਸਿਆਸਤ ਵਿਚ ਟੀ. ਵੀ. ਦੀ ਭੂਮਿਕਾ ਅਹਿਮ ਰਹੀ। ਅਮਰੀਕੀ ਰਾਸ਼ਟਰਪਤੀ ਦੀ ਚੋਣ ਵਿਚ ਉਮੀਦਵਾਰਾਂ ਨੂੰ ਬਹਿਸ ਲਈ ਇਸ ਮਾਧਿਅਮ ਨੇ ਇਕ ਪਾਰਦਰਸ਼ੀ ਮੰਚ ਪ੍ਰਦਾਨ ਕੀਤਾ। ਅਮਰੀਕੀ ਨੇਤਾਵਾਂ ਤੋਂ ਪ੍ਰਭਾਵਿਤ ਹੋ ਕੇ ਲਾਲ ਕ੍ਰਿਸ਼ਨ ਅਡਵਾਨੀ ਵਰਗੇ ਭਾਰਤੀ ਨੇਤਾਵਾਂ ਨੇ ਆਪਣੀ ਗੱਲ ਕਹਿਦ ਲਈ ਟੀ. ਵੀ. ਮਾਧਿਅਮ ਨੂੰ ਤਰਜੀਹ ਦੇਣੀ ਸ਼ੁਰੂ ਕੀਤੀ।
ਸੂਚਨਾ ਕ੍ਰਾਂਤੀ ਨੇ ਜਦੋਂ ਲੋਕਾਂ ਦੇ ਦਰਾਂ ‘ਤੇ ਦਸਤਕ ਦਿੱਤੀ ਅਤੇ ਸੋਸ਼ਲ ਮੀਡੀਆ ਦੇ ਰੂਪ ਵਿਚ ਫੇਸਬੁੱਕ, ਟਵਿੱਟਰ, ਵਟਸਅੱਪ, ਬਲਾਗ ਅਤੇ ਹੋਰ ਆਨਲਾਈਨ ਮਾਧਿਅਮ ਉਪਲਬਧ ਕਰਵਾਏ ਤਾਂ ਸਿਆਸਤਦਾਨਾਂ ਦੇ ਹੱਥਾਂ ਵਿਚ ਤਾਂ ਜਿਵੇਂ ਅੱਲਾਦੀਨ ਦਾ ਚਿਰਾਗ ਹੀ ਆ ਗਿਆ। ਇਸ ਮਾਧਿਅਮ ਦੀ ਖੂਬਸੂਰਤੀ ਇਹ ਹੈ ਕਿ ਇਹ ਪ੍ਰਿੰਟ, ਰੇਡੀਓ ਅਤੇ ਟੀ. ਵੀ. ਦੇ ਮੁਕਾਬਲੇ ਬਿਲਕੁਲ ਮੁਫਤ ਹੈ। ਸੋਸ਼ਲ ਮੀਡੀਆ ਨੂੰ ਸਿਆਸੀ ਕਾਰਜ ਲਈ ਵਰਤੋਂ ਵਿਚ ਲਿਆਉਣ ਦਾ ਪਹਿਲਾ ਸਫਲ ਪ੍ਰਯੋਗ 2008 ਵਿਚ ਅਮਰੀਕਾ ਦੀ ਰਾਸ਼ਟਰਪਤੀ ਦੀ ਚੋਣ ਸਮੇਂ ਬਰਾਕ ਓਬਾਮਾ ਵੱਲੋਂ ਕੀਤਾ ਗਿਆ। ਇਸ ਚੋਣ ਵਿਚ ਸੋਸ਼ਲ ਮੀਡੀਆ ਦੇ ਪਏ ਪ੍ਰਭਾਵ ਦੇਖ ਕੇ ਇਸ ਚੋਣ ਨੂੰ ‘ਫੇਸਬੁੱਕ ਇਲੈਕਸ਼ਨਜ਼ ਆਫ 2008’ ਕਿਹਾ ਗਿਆ। ਬਰਾਕ ਓਬਾਮਾ ਤੋਂ ਪ੍ਰੇਰਿਤ ਹੋ ਕੇ ਦੁਨੀਆਂ ਦੇ ਸਿਆਸਤਦਾਨਾਂ ਨੇ ਸੋਸ਼ਲ ਮੀਡੀਆ ਨੂੰ ਵਰਤਣ ਵੱਲ ਕੁਝ ਪੁਲਾਂਘਾਂ ਪੁੱਟੀਆਂ। 2009 ਵਿਚ ਭਾਰਤੀ ਸਿਆਸਤਦਾਨ ਸਸੀ ਥਰੂਰ ਕਾਫੀ ਕਿਰਿਆਸ਼ੀਲ ਹੋ ਚੁੱਕੇ ਸਨ। ਹੌਲੀ-ਹੌਲੀ ਸਾਰੇ ਨਵੇਂ ਪੁਰਾਣੇ ਸਿਆਸੀ ਨੇਤਾ ਸੋਸ਼ਲ ਮੀਡੀਆ ਦੀ ਵਰਤੋਂ ਕਰਨ ਲੱਗੇ। ਅੱਜ ਕੋਈ ਵਿਰਲਾ ਸਿਆਸਤਦਾਨ ਹੀ ਹੋਵੇਗਾ, ਜਿਸਦਾ ਫੇਸਬੁੱਕ ਜਾਂ ਟਵਿੱਟਰ ‘ਤੇ ਅਕਾਊਂਟ ਨਾ ਹੋਵੇ। ਸੋਸ਼ਲ ਮੀਡੀਆ ਤੋਂ ਪਹਿਲਾਂ ਆਏ ਸੰਚਾਰ ਮਾਧਿਅਮਾਂ, ਜਿਵੇਂ ਰੇਡੀਓ ਨੇ ਲੋਕਾਂ ਤੱਕ ਪਹੁੰਚਣ ਲਈ 38 ਸਾਲ ਲਗਾਏ, ਟੀ. ਵੀ. ਮਾਧਿਅਮ ਨੇ 14 ਸਾਲ ਲਗਾਏ ਸਨ ਪਰ ਦੂਜੇ ਪਾਸੇ ਫੇਸਬੁੱਕ 9 ਮਹੀਨੇ ਵਿਚ ਹੀ ਲੋਕਾਂ ਤੱਕ ਪਹੁੰਚ ਗਈ ਸੀ।
ਵਰਤਮਾਨ ਵਿਚ ਸਾਰੀਆਂ ਰਾਜਨੀਤਿਕ ਪਾਰਟੀਆਂ ਨੇ ਸੋਸ਼ਲ ਮੀਡੀਆ ਦੀ ਮਹੱਤਤਾ ਸਮਝ ਲਈ ਹੈ। ਫਰਵਰੀ 2015 ਵਿਚ ਦਿੱਲੀ ਵਿਧਾਨ ਸਭਾ ਦੀਆਂ ਚੋਣਾਂ ਸਮੇਂ ਆਮ ਆਦਮੀ ਪਾਰਟੀ ਨੇ ਜਿਸ ਪ੍ਰਭਾਵਸ਼ਾਲੀ ਤਰੀਕੇ ਨਾਲ ਫੇਸਬੁੱਕ ਅਤੇ ਟਵਿੱਟਰ ਦੀ ਵਰਤੋਂ ਕੀਤੀ। ਉਸ ਨਾਲ ਸੋਸ਼ਲ ਮੀਡੀਆ ਦੀ ਮਹੱਤਤਾ ਚੰਗੀ ਤਰ੍ਹਾਂ ਉਜਾਗਰ ਹੋ ਗਈ। ਸੋਸ਼ਲ ਮੀਡੀਆ ਦੀ ਤਾਕਤ ਦਾ ਅੰਦਾਜ਼ਾ ਇਸ ਗੱਲ ਤੋਂ ਵੀ ਲਗਾਇਆ ਜਾ ਸਕਦਾ ਹੈ ਕਿ 15 ਅਪ੍ਰੈਲ 2014 ਨੂੰ ਅਰਵਿੰਦ ਕੇਜਰੀਵਾਲ ਨੇ ਟਵਿੱਟਰ ਉਤੇ ਅਪੀਲ ਕੀਤੀ ਕਿ ਰਾਹੁਲ ਗਾਂਧੀ ਅਤੇ ਮੋਦੀ ਨਾਲ ਲੜਨ ਲਈ ਉਸਨੂੰ ਪੈਸਾ ਚਾਹੀਦਾ ਹੈ ਤਾਂ ਦੋ ਦਿਨ ਵਿਚ ਆਮ ਆਦਮੀ ਪਾਰਟੀ ਨੂੰ ਇਕ ਕਰੋੜ ਰੁਪਿਆ ਇਕੱਠਾ ਹੋ ਗਿਆ ਸੀ। 4 ਫਰਵਰੀ 2017 ਨੁੰ ਹੋਣ ਜਾ ਰਹੀਆਂ ਚੋਣਾਂ ਲਈ ਪੰਜਾਬ, ਉਤਰ ਪ੍ਰਦੇਸ਼, ਉਤਰਾਖੰਡ ਅਤੇ ਗੋਆ ਆਦਿ ਵਿਚ ਲੱਗਭੱਗ ਸਾਰੀਆਂ ਰਾਜਨੀਤਿਕ ਪਾਰਟੀਆਂ ਨੇ ਸੋਸ਼ਲ ਮੀਡੀਆ ਦੀ ਸਹੀ ਵਰਤੋਂ ਲਈ ਪੇਸ਼ਾਵਰ ਲੋਕ ਕੰਮ ‘ਤੇ ਲਾਏ ਹੋਏ ਹਨ। ਵਰਤਮਾਨ ਸਮੇ ਵਿਚ ਅਖਬਾਰਾਂ, ਰੇਡੀਓ, ਟੀ. ਵੀ. ਆਦਿ ਰਵਾਇਤੀ ਸੰਚਾਰ ਮਾਧਿਅਮਾਂ ਉਪਰ ਨਿਰਭਰਤਾ ਖਤਮ ਹੋ ਗਈ ਹੈ। ਵੋਟਰਾਂ ਤੱਕ ਪਹੁੰਚ ਕਰਨ ਲਈ ਸੋਸ਼ਲ ਮੀਡੀਆ ਸਭ ਤੋਂ ਵਧੀਆ ਆਸਾਨ ਅਤੇ ਸਸਤਾ ਮਾਧਿਅਮ ਹੈ। ਇਸ ਨਾਲ ਨਾ ਸਿਰਫ ਚੋਣ ਪ੍ਰਚਾਰ ਹੀ ਕੀਤਾ ਜਾ ਸਕਦਾ ਹੈ ਸਗੋਂ ਲੋਕਾਂ ਦੇ ਵਿਚਾਰ ਅਤੇ ਪ੍ਰਤੀਕਿਰਿਆਵਾਂ ਵੀ ਨੇਤਾਵਾਂ ਕੋਲ ਆਸਾਨੀ ਨਾਲ ਪਹੁੰਚ ਜਾਂਦੀਆਂ ਹਨ। ਸੋਬਲ ਮੀਡੀਆ ਜਿੰਨੀ ਪਾਰਦਰਸ਼ਤਾ ਕਿਸੇ ਹੋਰ ਸੰਚਾਰ ਮਾਧਿਅਮ ਕੋਲ ਸੰਭਵ ਹੀ ਨਹੀਂ। ਫੇਸਬੁੱਕ ਲਾਈਵ ਵਰਗੀ ਸੁਵਿਧਾ ਨਾਲ ਘਰ ਬੈਠਿਆਂ ਵੋਟਰਾਂ ਤੱਕ ਪਹੁੰਚ ਕੀਤੀ ਜਾ ਸਕਦੀ ਹੈ।
ਪੰਜਾਬ ਦੀਆਂ 2017 ਦੀਆਂ ਚੋਣਾਂ ਵਿਚ ਆਮ ਆਦਮੀ ਪਾਰਟੀ ਵੱਲੋਂ ਸੋਸ਼ਲ ਮੀਡੀਆ ਦੀ ਹੀ ਵਰਤੋਂ ਕੀਤੀ ਜਾ ਰਹੀ ਹੈ। ‘ਆਪ’ ਵੱਲੋਂ ਟੀ. ਵੀ. ਚੈਨਲਾਂ ਅਤੇ ਅਖਬਾਰਾਂ ਨਾਲੋਂ ਸੋਸ਼ਲ ਮੀਡੀਆ ਨੂੰ ਤਰਜੀਹ ਦਿੱਤੀ ਜਾ ਰਹੀ ਹੈ। ‘ਆਪ’ ਦੇ ਸਟਾਂਰ ਪ੍ਰਚਾਰਕ ਭਗਵੰਤ ਮਾਨ ਤਾਂ ਆਪਣੀ ਹਰ ਸਿਆਸੀ ਮੀਟਿੰਗ ਅਤੇ ਰੈਲੀ ਨੂੰ ਫੇਸਬੁੱਕ ਲਾਈਵ ਰਾਹੀਂ ਲੋਕਾਂ ਤੱਕ ਪਹੁੰਚਾ ਰਿਹਾ ਹੈ। ਇਕੱਲਾ ਭਗਵੰਤ ਮਾਨ ਹੀ ਨਹੀਂ ਸਗੋਂ ਪਾਰਟੀ ਦਾ ਸਮੁੱਚਾ ਚੋਣ ਪ੍ਰਚਾਰ ਸੋਸ਼ਲ ਮੀਡੀਆ ਰਾਹੀਂ ਹੋ ਰਿਹਾ ਹੈ। ਆਮ ਆਦਮੀ ਪਾਰਟੀ ਦੇ ਕੋਲ ਬਾਕੀ ਪਾਰਟੀਆਂ ਦੇ ਮੁਕਾਬਲੇ ਵਲੰਟੀਅਰਜ਼ ਜ਼ਿਆਦਾ ਹਨ ਜੋ ਸੋਸ਼ਲ ਮੀਡੀਆ ਦੀ ਵਰਤੋਂ ਚੋਣ ਪ੍ਰਚਾਰ ਲਈ ਕਰ ਰਹੇ ਹਨ। ਦੂਜੇ ਪਾਸੇ ਕਾਂਗਰਸ, ਸ਼੍ਰੋਮਣੀ ਅਕਾਲੀ ਦਲ ਅਤੇ ਭਾਰਤੀ ਜਨਤਾ ਪਾਰਟੀ ਇਸ ਕੰਮ ਲਈ ਪੇਸ਼ਾਵਰ ਲੋਕਾਂ ‘ਤੇ ਨਿਰਭਰ ਕਰ ਰਹੀਆਂ ਹਨ। ਪੰਜਾਬ ਵਿਚ ਕਾਂਗਰਸ ਦਾ ਕੰਮ ਪ੍ਰਸ਼ਾਂਤ ਕਿਸ਼ੋਰ ਦੇਖ ਰਹੇ ਹਨ। ਪ੍ਰਸ਼ਾਂਤ ਕਿਸ਼ੋਰ ਨੇ ਹੀ ਕੈਪਟਨ ਅਮਰਿੰਦਰ ਸਿੰਘ ਲਈ ‘ਕਾਫੀ ਵਿਦ ਕੈਪਟਨ’ ਅਤੇ ‘ਪੰਜਾਬ ਦਾ ਕੈਪਟਨ’ ਆਦਿ ਨਾਅਰੇ ਸੋਸ਼ਲ ਮੀਡੀਆ ਰਾਹੀਂ ਲੋਕਾਂ ਤੱਕ ਪਹੁੰਚਾਏ। ਦੇਸ਼ ਵਿਚ ਸਿਆਸੀ ਰਣਨੀਤੀਕਾਰ ਪ੍ਰਸ਼ਾਂਤ ਕਿਸ਼ੋਰ ਅਜਿਹੇ ਪੇਸ਼ਾਵਰ ਮਾਹਿਰ ਦੇ ਤੌਰ ‘ਤੇ ਪ੍ਰਸਿੱਧ ਹੋਇਆ ਹੈ, ਜਿਸ ਨੇ ਕਈ ਸਿਆਸੀ ਪਾਰਟੀਆਂ ਅਤੇ ਨੇਤਾਵਾਂ ਦੀ ਬੇੜੀ ਬੰਨੇ ਲਾਈ। ਇਸ ਕੰਮ ਵਿਚ ਪ੍ਰਸ਼ਾਂਤ ਕਿਸ਼ੋਰ ਨੂੰ 16 ਮਈ 2014 ਦੀਆਂ ਆਮ ਚੋਣਾਂ ਵਿਚ ਉਦੋਂ ਪ੍ਰਸਿੱਧੀ ਮਿਲੀ ਜਦੋਂ ਉਸਨੇ ਨਰਿੰਦਰ ਮੋਦੀ ਨੁੰ ਵੱਡੇ ਲੀਡਰ ਦੇ ਤੌਰ ‘ਤੇ ਉਭਾਰਨ ਲਈ ਆਪਣੀ ਕਲਾ ਦੇ ਜੌਹਰ ਦਿਖਾਏ। ਇਸ ਤੋਂ ਬਾਅਦ ਬਿਹਾਰ ਚੋਣਾਂ ਵਿਚ ਉਸਨੇ ਨਿਤੀਸ਼ ਕੁਮਾਰ ਲਈ ਸੋਸ਼ਲ ਮੀਡੀਆ ਰਾਹੀਂ ਪ੍ਰਚਾਰ ਕੀਤਾ ਸੀ। ਮੋਦੀ ਦੀ ‘ਚਾਯ ਪਰ ਚਰਚਾ’ ਅਤੇ ਨਿਤੀਸ਼ ਕੁਮਾਰ ਲਈ ‘ਬਿਹਾਰੀ ਬਨਾਮ ਬਾਹਰੀ’ ਨਾਅਰੇ ਸੋਸ਼ਲ ਮੀਡੀਆ ‘ਤੇ ਪ੍ਰਚਾਰਨ ਦਾ ਸਿਹਰਾ ਵੀ ਪ੍ਰਸ਼ਾਂਤ ਕਿਸ਼ੋਰ ਨੂੰ ਜਾਂਦਾ ਹੈ। ਇਸੇ ਤਰਜ਼ ‘ਤੇ ਸੁਖਬੀਰ ਬਾਦਲ ਨੇ ਵੀ ਇਕ ਪੂਰੀ ਟੀਮ ਨੂੰ ਸੋਸ਼ਲ ਮੀਡੀਆ ‘ਤੇ ਸ਼੍ਰੋਮਣੀ ਅਕਾਲੀ ਦਲ ਦਾ ਪ੍ਰਚਾਰ ਕਰਨ ਲਈ ਲਾਇਆ ਹੋਇਆ ਹੈ।
ਫਰਵਰੀ 2017 ਦੀਆਂ ਚੋਣਾਂ ਭਾਰਤੀ ਜਨਤਾ ਪਾਰਟੀ ਲਈ ਬਹੁਤ ਅਹਿਮ ਹਨ। ਭਾਰਤੀ ਜਨਤਾ ਪਾਰਟੀ ਉਤਰ ਪ੍ਰਦੇਸ਼ ਨੂੰ ਜਿੱਤਣ ਲਈ ਹਰ ਹੀਲਾ ਵਰਤ ਰਹੀ ਹੈ। ਇਸੇ ਕਾਰਨ ਭਾਜਪਾ ਪ੍ਰਧਾਨ ਅਮਿਤ ਸ਼ਾਹ ਨੇ ਆਪਣੇ ਵਰਕਰਾਂ ਅਤੇ ਨੇਤਾਵਾਂ ਨੂੰ ਸੋਸ਼ਲ ਮੀਡੀਆ ਵਿਚ ਮਾਹਿਰ ਬਣਾਉਣ ਲਈ ਵਿਸ਼ੇਸ਼ ਟਰੇਨਿੰਗ ਕੈਂਪ ਲਗਾਉਣੇ ਸ਼ੁਰੂ ਕੀਤੇ ਹਨ।
ਅਮਿਤ ਸ਼ਾਹ ਨੇ ਇੱਥੋਂ ਤੱਕ ਕਿਹਾ ਸੀ ਕਿ ਜਿਸ ਨੇਤਾ ਦੇ ਸੋਸ਼ਲ ਮੀਡੀਆ ‘ਤੇ 25000 ਤੋਂ ਘੱਟ ਫਾਲੋਅਰਜ਼ ਹੋਣਗੇ, ਉਸਨੂੰ ਟਿਕਟ ਨਹੀਂ ਦਿੱਤੀ ਜਾਵੇਗੀ। ਭਾਜਪਾ ਪ੍ਰਧਾਨ ਦਾ ਕਹਿਣਾ ਹੈ ਕਿ ਜੋ ਨੇਤਾ ਮੁਫਤ ਦੇ ਸੋਸ਼ਲ ਮੀਡੀਆ ਦਾ ਉਪਯੋਗ ਨਹੀਂ ਕਰ ਸਕਦਾ, ਉਹ ਟਿਕਟ ਲੈਣ ਤੋਂ ਬਾਅਦ ਆਪਣੇ ਸਾਥੀਆਂ ਅਤੇ ਵੋਟਰਾਂ ਨਾਲ ਰਾਬਤਾ ਕਿਵੇਂ ਰੱਖੇਗਾ।
ਬੀ. ਐਸ. ਐਫ. ਦੀ 27ਵੀਂ ਬਟਾਲੀਅਨ ਦੇ ਕਸ਼ਮੀਰ ਵਿਚ ਤਾਇਨਾਤ ਜਵਾਨ ਤੇਜ ਬਹਾਦਰ ਯਾਦਵ ਦੀ ਘਟੀਆ ਖਾਣਾ ਮਿਲਣ ਵਾਲੀ ਵੀਡੀਓ ਕਲਿੱਪ ਨੇ ਦੇਸ਼ ਵਿਚ ਜੋ ਤਰਥੱਲੀ ਮਚਾ ਕੇ ਰੱਖ ਦਿੱਤੀ ਹੈ, ਉਹ ਗੰਲ ਇਹ ਸਿੱਧ ਕਰਦੀ ਹੈ ਕਿ ਸੋਸ਼ਲ ਮੀਡੀਆ ਦਾ ਪ੍ਰਭਾਵ ਹੋਰ ਸੰਚਾਰ ਮਾਧਿਅਮਾਂ ਦੇ ਮੁਕਾਬਲੇ ਕਿਤੇ ਜ਼ਿਆਦਾ ਅਤੇ ਤੇਜ਼ੀ ਨਾਲ ਪੈਂਦਾ ਹੈ। ਪ੍ਰਿੰਟ ਮੀਡੀਆ ਦੇ ਮੁਕਾਬਲੇ ਟੈਲੀਵਿਜ਼ਨ ਅਤੇ ਟੈਲੀਵਿਜ਼ਨ ਦੀ ਤੁਲਨਾ ਵਿਚ ਸੋਸ਼ਲ ਮੀਡੀਆ ਕਿਤੇ ਜ਼ਿਆਦਾ ਪਾਰਦਰਸ਼ੀ ਮਾਧਿਅਮ ਹੈ। ਜਿਹੜੀ ਵੀਡੀਓ ਨੂੰ ਨਿਊਜ਼ ਚੈਨਲ ਵਿਖਾਉਣ ਨੂੰ ਤਿਆਰ ਨਹੀਂ ਹੁੰਦੇ ਜਾਂ ਆਪਣੇ ਤਰੀਕੇ ਨਾਲ ਆਡਿਟ ਕਰਕੇ ਹੀ ਦਿਖਾਉਂਦੇ ਹਨ, ਉਸਨੂੰ ਸੋਸ਼ਲ ਮੀਡੀਆ ਹੂ-ਬ-ਹੂ ਵਿਖਾ ਦਿੰਦਾ ਹੈ। ਜੋ ਨੇਤਾ ਲੋਕ ਗਲਤ ਕੰਮ ਕਰਦੇ ਹਨ, ਅਨੈਤਿਕ ਕੰਮ ਕਰਦੇ ਹਨ, ਆਮ ਲੋਕਾਂ ਨਾਲ ਠੀਕ ਵਿਵਹਾਰ ਨਹੀਂ ਕਰਦੇ, ਉਹਨਾਂ ਲਈ ਸੋਸ਼ਲ ਮੀਡੀਆ ਇਕ ਵੱਡਾ ਚੈਕ ਹੈ। ਆਪਣੇ ਨੇਤਾਵਾਂ ਦੀ ਕਾਰਗੁਜ਼ਾਰੀ ਬਾਰੇ ਵੀ ਲੋਕ ਬੇਇਜਕ ਹੋ ਕੇ ਸੋਸ਼ਲ ਮੀਡੀਆ ‘ਤੇ ਲਿਖ ਸਕਦੇ ਹਨ। ਸੋਸ਼ਲ ਮੀਡੀਆ ਕਾਰਨ ਹੁਣ ਕੋਈ ਗੱਲ ਲੁਕੀ ਨਹੀਂ ਰਹਿ ਸਕਦੀ। ਜਦੋਂ ਇਕ ਅਕਾਲੀ ਮੰਤਰੀ ਬੇਰੁਜ਼ਗਾਰ ਅਧਿਆਪਕਾਂ ਦੇ ਥੱਪੜ ਮਾਰਦਾ ਹੈ ਤਾਂ ਉਹ ਵੀਡੀਓ ਕਲਿੱਪ ਮਿੰਟਾਂ-ਸਕਿੰਟਾਂ ਵਿਚ ਸਾਰੀ ਦੁਨੀਆ ਵਿਚ ਨਸ਼ਰ ਹੋ ਜਾਂਦਾ ਹੈ।
ਇਵੇਂ ਹੀ ਜੇ ਭਗਵੰਤ ਮਾਨ ਬਸੀ ਪਠਾਣਾਂ ਵਿਚ ਮੀਡੀਆ ਕਰਮੀਆਂ ਨਾਲ ਦੁਰਵਿਵਹਾਰ ਕਰਦਾ ਹੈ ਤਾਂ ਉਹ ਵੀਡੀਓ ਵੀ ਵਾਇਰਲ ਹੋ ਜਾਂਦਾ ਹੈ। ਸੋਸ਼ਲ ਮੀਡੀਆ ਲੋਕਾਂ ਦੇ ਹੱਥਾਂ ਵਿਚ ਉਹ ਹਥਿਆਰ ਹੈ ਜੋ ਸਿਆਸੀ ਨੇਤਾਵਾਂ ਨੂੰ ਸਿੱਧੇ ਰਾਹ ‘ਤੇ ਰੱਖਣ ਲਈ ਬਹੁਤ ਕਾਰਗਰ ਹੈ।
ਸੋਸ਼ਲ ਮੀਡੀਆ ਸਿਰਫ ਸਿਆਸੀ ਚੋਣ ਪ੍ਰਚਾਰ ਲਈ ਹੀ ਕਾਰਗਰ ਨਹੀਂ ਸਗੋਂ ਇਸਨੂੰ ਹਰ ਪੱਖ ਤੋਂ ਵਰਤੋਂ ਵਿਚ ਲਿਆਂਦਾ ਜਾ ਸਕਦਾ ਹੈ। ਵਿਸ਼ਵ ਜਾਣਦਾ ਹੈ ਕਿ ਅਮਰੀਕਾ ਦੇ ਚੁਣੇ ਗਏ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਆਪਣੀ ਚੋਣ ਮੁਹਿੰਮ ਦੇ ਦੌਰਾਨ ਸੋਸ਼ਲ ਮੀਡੀਆ ਦੀ ਖੂਬ ਵਰਤੋਂ ਕੀਤੀ ਸੀ। ਹੁਣ ਟਰੰਪ ਵੱਲੋਂ ਰਾਸ਼ਟਰਪਤੀ ਦੇ ਅਹੁਦੇ ਨੂੰ ਸੰਭਾਲਣ ਤੋਂ ਪਹਿਲਾਂ ਹੀ ਉਸਦੇ ਸਾਥੀ ਟਰੰਪ ਦੇ ਸੋਸ਼ਲ ਮੀਡੀਆ ਅਪਣਾਉਣ ਨੂੰ ਹੋਰ ਹਰਮਨ ਪਿਆਰਾ ਬਣਾਉਣ ਵਿਚ ਜੁਟੇ ਹੋਏ ਹਨ। ਇਹ ਕਿਆਸ ਅਰਾਈਆਂ ਹਨ ਕਿ ਰਾਸ਼ਟਰਪਤੀ ਟਰੰਪ ਪ੍ਰੈਸ ਕਾਨਫਰੰਸ ਕਰਨ ਦੀ ਥਾਂ ਸੋਸ਼ਲ ਮੀਡੀਆ ਦੀ ਵਰਤੋਂ ਨੂੰ ਤਰਜੀਹ ਦੇਣਗੇ। ਇਸ ਬਾਰੇ ਟਰੰਪ ਪਹਿਲਾਂ ਹੀ ਕਹਿ ਚੁੱਕੇ ਹਨ ਕਿ ਸੋਸ਼ਲ ਮੀਡੀਆ ਜ਼ਿਆਦਾ ਤੇਜ਼ ਗਤੀ ਦਾ ਮਾਧਿਅਮ ਹੈ ਅਤੇ ਉਹ ਸੋਸ਼ਲ ਮੀਡੀਆ ਰਾਹੀਂ ਲੋਕਾਂ ਨਾਲ ਸੰਪਰਕ ਬਣਾਈ ਰੱਖਣ ਨੂੰ ਤਰਜੀਹ ਦੇਣਗੇ।
ਸੋ, ਉਕਤ ਚਰਚਾ ਸਪਸ਼ਟ ਕਰਦੀ ਹੈ ਕਿ ਅੱਜ ਦੀ ਸਿਆਸਤ ਵਿਚ ਸੋਸ਼ਲ ਮੀਡੀਆ ਦੀ ਮਹੱਤਤਾ ਬਹੁਤ ਵੱਧ ਚੁੱਕੀ ਹੈ। ਜਿਹੜੀ ਰਾਜਨੀਤਿਕ ਪਾਰਟੀ ਅਤੇ ਜਿਹੜਾ ਰਾਜਨੀਤਿਕ ਨੇਤਾ ਸੋਸ਼ਲ ਮੀਡੀਆ ਦੀ ਵਰਤੋਂ ਨਹੀਂ ਕਰੇਗਾ, ਉਸਦਾ ਰਾਜਨੀਤੀ ਵਿਚ ਟਿਕੇ ਰਹਿਣਾ ਬਹੁਤ ਮੁਸ਼ਕਿਲ ਹੋਵੇਗਾ।

ਕੇਜਰੀਵਾਲ ਪੰਜਾਬ ਦਾ ਮੁੱਖ ਮੰਤਰੀ: ਸਸੋਦੀਆ

ਆਮ ਆਦਮੀ ਪਾਰਟੀ ਵੱਲੋਂ ਮੁਹਾਲੀ ਵਿਖੇ ਇਕ ਚੋਣ ਰੈਲੀ ਕੀਤੀ ਗਈ।ਇਸ ਚੋਣ ਸਭਾ ਨੂੰ ਸੰਬੋਧਨ ਕਰਨ ਦਿੱਲੀ ਦੇ ਉਪ ਮੁੱਖ ਮੰਤਰੀ ਮਨੀਸ਼ ਸਸੋਦੀਆ ਆਏ ਹੋਏ ਸਨ। ਅੱਜਕਲ੍ਹ ਪੰਜਾਬ ਵਿੱਚ ਆਮ ਆਦਮੀ ਪਾਰਟੀ ਪੂਰਾ ਦਮ-ਖਮ ਦਿਖਾ ਰਹੀ ਹੈ। ਅਰਵਿੰਦ ਕੇਜਰੀਵਾਲ ਅਤੇ ਭਗਵੰਤ ਮਾਨ ਨੂੰ ਸੁਣਨ ਤਾਂ ਹਜ਼ਾਰਾਂ ਲੋਕ ਇਕੱਠੇ ਹੋ ਰਹੇ ਹਨ। 10 ਜਨਵਰੀ ਨੂੰ ਮੁਹਾਲੀ ਵਿੱਚ ਹੋਈ ਚੋਣਰੈਲੀ ਵਿੱਚ ਵੀ ਵੱਡਾ ਇਕੰਠ ਸੀ, ਜਿਸਨੂੰ ਵੇਖ ਕੇ ਮਨੀਸ਼ ਸਸੋਦੀਆ ਗਦਗਦ ਹੋ ਗਿਆ ਅਤੇ ਇਕ ਵੱਡਾ ਬਿਆਨ ਦਾਗ ਗਿਆ। ਸਸੋਦੀਆ ਨੇ ਕਿਹਾ ਕਿ ਪੰਜਾਬ ਦੇ ਵੋਟਰ ਇਹ ਮੰਨ ਕੇ ਵੋਟ ਦੇਣ ਕਿ ਉਨ੍ਹਾਂ ਅਰਵਿੰਦ ਕੇਜਰੀਵਾਲ ਨੂੰ ਮੁੱਖ ਮੰਤਰੀ ਬਣਾਉਣਾ ਹੈ। ਸਸੋਦੀਆ ਨੇ ਇਹ ਵੀ ਦਾਅਵਾ ਕੀਤਾ ਕਿ ਪੰਜਾਬ ਵਿੱਚ ‘ਆਪ’ ਦੀ ਧੂਮ ਮਚੀ ਹੋਈ ਹੈ ਅਤੇ ਪੰਜਾਬ ਦੇ ਲੋਕ ਕ੍ਰਾਂਤੀਕਾਰੀ ਬਦਲਾਅ ਲਿਆਉਣ ਵਾਲੇ ਹਨ। ਪੰਜਾਬ ਵਿੱਚ ਸਾਡਾ ਮੁਕਾਬਲਾ ਨਸ਼ੇ ਅਤੇ ਬੇਈਮਾਨੀ ਦੇ ਸੁਦਾਗਰਾਂ ਨਾਲ ਹੈ। ਪੰਜਾਬ ਦੇ ਲੋਕ ਆਪਣੇ ਆਪ ਨੂੰ ਅਜਿਹੀ ਸਰਕਾਰ ਦੇਣ ਵਾਲੇ ਹਨ ਜੋ ਰਾਜ ਨੁੰ ਭ੍ਰਿਸ਼ਟਾਚਾਰ ਅਤੇ ਨਸ਼ੇ ਤੋਂ ਮੁਕਤ ਬਣਾਏਗੀ।
ਆਮ ਆਦਮੀ ਪਾਰਟੀ ਦੇ ਅਰਵਿੰਦ ਕੇਜਰੀਵਾਲ ਤੋਂ ਬਾਅਦ ਦੂਜੇ ਸਭ ਤੋਂ ਸ਼ਕਤੀਸ਼ਾਲੀ ਨੇਤਾ ਦੇ ਮੂੰਹੋਂ ਇਹ ਗੱਲ ਸੁਣ ਕੇ ਲੋਕ ਅਰਵਿੰਦ ਕੇਜਰੀਵਾਲ ਨੂੰ ਮੁੱਖ ਮੰਤਰੀ ਬਣਾਉਣ ਲਈ ਵੋਟ ਪਾਉਣ, ਸਿਆਸੀ ਹਲਕਿਆਂ ਵਿੱਚ ਵਿਵਾਦਪੂਰਨ ਚਰਚਾ ਸ਼ੁਰੂ ਹੋਣੀ ਸੁਭਾਵਿਕ ਸੀ। ਸਭ ਤੋਂ ਪਹਿਲੀ ਪ੍ਰਤੀਕਿਰਿਆ ਤ੍ਰਿਣਾਮੂਲ ਕਾਂਗਰਸ ਦੇ ਪ੍ਰਧਾਨ ਅਤੇ ਸਾਬਕਾ ਕਾਂਗਰਸੀ ਜਗਮੀਤ ਸਿੰਘ ਬਰਾੜ ਦੀ ਸੀ। ਪੰਜਾਬ ਇਕ ਗੈਰ-ਪੰਜਾਬੀ ਨੂੰ ਮੁੱਖ ਮੰਤਰੀ ਕਿਉਂ ਬਣਾਏਗਾ। ਕੀ ਪੰਜਾਬੀਆਂ ਕੋਲ ਮੁੱਖ ਮੰਤਰੀ ਦੇ ਚਿਹਰੇ ਖਤਮ ਹੋ ਗਏ ਹਨ। ਕੈਪਟਨ ਅਮਰਿੰਦਰ ਸਿੰਘ ਨੇ ਵੀ ਤਿੱਖਾ ਪ੍ਰਤੀਕਰਮ ਕੀਤਾ ਹੈ। ਕਾਂਗਰਸੀਆਂ-ਅਕਾਲੀਆਂ ਅਤੇ ਇੱਥੋਂ ਤੱਕ ਕਿ ਆਮ ਆਦਮੀ ਪਾਰਟੀ ਦੇ ਕੁਝ ਲੀਡਰਾਂ ਨੇ ਇਹ ਕਹਿਣਾ ਸ਼ੁਰੂ ਕਰ ਦਿੱਤਾ ਹੈ ਕਿ ‘ਬਿੱਲੀ ਥੈਲੇ ਵਿੱਚੋਂ ਬਾਹਰ ਆ ਗਈ।’ ਸਸੋਦੀਆ ਨੇ ਇਹ ਬਿਆਨ ਜਾਣ-ਬੁੱਝ ਕੇ ਦਿੱਤਾ ਹੈ। ਇਨ੍ਹਾਂ ਦਿਨਾਂ ਵਿੱਚ ਭਗਵੰਤ ਮਾਨ ਵੀ ਮੁੱਖ ਮੰਤਰੀ ਦੀ ਕੁਰਸੀ ਦੀ ਚਰਚਾ ਗਾਹੇ-ਵਗਾਹੇ ਕਰ ਰਿਹਾ ਹੈ। ਜਦੋਂ ਭਗਵੰਤ ਮਾਨ ਦੀ ਇਸ ਇੱਛਾ ਬਾਰੇ ਪੰਜਾਬ ਕੇ ਕਨਵੀਨਰ ਗੁਰਪ੍ਰੀਤ ਸਿੰਘ ਘੁੱਗੀ ਨੂੰ ਪੁੱਛਿਆ ਗਿਆ ਤਾਂ ਉਸਨੇ ਕਿਹਾ ਕਿ ਇਸਦਾ ਫ਼ੈਸਲਾ ਪਾਰਟੀ ਕਰੇਗੀ। ਜੇ ਪਾਰਟੀ ਮੈਨੂੰ ਇਹ ਜ਼ਿੰਮੇਵਾਰੀ ਦੇਣਾ ਚਾਹੇਗੀ ਤਾਂ ਮੈਂ ਵੀ ਇਸ ਲਈ ਤਿਆਰ ਹਾਂ। ‘ਆਪ’ ਵੱਲੋਂ ਮੁੱਖ ਮੰਤਰੀ ਦੇ ਅਹੁਦੇ ਦੇ ਸੰਭਾਵੀ ਉਮੀਦਵਾਰਾਂ ਵਿੱਚ ਐਡਵੋਕੇਟ ਐਚ. ਐਸ. ਫ਼ੂਲਕਾ ਦਾ ਨਾਂ ਵੀ ਚਰਚਾ ਵਿੱਚ ਆਉਂਦਾ ਰਿਹਾ ਹੈ। ਮੈਂ ਆਪਣੇ ਇਕ ਟੀ. ਵੀ. ਪ੍ਰੋਗਰਾਮ ਦੌਰਾਨ ਪਟਿਆਲਾ ਸ਼ਹਿਰ ਤੋਂ ‘ਆਪ’ ਉਮੀਦਵਾਰ ਨੂੰ ਜਦੋਂ ਇਸ ਬਾਰੇ ਪੁੱਛਿਆ ਤਾਂ ਡਾ. ਬਲਵੀਰ ਸਿੰਘ ਨੇ ਕਿਹਾ ਕਿ ਭਗਵੰਤ ਮਾਨ, ਗੁਰਪ੍ਰੀਤ ਸਿੰਘ ਵੜੈਚ, ਐਚ. ਐਸ. ਫ਼ੂਲਕਾ ਅਤੇ ਕੰਵਰ ਸੰਧੂ ਵਰਗੇ ਨੇਤਾਵਾਂ ਵਿੱਚੋਂ ਕਿਸੇ ਨੂੰ ਵੀ ਪਾਰਟੀ ਮੁੱਖ ਮੰਤਰੀ ਬਣਾ ਸਕਦੀ ਹੈ। ਇਸ ਬਾਰੇ ਦਿੱਲੀ ਦੇ ਮੁੱਖ ਮੰਤਰੀ ਨੂੰ ਵੀ ਬਹੁਤ ਵਾਰ ਸਵਾਲ ਕੀਤਾ ਗਿਆ ਅਤੇ ਹਮੇਸ਼ਾਂ ਗੋਲ-ਮੋਲ ਜਵਾਬ ਹੀ ਮਿਲਿਆ ਕਿ ਸਮਾਂ ਆਉਣ ‘ਤੇ ਦੱਸ ਦੇਵਾਂਗੇ।
ਸਸੋਦੀਆ ਦੇ ਬਿਆਨ ਨੂੰ ਕਿਸ ਕਿਸਮ ਦਾ ਸੰਕੇਤ ਸਮਝਿਆ ਜਾਵੇ। ਕੀ ਅਰਵਿੰਦ ਕੇਜਰੀਵਾਲ ਪੰਜਾਬ ਦੀ ਸੱਤਾ ਹਾਸਲ ਕਰਨੀ ਚਾਹੁੰਦਾ ਹੈ। ਸਿਆਸੀ ਹਲਕਿਆਂ ਵਿੱਚ ਇਹ ਚਰਚਾ ਹੈ ਕਿ ਦਿੱਲੀ ਵਿੱਚ ਅਰਵਿੰਦ ਕੋਲ ਸੱਤਾ ਪੂਰੀ ਨਹੀਂ ਹੈ। ਉਹ ਪੰਜਾਬ ਦਾ ਮੁੱਖ ਮੰਤਰੀ ਬਣ ਕੇ ਕੌਮੀ ਲੀਡਰ ਬਣਨ ਵਾਲੇ ਆਪਣੇ ਸੁਪਨੇ ਨੂੰ ਹਕੀਕਤ ਵਿੱਚ ਬਦਲਣਾ ਚਾਹੁੰਦਾ ਹੈ। ਜੇ ਕੇਜਰੀਵਾਲ ਪੰਜਾਬ ਦਾ ਮੁੱਖ ਮੰਤਰੀ ਬਣਦਾ ਹੈ ਤਾਂ ਮਨੀਬ ਸੋਸਦੀਆ ਲਈ ਦਿੱਲੀ ਦਾ ਮੁੱਖ ਮੰਤਰੀ ਬਣਨਾ ਤਹਿ ਹੈ। ਇਹ ਵੀ ਚਰਚਾ ਹੈ ਕਿ ਇਹੀ ਕਾਰਨ ਹੈ ਕਿ ਅਰਵਿੰਦ ਕੇਜਰੀਵਾਲ ਨੇ ਕੋਈ ਅਜਿਹਾ ਨੇਤਾ ‘ਆਪ’ ਵਿੱਚ ਨਹੀਂ ਰੱਖਿਆ, ਜਿਸਦਾ ਮੁੱਖ ਮੰਤਰੀ ਦੇ ਅਹੁਦੇ ਮੁਤਾਬਕ ਕੱਦ ਹੋਵੇ। ਦੂਜੇ ਪਾਸੇ ਇਹ ਵੀ ਇਸ਼ਾਰੇ ਮਿਲ ਰਹੇ ਹਨ ਕਿ ਭਗਵੰਤ ਮਾਨ ਜਨੂੰਨ ਦੀ ਹੱਦ ਤੱਕ ਮੁੱਖ ਮੰਤਰੀ ਦੀ ਕੁਰਸੀ ‘ਤੇ ਨਿਗ੍ਹਾ ਟਿਕਾਅ ਕੇ ਬੈਠਾ ਹੈ। ਜੇ ਆਮ ਆਦਮੀ ਪਾਰਟੀ ਬਹੁਗਿਣਤੀ ਲੈ ਜਾਂਦੀ ਹੈ ਤਾਂ ਮੁੱਖ ਮੰਤਰੀ ਦੇ ਅਹੁਦੇ ‘ਤੇ ਸਹਿਮਤੀ ਹੋਣਾ ਆਸਾਨ ਨਹੀਂ ਹੋਵੇਗਾ। ਸ਼ਾਇਦ ਅਜਿਹੇ ਹਾਲਾਤ ਅਰਵਿੰਦ ਕੇਜਰੀਵਾਲ ਲਈ ਸਾਜ਼ਗਾਰ ਹੋਣਗੇ।
ਕੀ ਮੁਹਾਲੀ ਵਿਖੇ ਦਿੱਤਾ ਸਸੋਦੀਆ ਦਾ ਬਿਆਨ ਅਰਵਿੰਦ ਕੇਜਰੀਵਾਲ ਦੇ ਹੱਕ ਵਿੱਚ ਹਾਲਾਤ ਪੈਦਾ ਕਰਨ ਦੀ ਸ਼ੁਰੂਆਤ ਹੈ? ਕੀ ਇਸ ਦਾ ਪੰਜਾਬ ਦੇ ਵੋਟਰਾਂ ਅਤੇ ਆਮ ਆਦਮੀ ਪਾਰਟੀ ਦੇ ਸਮਰਥਕਾਂ ‘ਤੇ ਸਕਾਰਾਤਮਕ ਅਸਰ ਪਵੇਗਾ ਜਾਂ ਫ਼ਿਰ ਵਿਰੋਧੀ ਪਾਰਟੀਆਂ ਵੱਲੋਂਆ ਰਹੇ ਪ੍ਰਤੀਕਰਮ ‘ਆਪ’ ਪਾਰਟੀ ਦੇ ਵਿਰੁੱਧ ਜਾਣਗੇ। ਪੰਜਾਬ ਦੀ ਸਿਆਸਤ ਵਿੱਚ ਗੈਰ-ਪੰਜਾਬੀ, ਗੈਰ ਜੱਟ ਅਤੇ ਹਿੰਦੂ ਮੁੱਖ ਮੰਤਰੀ ਹੋਣਾ ਵੱਡਾ ਇਨਕਲਾਬੀ ਕਦਮ ਹੋਵੇਗਾ। ਸਸੋਦੀਆ ਦਾ ਇਹ ਬਿਆਨ 4 ਫ਼ਰਵਰੀ ਦੀ ਚੋਣ ਵਿੱਚ ਉਲਟ ਵੀ ਜਾ ਸਕਦਾ ਹੈ ਅਤੇ ‘ਆਪ’ ਦਾ ਨੁਕਸਾਨ ਵੀ ਕਰ ਸਕਦਾ ਹੈ।
ਤੇਜ ਬਹਾਦਰ ਦੀ ਵੀਡੀਓ ਵਾਇਰਲ
‘ਹਮਾਰੀ ਕਿਆ ਸਿਚੁਏਸ਼ਨ ਹੈ, ਯੇ ਨਾ ਕੋਈ ਮੀਡੀਆ ਦਿਖਾਤਾ ਹੈ, ਨਾ ਕੋਈ ਮਨਿਸਟਰ ਸੁਨਤਾ ਹੈ, ਕੋਈ ਭੀ ਸਰਕਾਰੇਂ ਆਏਂ ਹਮਾਰੇ ਹਾਲਾਤ ਬਦਤਰ ਹੈਂ। ਮੈਂਆਪਕੋ ਤੀਨ ਵੀਡੀਓ ਭੇਜੂੰਗਾ। ਮੈਂ ਚਾਹਤਾ ਹੂੰ ਆਪ ਪੂਰੇ ਦੇਸ਼ ਕੀ ਮੀਡੀਆ ਕੋ, ਨੇਤਾਉਂ ਕੋ ਦਿਖਾਏਂ ਕਿ ਹਮਾਰੇ ਅਧਿਕਾਰੀ ਹਮਾਰੇ ਸਾਥ ਕਿਤਨਾ ਅੱਤਿਆਚਾਰ ਵ ਅਨਿਆਏ ਕਰਤੇ ਹੈਂ। ਇਸ ਵੀਡੀਓ ਕੋ ਜ਼ਿਆਦਾ ਸੇ ਜ਼ਿਆਦਾ ਫ਼ੈਲਾਏਂ ਤਾਂ ਕਿ ਮੀਡੀਆ ਜਾਂਚ ਕਰੇ ਕਿ ਕਿਨ ਹਾਲਾਤੋਂ ਮੇਂ ਜਵਾਨ ਕਾਮ ਕਰਤੇ ਹੈਂ।”
ਇਹ ਬਿਆਨ ਜੰਮੂ-ਕਸ਼ਮੀਰ ਵਿੱਚ ਤਾਇਨਾਤ ਬੀ. ਐਸ. ਐਫ਼. ਦੀ 4ਵੀਂ ਬਟਾਲੀਅਨ ਦੇ ਕਾਂਸਟੇਬਲ ਤੇਜ ਬਹਾਦਰ ਯਾਦਵ ਦਾ ਹੈ। ਜਿਸਨੇ ਚਾਰ ਵੀਡੀਓ ਕਲਿੱਪ ਸੋਸ਼ਲ ਮੀਡੀਆ ‘ਤੇ ਪੋਸਟ ਕਰਕੇ ਇਹ ਦੰਸਿਆ ਹੈ ਕਿ ਇੰਨੀ ਸਰਦੀ ਅਤੇ ਬਰਫ਼ਬਾਰੀ ਦੇ ਵਿੱਚ ਡਿਊਟੀ ਕਰ ਰਹੇ ਜਵਾਨਾਂ ਨੂੰ ਬਹੁਤ ਘਟੀਆ ਖਾਣਾ ਦਿੱਤਾ ਜਾ ਰਿਹਾ ਹੈ। ਨਾਸ਼ਤੇ ਵਿੱਚ ਸਿਰਫ਼ ਇਕ ਪਰੌਂਠਾ, ਚਾਹ ਨਾਲ ਖਾਣ ਨੂੰ ਮਿਲਦਾ ਹੈ। ਫ਼ਿਰ ਰੋਟੀਆਂ ਤੇ ਦਾਲ ਦੇ ਨਾਮ ‘ਤੇ ਹਲਦੀ ਅਤੇ ਨਮਕ ਵਾਲਾ ਪਾਣੀ ਪੀਣ ਲਈ ਮਜਬੂਰ ਹਨ। ਕਦੇ ਕਦੇ ਤਾਂ ਭੁੱਖੇ ਵੀ ਰਹਿਣਾ ਪੈਂਦਾ ਹੈ। ਅਜਿਹੇ ਹਾਲਾਤ ਵਿੱਚ ਉਹ ਦਸ ਦਸ ਘੰਟੇ ਡਿਊਟੀ ਕਰਦੇ ਹਨ। ਤੇਜ ਬਹਾਦਰ ਨੇ ਇਲਜ਼ਾਮ ਲਾਇਟਾ ਕਿ ਸਰਕਾਰ ਤਾਂ ਸਭ ਕੁਝ ਭੇਜੀਦ ਹੈ ਪਰ ਉਚ ਅਧਿਕਾਰੀ ਜਵਾਨਾਂ ਦੇ ਰਾਸ਼ਨ ਨੂੰ ਮਾਰਕੀਟ ਵਿੱਚ ਵੇਚ ਦਿੰਦੇ ਹਨ।
ਤੇਜ ਬਹਾਦਰ ਯਾਦਵ ਦੀ ਵਾਇਰਲ ਹੋਈ ਵੀਡੀਓ ਨੂੰ 26 ਲੱਖ ਤੋਂ ਵੀ ਵੱਧ ਲੋਕਾਂ ਨੇ ਦੇਖਿਆ ਅਤੇ ਸ਼ੇਅਰ ਕੀਤਾ। ਜਦੋਂ ਇਹ ਵੀਡੀਓ ਕਲਿਪ ਸੋਸ਼ਲ ਮੀਡੀਆ ਤੋਂ ਲੈ ਕੇ ਟੀ. ਵੀ. ਮੀਡੀਆ ਨੇ ਵਿਖਾਏ ਤਾਂ ਦੇਸ਼ ਵਿੱਚ ਤਰਥੱਲੀ ਮੱਚ ਗਈ। ਲੋਕਾਂ ਦੇ ਦਿਲਾਂ ਵਿੱਚ ਜਵਾਨਾਂ ਲਈ ਹਮਦਰਦੀ ਪੈਦਾ ਹੋਈ ਜੋ ਕਿ ਲੋਕਾਂ ਨੇ ਸੋਸ਼ਲ ਮੀਡੀਆ ਰਾਹੀਂ ਇਕ-ਦੂਜੇ ਨਾਲ ਸ਼ੇਅਰ ਕੀਤੀ।ਕਾਂਸਟੇਬਲ ਤੇਜ ਬਹਾਦਰ ਨੇ ਨਾ ਸਿਰਫ਼ ਆਪਦੇ ਉਚ ਅਧਿਕਾਰੀਆਂ, ਸਰਕਾਰ ਤੇ ਮੰਤਰੀਆਂ ਨੂੰ ਲੋਕਾਂ ਦੀ ਕਚਹਿਰੀ ਵਿੱਚ ਖੜ੍ਹਾ ਕੀਤਾ ਸਗੋਂ ਦੇਸ਼ ਦੇ ਮੀਡੀਆ ਦੀ ਵਿਸ਼ਵਾਸ ਯੋਗਤਾ ‘ਤੇ ਵੱਡਾ ਸਵਾਲੀਆ ਨਿਸ਼ਾਨ ਲਗਾ ਦਿੱਤਾ। ਯਾਦਵ ਦੇ ਇਸ ਕਦਮ ਨੇ ਗ੍ਰਹਿ ਮੰਤਰਾਲੇ ਨੂੰ ਤੁਰੰਤ ਕਾਰਵਾਈ ਕਰਨ ਲਈ ਮਜਬੂਰ ਕਰ ਦੱਿਤਾ। ਗ੍ਰਹਿ ਮੰਤਰੀ ਰਾਜਨਾਥ ਸਿੰਘ ਨੇ ਤੇਜ਼ੀ ਨਾਲ ਕਾਰਵਾਈ ਕਰਦੇ ਹੋਏ ਜਾਂਚ ਦੇ ਹੁਕਮ ਦਿੱਤੇ ਹਨ। ਬੀ. ਐਸ. ਐਫ਼. ਨੇ ਆਪਣੀ ਸ਼ੁਰੂਆਤੀ ਰਿਪੋਰਟ ਵਿੱਚ ਦੱਸਿਆ ਹੈ ਕਿ ਮਾਮਲੇ ਦੀ ਜਾਂਚ ਆਈ. ਜੀ. ਪੱਧਰ ਦੇ ਅਧਿਕਾਰੀ ਕਰਨਗੇ। ਪੜਤਾਲ ਦੀ ਨਿਰਪੱਖਤਾ ਬਣਾਈ ਰੱਖਣ ਲਈ ਤੇਜ ਬਹਾਦਰ ਦਾ ਤਬਾਦਲਾ ਦੂਜੀ ਯੂਨਿਟ ਵਿੱਚ ਕਰ ਦਿੱਤਾ ਗਿਆ ਹੈ। ਮੈਸ ਕਮਾਂਡਰ ਨੂੰ ਵੀ ਛੁੱਟੀ ਭੇਜ ਦਿੱਤਾ ਗਿਆ। ਉਂਝ ਬੀ. ਐਸ. ਐਫ਼. ਦੇ ਉਚ ਅਧਿਕਾਰੀਆਂ ਨੇ ਇਹ ਵੀ ਕਿਹਾ ਹੈ ਕਿ ਕਾਂਸਟੇਬਲ ਤੇਜ ਬਹਾਦਰ ਯਾਦਵ ਦਾ ਸਰਵਿਸ ਰਿਕਾਰਡ ਅੱਛਾ ਨਹੀਂ ਹੈ। ਬੀ. ਐਸ. ਐਫ਼. ਦੇ ਜੰਮੂ ਰੇਂਜ ਦੇ ਆਈ. ਜੀ. ਡੀ. ਕੇ. ਉਪਾਧਿਆਏ ਦਾ ਕਹਿਣਾ ਹੈ ਕਿ ਮੈਂ ਹੈਰਾਨ ਹਾਂ ਕਿ ਉਸਨੇ ਇਹ ਵੀਡੀਓ ਅਪਲੋਡ ਕਿਸ ਤਰ੍ਹਾਂ ਕਰ ਦਿੱਤਾ। ਵੈਸੇ ਉਸਦਾ ਰਿਕਾਰਡ ਅੱਛਾ ਨਹੀਂ। ਉਸਦੇ ਪਰਿਵਰ ਦੀ ਹਾਲਤ ਨੂੰ ਵੇਖਦੇ ਹੋਏ ਪਹਿਲਾਂ ਕੋਈ ਕਾਰਵਾਈ ਨਹੀਂ ਕੀਤੀ ਗਈ ਸੀ।”
ਦੂਜੇ ਪਾਸੇ ਤੇਜ ਬਹਾਦਰ ਯਾਦਵ ਦਾ ਕਹਿਣਾ ਹੈ ਕਿ ਉਸਨੂੰ ਪਤਾ ਹੈ ਕਿ ਉਸਦੇ ਇਸ ਕੰਮ ਦੀ ਉਸਨੁੰ ਸਜ਼ਾ ਮਿਲੇਗੀ ਪਰ ਮੇਰੀ ਇਸ ਹਿੰਮਤ ਨਾਲ ਬਾਕੀ ਜਵਾਨਾਂ ਦਾ ਫ਼ਾਇਦਾ ਹੋਵੇਗਾ। ਉਸਦੀ ਇਹ ਗੱਲ ਹੈ ਵੀ ਦਰੁੱਸਤ ਕਿਉਂਕਿ ਤੇਜ ਬਹਾਦਰ ਦੀ ਕਾਰਵਾਈ ਨੇ ਸਾਰੇ ਦੇਸ਼ ਦਾ ਧਿਆਨ ਖਿੱਚਿਆ ਹੈ। ਇਹ ਵੀ ਚਰਚਾ ਸ਼ੁਰੂ ਹੋ ਗਈ ਹੈ ਕਿ ਲੋਕਤੰਤਰ ਵਿੱਚ ਅਨੁਸ਼ਾਸਨ ਵਿੱਚ ਰਹਿਣ ਵਾਲੇ ਸੁਰੱਖਿਆ ਬਲਾਂ ਵਿੱਚ ਪਾਰਦਰਸ਼ਤਾ ਕਾਇਮ ਕੀਤੀ ਜਾਵੇ। ਤੇਜ ਬਹਾਦਰ ਯਾਦਵ ਨੇ ਦੇਸ਼ ਦੀ ਮੁੱਖ ਧਾਰਾ ਮੀਡੀਆ ਨੂੰ ਵੀ ਦਰਪਣ ਵਿਖਾਇਆ ਹੈ ਜੋ ਇਕਪਾਸੜ ਕਵਰੇਜ਼ ਕਰਨ ਨੂੰ ਹੀ ਤਰਜੀਹ ਦਿੰਦਾ ਹੈ ਅਤੇ ਆਮ ਲੋਕਾਂ ਨੂੰ ਨਜ਼ਰਅੰਦਾਜ਼ ਕਰ ਰਿਹਾ ਹੈ। ਯਾਦਵ ਦੀ ਇਸ ਕਾਰਵਾਈ ਨੇ ਇਕ ਵਾਰ ਫ਼ਿਰ ਸੋਸ਼ਲ ਮੀਡੀਆ ਦੀ ਮਹੱਤਤਾ ਨੂੰ ਅੱਗੇ ਲਿਆਂਦਾ ਹੈ।


Warning: fopen(/home/gpunjab/public_html/wp-content/plugins/hit-counter/css/.txt): failed to open stream: No such file or directory in /home/gpunjab/public_html/wp-content/plugins/hit-counter/hc.php on line 216

Warning: fread() expects parameter 1 to be resource, boolean given in /home/gpunjab/public_html/wp-content/plugins/hit-counter/hc.php on line 217

Warning: fclose() expects parameter 1 to be resource, boolean given in /home/gpunjab/public_html/wp-content/plugins/hit-counter/hc.php on line 218